9. Atthavasapakaraṇa (PLI-TV-PVR9)

Parivāra

9. Atthavasapakaraṇa

Dasa atthavase paṭicca tathāgatena sāvakānaṁ sikkhāpadaṁ paññattaṁ—

saṅghasuṭṭhutāya, saṅghaphāsutāya, dummaṅkūnaṁ puggalānaṁ niggahāya, pesalānaṁ bhikkhūnaṁ phāsuvihārāya, diṭṭhadhammikānaṁ āsavānaṁ saṁvarāya, samparāyikānaṁ āsavānaṁ paṭighātāya, appasannānaṁ pasādāya, pasannānaṁ bhiyyobhāvāya, saddhammaṭṭhitiyā vinayānuggahāya.

Yaṁ saṅghasuṭṭhu taṁ saṅghaphāsu.

Yaṁ saṅghaphāsu taṁ dummaṅkūnaṁ puggalānaṁ niggahāya.

Yaṁ dummaṅkūnaṁ puggalānaṁ niggahāya taṁ pesalānaṁ bhikkhūnaṁ phāsuvihārāya.

Yaṁ pesalānaṁ bhikkhūnaṁ phāsuvihārāya taṁ diṭṭhadhammikānaṁ āsavānaṁ saṁvarāya.

Yaṁ diṭṭhadhammikānaṁ āsavānaṁ saṁvarāya taṁ samparāyikānaṁ āsavānaṁ paṭighātāya.

Yaṁ samparāyikānaṁ āsavānaṁ paṭighātāya taṁ appasannānaṁ pasādāya.

Yaṁ appasannānaṁ pasādāya taṁ pasannānaṁ bhiyyobhāvāya.

Yaṁ pasannānaṁ bhiyyobhāvāya taṁ saddhammaṭṭhitiyā.

Yaṁ saddhammaṭṭhitiyā taṁ vinayānuggahāya.

Yaṁ saṅghasuṭṭhu taṁ saṅghaphāsu.

Yaṁ saṅghasuṭṭhu taṁ dummaṅkūnaṁ puggalānaṁ niggahāya.

Yaṁ saṅghasuṭṭhu taṁ pesalānaṁ bhikkhūnaṁ phāsuvihārāya.

Yaṁ saṅghasuṭṭhu taṁ diṭṭhadhammikānaṁ āsavānaṁ saṁvarāya.

Yaṁ saṅghasuṭṭhu taṁ samparāyikānaṁ āsavānaṁ paṭighātāya.

Yaṁ saṅghasuṭṭhu taṁ appasannānaṁ pasādāya.

Yaṁ saṅghasuṭṭhu taṁ pasannānaṁ bhiyyobhāvāya.

Yaṁ saṅghasuṭṭhu taṁ saddhammaṭṭhitiyā.

Yaṁ saṅghasuṭṭhu taṁ vinayānuggahāya.

Yaṁ saṅghaphāsu taṁ dummaṅkūnaṁ puggalānaṁ niggahāya.

Yaṁ saṅghaphāsu taṁ pesalānaṁ bhikkhūnaṁ phāsuvihārāya.

Yaṁ saṅghaphāsu taṁ diṭṭhadhammikānaṁ āsavānaṁ saṁvarāya.

Yaṁ saṅghaphāsu taṁ samparāyikānaṁ āsavānaṁ paṭighātāya.

Yaṁ saṅghaphāsu taṁ appasannānaṁ pasādāya.

Yaṁ saṅghaphāsu taṁ pasannānaṁ bhiyyobhāvāya.

Yaṁ saṅghaphāsu taṁ saddhammaṭṭhitiyā.

Yaṁ saṅghaphāsu taṁ vinayānuggahāya.

Yaṁ saṅghaphāsu taṁ saṅghasuṭṭhu.

Yaṁ dummaṅkūnaṁ puggalānaṁ niggahāya …pe…

yaṁ pesalānaṁ bhikkhūnaṁ phāsuvihārāya …

yaṁ diṭṭhadhammikānaṁ āsavānaṁ saṁvarāya …

yaṁ samparāyikānaṁ āsavānaṁ paṭighātāya …

yaṁ appasannānaṁ pasādāya …

yaṁ pasannānaṁ bhiyyobhāvāya …

yaṁ saddhammaṭṭhitiyā …

yaṁ vinayānuggahāya taṁ saṅghasuṭṭhu.

Yaṁ vinayānuggahāya taṁ saṅghaphāsu.

Yaṁ vinayānuggahāya taṁ dummaṅkūnaṁ puggalānaṁ niggahāya.

Yaṁ vinayānuggahāya taṁ pesalānaṁ bhikkhūnaṁ phāsuvihārāya.

Yaṁ vinayānuggahāya taṁ diṭṭhadhammikānaṁ āsavānaṁ saṁvarāya.

Yaṁ vinayānuggahāya taṁ samparāyikānaṁ āsavānaṁ paṭighātāya.

Yaṁ vinayānuggahāya taṁ appasannānaṁ pasādāya.

Yaṁ vinayānuggahāya taṁ pasannānaṁ bhiyyobhāvāya.

Yaṁ vinayānuggahāya taṁ saddhammaṭṭhitiyāti.

Atthasataṁ dhammasataṁ,

dve ca niruttisatāni;

Cattāri ñāṇasatāni,

atthavase pakaraṇeti.

Atthavasapakaraṇaṁ niṭṭhitaṁ.

Mahāvaggo niṭṭhito.

Tassuddānaṁ

Paṭhamaṁ aṭṭhapucchāyaṁ,

paccayesu punaṭṭha ca;

Bhikkhūnaṁ soḷasa ete,

bhikkhunīnañca soḷasa.

Peyyālaantarā bhedā,

ekuttarikameva ca;

Pavāraṇatthavasikā,

mahāvaggassa saṅgahoti.

Atthavasapakaraṇaṁ niṭṭhitaṁ.