18. Vattakkhandhaka (PLI-TV-KD18)

12. Saddhivihārikavattakathā

Tena kho pana samayena upajjhāyā saddhivihārikesu na sammā vattanti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma upajjhāyā saddhivihārikesu na sammā vattissantī”ti.

Atha kho te bhikkhū bhagavato etamatthaṁ ārocesuṁ …pe…

“saccaṁ kira, bhikkhave, upajjhāyā saddhivihārikesu na sammā vattantī”ti?

“Saccaṁ, bhagavā”ti …pe…

vigarahitvā …pe…

dhammiṁ kathaṁ katvā bhikkhū āmantesi—

“Tena hi, bhikkhave, upajjhāyānaṁ saddhivihārikesu vattaṁ paññapessāmi yathā upajjhāyehi saddhivihārikesu sammā vattitabbaṁ.

Upajjhāyena, bhikkhave, saddhivihārikamhi sammā vattitabbaṁ.

Tatrāyaṁ sammāvattanā—

Upajjhāyena, bhikkhave, saddhivihāriko saṅgahetabbo anuggahetabbo uddesena paripucchāya ovādena anusāsaniyā.

Sace upajjhāyassa patto hoti, saddhivihārikassa patto na hoti, upajjhāyena saddhivihārikassa patto dātabbo, ussukkaṁ vā kātabbaṁ—

kinti nu kho saddhivihārikassa patto uppajjiyethāti.

Sace upajjhāyassa cīvaraṁ hoti, saddhivihārikassa cīvaraṁ na hoti, upajjhāyena saddhivihārikassa cīvaraṁ dātabbaṁ, ussukkaṁ vā kātabbaṁ—

kinti nu kho saddhivihārikassa cīvaraṁ uppajjiyethāti.

Sace upajjhāyassa parikkhāro hoti, saddhivihārikassa parikkhāro na hoti, upajjhāyena saddhivihārikassa parikkhāro dātabbo, ussukkaṁ vā kātabbaṁ—

kinti nu kho saddhivihārikassa parikkhāro uppajjiyethāti.

Sace saddhivihāriko gilāno hoti, kālasseva uṭṭhāya dantakaṭṭhaṁ dātabbaṁ, mukhodakaṁ dātabbaṁ, āsanaṁ paññapetabbaṁ.

Sace yāgu hoti, bhājanaṁ dhovitvā yāgu upanāmetabbā.

Yāguṁ pītassa udakaṁ datvā bhājanaṁ paṭiggahetvā nīcaṁ katvā sādhukaṁ appaṭighaṁsantena dhovitvā paṭisāmetabbaṁ.

Saddhivihārikamhi vuṭṭhite āsanaṁ uddharitabbaṁ.

Sace so deso uklāpo hoti, so deso sammajjitabbo.

Sace saddhivihāriko gāmaṁ pavisitukāmo hoti, nivāsanaṁ dātabbaṁ, paṭinivāsanaṁ paṭiggahetabbaṁ, kāyabandhanaṁ dātabbaṁ, saguṇaṁ katvā saṅghāṭiyo dātabbā, dhovitvā patto sodako dātabbo.

Ettāvatā nivattissatīti āsanaṁ paññapetabbaṁ, pādodakaṁ pādapīṭhaṁ pādakathalikaṁ upanikkhipitabbaṁ, paccuggantvā pattacīvaraṁ paṭiggahetabbaṁ, paṭinivāsanaṁ dātabbaṁ, nivāsanaṁ paṭiggahetabbaṁ.

Sace cīvaraṁ sinnaṁ hoti, muhuttaṁ uṇhe otāpetabbaṁ, na ca uṇhe cīvaraṁ nidahitabbaṁ.

Cīvaraṁ saṅgharitabbaṁ.

Cīvaraṁ saṅgharantena caturaṅgulaṁ kaṇṇaṁ ussāretvā cīvaraṁ saṅgharitabbaṁ—

mā majjhe bhaṅgo ahosīti.

Obhoge kāyabandhanaṁ kātabbaṁ.

Sace piṇḍapāto hoti, saddhivihāriko ca bhuñjitukāmo hoti, udakaṁ datvā piṇḍapāto upanāmetabbo.

