7. Ekuttarikanaya (PLI-TV-PVR7)

7. Sattakavāra

Sattāpattiyo.

Sattāpattikkhandhā.

Satta vinītavatthūni.

Satta sāmīciyo.

Satta adhammikā paṭiññātakaraṇā.

Satta dhammikā paṭiññātakaraṇā.

Sattannaṁ anāpatti sattāhakaraṇīyena gantuṁ.

Sattānisaṁsā vinayadhare.

Satta paramāni.

Sattame aruṇuggamane nissaggiyaṁ hoti.

Satta samathā.

Satta kammāni.

Satta āmakadhaññāni.

Tiriyaṁ sattantarā.

Gaṇabhojane satta anupaññattiyo.

Bhesajjāni paṭiggahetvā sattāhaparamaṁ sannidhikārakaṁ paribhuñjitabbāni.

Katacīvaraṁ ādāya pakkamati.

Katacīvaraṁ samādāya pakkamati.

Bhikkhussa na hoti āpatti daṭṭhabbā.

Bhikkhussa hoti āpatti daṭṭhabbā.

Bhikkhussa hoti āpatti daṭṭhabbā.

Satta adhammikāni pātimokkhaṭṭhapanāni.

Satta dhammikāni pātimokkhaṭṭhapanāni.

Sattahaṅgehi samannāgato bhikkhu vinayadharo hoti—

āpattiṁ jānāti, anāpattiṁ jānāti, lahukaṁ āpattiṁ jānāti, garukaṁ āpattiṁ jānāti, sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī samādāya sikkhati sikkhāpadesu, catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Aparehipi sattahaṅgehi samannāgato bhikkhu vinayadharo hoti—

āpattiṁ jānāti, anāpattiṁ jānāti, lahukaṁ āpattiṁ jānāti, garukaṁ āpattiṁ jānāti, bahussuto hoti sutadharo sutasannicayo ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti tathārūpassa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā, catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Aparehipi sattahaṅgehi samannāgato bhikkhu vinayadharo hoti—

āpattiṁ jānāti, anāpattiṁ jānāti, lahukaṁ āpattiṁ jānāti, garukaṁ āpattiṁ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Aparehipi sattahaṅgehi samannāgato bhikkhu vinayadharo hoti—

āpattiṁ jānāti; anāpattiṁ jānāti; lahukaṁ āpattiṁ jānāti; garukaṁ āpattiṁ jānāti; anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe—“amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno”ti iti sākāraṁ sauddesaṁ anekavihitaṁ pubbenivāsaṁ anussarati; dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti—“ime vata bhonto sattā kāyaduccaritena samannāgatā, vacīduccaritena samannāgatā, manoduccaritena samannāgatā, ariyānaṁ upavādakā, micchādiṭṭhikā, micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā, ime vā pana bhonto sattā kāyasucaritena samannāgatā, vacīsucaritena samannāgatā, manosucaritena samannāgatā, ariyānaṁ anupavādakā, sammādiṭṭhikā, sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā”ti iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti; āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Sattahaṅgehi samannāgato vinayadharo sobhati—

āpattiṁ jānāti, anāpattiṁ jānāti, lahukaṁ āpattiṁ jānāti, garukaṁ āpattiṁ jānāti, sīlavā hoti …pe… samādāya sikkhati sikkhāpadesu, catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Aparehipi sattahaṅgehi samannāgato vinayadharo sobhati—

āpattiṁ jānāti, anāpattiṁ jānāti, lahukaṁ āpattiṁ jānāti, garukaṁ āpattiṁ jānāti, bahussuto hoti …pe… diṭṭhiyā suppaṭividdho catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Aparehipi sattahaṅgehi samannāgato vinayadharo sobhati—

āpattiṁ jānāti, anāpattiṁ jānāti, lahukaṁ āpattiṁ jānāti, garukaṁ āpattiṁ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Aparehipi sattahaṅgehi samannāgato vinayadharo sobhati—

āpattiṁ jānāti; anāpattiṁ jānāti; lahukaṁ āpattiṁ jānāti; garukaṁ āpattiṁ jānāti; anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati, dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti …pe… iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti; āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.

