Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Saṁyutta Nikāya
Samādhisutta (SN35.99)
- Thông tin
- Mã SuttaCentral: SN35.99
Saṁyutta Nikāya 35.99
10. Saḷavagga
Samādhisutta
“Samādhiṁ, bhikkhave, bhāvetha.
Samāhito, bhikkhave, bhikkhu yathābhūtaṁ pajānāti.
Kiñca yathābhūtaṁ pajānāti?
‘Cakkhu aniccan’ti yathābhūtaṁ pajānāti;
‘rūpā aniccā’ti yathābhūtaṁ pajānāti;
‘cakkhuviññāṇaṁ aniccan’ti yathābhūtaṁ pajānāti;
‘cakkhusamphasso anicco’ti yathābhūtaṁ pajānāti.
‘Yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi aniccan’ti yathābhūtaṁ pajānāti …pe…
‘mano aniccan’ti yathābhūtaṁ pajānāti.
Dhammā …
manoviññāṇaṁ …
manosamphasso …
‘yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi aniccan’ti yathābhūtaṁ pajānāti.
Samādhiṁ, bhikkhave, bhāvetha.
Samāhito, bhikkhave, bhikkhu yathābhūtaṁ pajānātī”ti.
Chaṭṭhaṁ.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.