Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Saṁyutta Nikāya
Maṇibhaddasutta (SN10.4)
- Thông tin
- Mã SuttaCentral: SN10.4
Saṁyutta Nikāya 10.4
1. Indakavagga
Maṇibhaddasutta
Ekaṁ samayaṁ bhagavā magadhesu viharati maṇimālike cetiye maṇibhaddassa yakkhassa bhavane.
Atha kho maṇibhaddo yakkho yena bhagavā tenupasaṅkami; upasaṅkamitvā bhagavato santike imaṁ gāthaṁ abhāsi:
“Satīmato sadā bhaddaṁ,
satimā sukhamedhati;
Satīmato suve seyyo,
verā ca parimuccatī”ti.
“Satīmato sadā bhaddaṁ,
satimā sukhamedhati;
Satīmato suve seyyo,
verā na parimuccati.
Yassa sabbamahorattaṁ,
ahiṁsāya rato mano;
Mettaṁso sabbabhūtesu,
veraṁ tassa na kenacī”ti.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.