Satta asaddhammā—

assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti.

Satta saddhammā—

saddho hoti, hirimā hoti, ottappī hoti, bahussuto hoti, āraddhavīriyo hoti, upaṭṭhitassati hoti, paññavā hotīti.

Sattakaṁ niṭṭhitaṁ.

Tassuddānaṁ

Āpatti āpattikkhandhā,

vinītā sāmīcipi ca;

Adhammikā dhammikā ca,

anāpatti ca sattāhaṁ.

Ānisaṁsā paramāni,

aruṇasamathena ca;

Kammā āmakadhaññā ca,

tiriyaṁ gaṇabhojane.

Sattāhaparamaṁ ādāya,

samādāya tatheva ca;

Na hoti hoti hoti ca,

adhammā dhammikāni ca.

Caturo vinayadharā,

catubhikkhū ca sobhane;

Satta ceva asaddhammā,

satta saddhammā desitāti.

8. Aṭṭhakavāra

Aṭṭhānisaṁse sampassamānena na so bhikkhu āpattiyā adassane ukkhipitabbo.

Aṭṭhānisaṁse sampassamānena paresampi saddhāya sā āpatti desetabbā.

Aṭṭha yāvatatiyakā.

Aṭṭhahākārehi kulāni dūseti.

Aṭṭha mātikā cīvarassa uppādāya.

Aṭṭha mātikā kathinassa ubbhārāya.

Aṭṭha pānāni.

Aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.

Aṭṭha lokadhammā.

Aṭṭha garudhammā.

Aṭṭha pāṭidesanīyā.

Aṭṭhaṅgiko musāvādo.

Aṭṭha uposathaṅgāni.

Aṭṭha dūteyyaṅgāni.

Aṭṭha titthiyavattāni.

Aṭṭha acchariyā abbhutadhammā mahāsamudde.

Aṭṭha acchariyā abbhutadhammā imasmiṁ dhammavinaye.

Aṭṭha anatirittā.

Aṭṭha atirittā.

Aṭṭhame aruṇuggamane nissaggiyaṁ hoti.

Aṭṭha pārājikā.

Aṭṭhamaṁ vatthuṁ paripūrentī nāsetabbā.

Aṭṭhamaṁ vatthuṁ paripūrentiyā desitāpi adesitā hoti.

Aṭṭhavācikā upasampadā.

Aṭṭhannaṁ paccuṭṭhātabbaṁ.

Aṭṭhannaṁ āsanaṁ dātabbaṁ.

Upāsikā aṭṭha varāni yācati.

Aṭṭhahaṅgehi samannāgato bhikkhu bhikkhunovādako sammannitabbo.

Aṭṭhānisaṁsā vinayadhare.

Aṭṭha paramāni.

Tassapāpiyasikākammakatena bhikkhunā aṭṭhasu dhammesu sammā vattitabbaṁ.

Aṭṭha adhammikāni pātimokkhaṭṭhapanāni.

Aṭṭha dhammikāni pātimokkhaṭṭhapanānīti.

Aṭṭhakaṁ niṭṭhitaṁ.

Tassuddānaṁ

Na so bhikkhu paresampi,

yāvatatiyadūsanā;

Mātikā kathinubbhārā,

pānā abhibhūtena ca.

Lokadhammā garudhammā,

pāṭidesanīyā musā;

Uposathā ca dūtaṅgā,

titthiyā samuddepi ca.

Abbhutā anatirittaṁ,

atirittaṁ nissaggiyaṁ;

Pārājikaṭṭhamaṁ vatthu,

adesitūpasampadā.

Paccuṭṭhānāsanañceva,

varaṁ ovādakena ca;

Ānisaṁsā paramāni,

aṭṭhadhammesu vattanā;

Adhammikā dhammikā ca,

aṭṭhakā suppakāsitāti.

9. Navakavāra

Nava āghātavatthūni.

Nava āghātapaṭivinayā.

Nava vinītavatthūni.

Nava paṭhamāpattikā.

Navahi saṅgho bhijjati.

Nava paṇītabhojanāni.

Navamaṁsehi dukkaṭaṁ.

Nava pātimokkhuddesā.

