Sakkāyasutta (SN22.105)

Saṁyutta Nikāya 22.105

11. Antavagga

Sakkāyasutta

Sāvatthinidānaṁ.

“Sakkāyañca vo, bhikkhave, desessāmi sakkāyasamudayañca sakkāyanirodhañca sakkāyanirodhagāminiñca paṭipadaṁ.

Taṁ suṇātha.

Katamo ca, bhikkhave, sakkāyo?

Pañcupādānakkhandhātissa vacanīyaṁ.

Katame pañca?

Seyyathidaṁ—rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho.

Ayaṁ vuccati, bhikkhave, sakkāyo.

Katamo ca, bhikkhave, sakkāyasamudayo?

Yāyaṁ taṇhā ponobhavikā …pe…

ayaṁ vuccati, bhikkhave, sakkāyasamudayo.

Katamo ca, bhikkhave, sakkāyanirodho?

Yo tassāyeva taṇhāya …pe…

ayaṁ vuccati, bhikkhave, sakkāyanirodho.

Katamā ca, bhikkhave, sakkāyanirodhagāminī paṭipadā?

Ayameva ariyo aṭṭhaṅgiko maggo.

Seyyathidaṁ—sammādiṭṭhi …pe… sammāsamādhi.

Ayaṁ vuccati, bhikkhave, sakkāyanirodhagāminī paṭipadā”ti.

Tatiyaṁ.