Nava paramāni.

Nava taṇhāmūlakā dhammā.

Nava vidhamānā.

Nava cīvarāni adhiṭṭhātabbāni.

Nava cīvarāni na vikappetabbāni.

Dīghaso nava vidatthiyo sugatavidatthiyā.

Nava adhammikāni dānāni.

Nava adhammikā paṭiggahā.

Nava adhammikā paribhogā—

tīṇi dhammikāni dānāni, tayo dhammikā paṭiggahā, tayo dhammikā paribhogā.

Nava adhammikā saññattiyo.

Nava dhammikā saññattiyo.

Adhammakamme dve navakāni.

Dhammakamme dve navakāni.

Nava adhammikāni pātimokkhaṭṭhapanāni.

Nava dhammikāni pātimokkhaṭṭhapanānīti.

Navakaṁ niṭṭhitaṁ.

Tassuddānaṁ

Āghātavatthuvinayā,

vinītā paṭhamena ca;

Bhijjati ca paṇītañca,

maṁsuddesaparamāni ca.

Taṇhā mānā adhiṭṭhānā,

vikappe ca vidatthiyo;

Dānā paṭiggahā bhogā,

tividhā puna dhammikā.

Adhammadhammasaññatti,

duve dve navakāni ca;

Pātimokkhaṭṭhapanāni,

adhammadhammikāni cāti.

10. Dasakavāra

Dasa āghātavatthūni.

Dasa āghātapaṭivinayā.

Dasa vinītavatthūni.

Dasavatthukā micchādiṭṭhi.

Dasavatthukā sammādiṭṭhi.

Dasa antaggāhikā diṭṭhi.

Dasa micchattā.

Dasa sammattā.

Dasa akusalakammapathā.

Dasa kusalakammapathā.

Dasa adhammikā salākaggāhā.

Dasa dhammikā salākaggāhā.

Sāmaṇerānaṁ dasa sikkhāpadāni.

Dasahaṅgehi samannāgato sāmaṇero nāsetabbo.

Dasahaṅgehi samannāgato vinayadharo “bālo” tveva saṅkhaṁ gacchati—

attano bhāsapariyantaṁ na uggaṇhāti, parassa bhāsapariyantaṁ na uggaṇhāti, attano bhāsapariyantaṁ anuggahetvā parassa bhāsapariyantaṁ anuggahetvā adhammena kāreti, appaṭiññāya āpattiṁ na jānāti, āpattiyā mūlaṁ na jānāti, āpattisamudayaṁ na jānāti, āpattinirodhaṁ na jānāti, āpattinirodhagāminiṁ paṭipadaṁ na jānāti.

Dasahaṅgehi samannāgato vinayadharo “paṇḍito” tveva saṅkhaṁ gacchati—

attano bhāsapariyantaṁ uggaṇhāti, parassa bhāsapariyantaṁ uggaṇhāti, attano bhāsapariyantaṁ uggahetvā parassa bhāsapariyantaṁ uggahetvā dhammena kāreti, paṭiññāya āpattiṁ jānāti, āpattiyā mūlaṁ jānāti, āpattisamudayaṁ jānāti, āpattinirodhaṁ jānāti, āpattinirodhagāminiṁ paṭipadaṁ jānāti.

Aparehipi dasahaṅgehi samannāgato vinayadharo “bālo” tveva saṅkhaṁ gacchati—

adhikaraṇaṁ na jānāti, adhikaraṇassa mūlaṁ na jānāti, adhikaraṇasamudayaṁ na jānāti, adhikaraṇanirodhaṁ na jānāti, adhikaraṇanirodhagāminiṁ paṭipadaṁ na jānāti, vatthuṁ na jānāti, nidānaṁ na jānāti, paññattiṁ na jānāti, anupaññattiṁ na jānāti, anusandhivacanapathaṁ na jānāti.

Dasahaṅgehi samannāgato vinayadharo “paṇḍito” tveva saṅkhaṁ gacchati—

adhikaraṇaṁ jānāti, adhikaraṇassa mūlaṁ jānāti, adhikaraṇasamudayaṁ jānāti, adhikaraṇanirodhaṁ jānāti, adhikaraṇanirodhagāminiṁ paṭipadaṁ jānāti, vatthuṁ jānāti, nidānaṁ jānāti, paññattiṁ jānāti, anupaññattiṁ jānāti, anusandhivacanapathaṁ jānāti.

Aparehipi dasahaṅgehi samannāgato vinayadharo “bālo” tveva saṅkhaṁ gacchati—

ñattiṁ na jānāti, ñattiyā karaṇaṁ na jānāti, na pubbakusalo hoti, na aparakusalo hoti, akālaññū ca hoti, āpattānāpattiṁ na jānāti, lahukagarukaṁ āpattiṁ na jānāti, sāvasesānavasesaṁ āpattiṁ na jānāti, duṭṭhullāduṭṭhullaṁ āpattiṁ na jānāti, ācariyaparamparā kho panassa na suggahitā hoti na sumanasikatā na sūpadhāritā.

Dasahaṅgehi samannāgato vinayadharo “paṇḍito” tveva saṅkhaṁ gacchati—

ñattiṁ jānāti, ñattiyā karaṇaṁ jānāti, pubbakusalo hoti, aparakusalo hoti, kālaññū ca hoti, āpattānāpattiṁ jānāti, lahukagarukaṁ āpattiṁ jānāti, sāvasesānavasesaṁ āpattiṁ jānāti, duṭṭhullāduṭṭhullaṁ āpattiṁ jānāti, ācariyaparamparā kho panassa suggahitā hoti sumanasikatā sūpadhāritā.

Aparehipi dasahaṅgehi samannāgato vinayadharo “bālo” tveva saṅkhaṁ gacchati—

āpattānāpattiṁ na jānāti, lahukagarukaṁ āpattiṁ na jānāti, sāvasesānavasesaṁ āpattiṁ na jānāti, duṭṭhullāduṭṭhullaṁ āpattiṁ na jānāti, ubhayāni kho panassa pātimokkhāni vitthārena na svāgatāni honti na suvibhattāni na suppavattīni na suvinicchitāni suttaso anubyañjanaso, āpattānāpattiṁ na jānāti, lahukagarukaṁ āpattiṁ na jānāti, sāvasesānavasesaṁ āpattiṁ na jānāti, duṭṭhullāduṭṭhullaṁ āpattiṁ na jānāti, adhikaraṇe ca na vinicchayakusalo hoti.

Dasahaṅgehi samannāgato vinayadharo “paṇḍito” tveva saṅkhaṁ gacchati—

āpattānāpattiṁ jānāti, lahukagarukaṁ āpattiṁ jānāti, sāvasesānavasesaṁ āpattiṁ jānāti, duṭṭhullāduṭṭhullaṁ āpattiṁ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, āpattānāpattiṁ jānāti, lahukagarukaṁ āpattiṁ jānāti, sāvasesānavasesaṁ āpattiṁ jānāti, duṭṭhullāduṭṭhullaṁ āpattiṁ jānāti, adhikaraṇe ca vinicchayakusalo hoti.

Dasahaṅgehi samannāgato bhikkhu ubbāhikāya sammannitabbo.

Dasa atthavase paṭicca tathāgatena sāvakānaṁ sikkhāpadaṁ paññattaṁ.

Dasa ādīnavā rājantepurappavesane.

Dasa dānavatthūni.

Dasa ratanāni.

Dasavaggo bhikkhusaṅgho.

Dasavaggena gaṇena upasampādetabbaṁ.

Dasa paṁsukūlāni.

Dasa cīvaradhāraṇā.

Dasāhaparamaṁ atirekacīvaraṁ dhāretabbaṁ.

Dasa sukkāni.

Dasa itthiyo.

Dasa bhariyāyo.

Vesāliyā dasa vatthūni dīpenti.

Dasa puggalā avandiyā.

Dasa akkosavatthūni.

Dasahākārehi pesuññaṁ upasaṁharati.

Dasa senāsanāni.

Dasa varāni yāciṁsu.

Dasa adhammikāni pātimokkhaṭṭhapanāni.

Dasa dhammikāni pātimokkhaṭṭhapanāni.

Dasānisaṁsā yāguyā.

Dasa maṁsā akappiyā.

Dasa paramāni.

Dasavassena bhikkhunā byattena paṭibalena pabbājetabbaṁ upasampādetabbaṁ nissayo dātabbo sāmaṇero upaṭṭhāpetabbo.

Dasavassāya bhikkhuniyā byattāya paṭibalāya pabbājetabbaṁ upasampādetabbaṁ nissayo dātabbo sāmaṇerī upaṭṭhāpetabbā.

Dasavassāya bhikkhuniyā byattāya paṭibalāya vuṭṭhāpanasammuti sāditabbā.

Dasavassāya gihigatāya sikkhā dātabbāti.

Dasakaṁ niṭṭhitaṁ.

Tassuddānaṁ

Āghātaṁ vinayaṁ vatthu,

micchā sammā ca antagā;

Micchattā ceva sammattā,

akusalā kusalāpi ca.

Salākā adhammā dhammā,

sāmaṇerā ca nāsanā;

Bhāsādhikaraṇañceva,

ñattilahukameva ca.

Lahukā garukā ete,

kaṇhasukkā vijānatha;

Ubbāhikā ca sikkhā ca,

antepure ca vatthūni.

Ratanaṁ dasavaggo ca,

tatheva upasampadā;

Paṁsukūladhāraṇā ca,

dasāhasukkaitthiyo.

Bhariyā dasa vatthūni,

avandiyakkosena ca;

Pesuññañceva senāni,

varāni ca adhammikā.

Dhammikā yāgumaṁsā ca,

paramā bhikkhu bhikkhunī;

Vuṭṭhāpanā gihigatā,

dasakā suppakāsitāti.

11. Ekādasakavāra

Ekādasa puggalā anupasampannā na upasampādetabbā, upasampannā nāsetabbā.

Ekādasa pādukā akappiyā.

Ekādasa pattā akappiyā.

Ekādasa cīvarāni akappiyāni.

Ekādasa yāvatatiyakā.

Bhikkhunīnaṁ ekādasa antarāyikā dhammā pucchitabbā.

Ekādasa cīvarāni adhiṭṭhātabbāni.

Ekādasa cīvarāni na vikappetabbāni.

Ekādase aruṇuggamane nissaggiyaṁ hoti.

Ekādasa gaṇṭhikā kappiyā.

Ekādasa vidhā kappiyā.

Ekādasa pathavī akappiyā.

Ekādasa pathavī kappiyā.

Ekādasa nissayapaṭippassaddhiyo.

Ekādasa puggalā avandiyā.

Ekādasa paramāni.

Ekādasa varāni yāciṁsu.

Ekādasa sīmādosā.

Akkosakaparibhāsake puggale ekādasādīnavā pāṭikaṅkhā.

Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṁsā pāṭikaṅkhā.

Sukhaṁ supati, sukhaṁ paṭibujjhati, na pāpakaṁ supinaṁ passati, manussānaṁ piyo hoti, amanussānaṁ piyo hoti, devatā rakkhanti, nāssa aggi vā visaṁ vā satthaṁ vā kamati, tuvaṭṭaṁ cittaṁ samādhiyati, mukhavaṇṇo vippasīdati, asammūḷho kālaṁ karoti, uttari appaṭivijjhanto brahmalokūpago hoti—

mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṁsā pāṭikaṅkhāti.

Ekādasakaṁ niṭṭhitaṁ.

Tassuddānaṁ

Nāsetabbā pādukā ca,

pattā ca cīvarāni ca;

Tatiyā pucchitabbā ca,

adhiṭṭhānavikappanā.

Aruṇā gaṇṭhikā vidhā,

akappiyā ca kappiyaṁ;

Nissayāvandiyā ceva,

paramāni varāni ca;

Sīmādosā ca akkosā,

mettāyekādasā katāti.

Ekuttarikaṁ.

Tassuddānaṁ

Ekakā ca dukā ceva,

tikā ca catupañcakā;

Chasattaṭṭhanavakā ca,

dasa ekādasāni ca.

Hitāya sabbasattānaṁ,

ñātadhammena tādinā;

Ekuttarikā vimalā,

mahāvīrena desitāti.

Ekuttarikaṁ niṭṭhitaṁ.