Saddhivihāriko pānīyena pucchitabbo.

Bhuttāvissa udakaṁ datvā pattaṁ paṭiggahetvā nīcaṁ katvā sādhukaṁ appaṭighaṁsantena dhovitvā vodakaṁ katvā muhuttaṁ uṇhe otāpetabbo, na ca uṇhe patto nidahitabbo.

Pattacīvaraṁ nikkhipitabbaṁ.

Pattaṁ nikkhipantena ekena hatthena pattaṁ gahetvā ekena hatthena heṭṭhāmañcaṁ vā heṭṭhāpīṭhaṁ vā parāmasitvā patto nikkhipitabbo.

Na ca anantarahitāya bhūmiyā patto nikkhipitabbo.

Cīvaraṁ nikkhipantena ekena hatthena cīvaraṁ gahetvā ekena hatthena cīvaravaṁsaṁ vā cīvararajjuṁ vā pamajjitvā pārato antaṁ orato bhogaṁ katvā cīvaraṁ nikkhipitabbaṁ.

Saddhivihārikamhi vuṭṭhite āsanaṁ uddharitabbaṁ, pādodakaṁ pādapīṭhaṁ pādakathalikaṁ paṭisāmetabbaṁ.

Sace so deso uklāpo hoti, so deso sammajjitabbo.

Sace saddhivihāriko nahāyitukāmo hoti, nahānaṁ paṭiyādetabbaṁ.

Sace sītena attho hoti, sītaṁ paṭiyādetabbaṁ.

Sace uṇhena attho hoti, uṇhaṁ paṭiyādetabbaṁ.

Sace saddhivihāriko jantāgharaṁ pavisitukāmo hoti, cuṇṇaṁ sannetabbaṁ, mattikā temetabbā, jantāgharapīṭhaṁ ādāya gantvā jantāgharapīṭhaṁ datvā cīvaraṁ paṭiggahetvā ekamantaṁ nikkhipitabbaṁ, cuṇṇaṁ dātabbaṁ, mattikā dātabbā.

Sace ussahati jantāgharaṁ pavisitabbaṁ.

Jantāgharaṁ pavisantena mattikāya mukhaṁ makkhetvā purato ca pacchato ca paṭicchādetvā jantāgharaṁ pavisitabbaṁ.

Na there bhikkhū anupakhajja nisīditabbaṁ, na navā bhikkhū āsanena paṭibāhitabbā.

Jantāghare saddhivihārikassa parikammaṁ kātabbaṁ.

Jantāgharā nikkhamantena jantāgharapīṭhaṁ ādāya purato ca pacchato ca paṭicchādetvā jantāgharā nikkhamitabbaṁ.

Udakepi saddhivihārikassa parikammaṁ kātabbaṁ.

Nahātena paṭhamataraṁ uttaritvā attano gattaṁ vodakaṁ katvā nivāsetvā saddhivihārikassa gattato udakaṁ pamajjitabbaṁ, nivāsanaṁ dātabbaṁ, saṅghāṭi dātabbā, jantāgharapīṭhaṁ ādāya paṭhamataraṁ āgantvā āsanaṁ paññapetabbaṁ, pādodakaṁ pādapīṭhaṁ pādakathalikaṁ upanikkhipitabbaṁ.

Saddhivihāriko pānīyena pucchitabbo.

Yasmiṁ vihāre saddhivihāriko viharati, sace so vihāro uklāpo hoti, sace ussahati, sodhetabbo.

Vihāraṁ sodhentena paṭhamaṁ pattacīvaraṁ nīharitvā ekamantaṁ nikkhipitabbaṁ …pe…

sace ācamanakumbhiyā udakaṁ na hoti, ācamanakumbhiyā udakaṁ āsiñcitabbaṁ.

Sace saddhivihārikassa anabhirati uppannā hoti, upajjhāyena vūpakāsetabbo, vūpakāsāpetabbo, dhammakathā vāssa kātabbā.

Sace saddhivihārikassa kukkuccaṁ uppannaṁ hoti, upajjhāyena vinodetabbaṁ, vinodāpetabbaṁ, dhammakathā vāssa kātabbā.

Sace saddhivihārikassa diṭṭhigataṁ uppannaṁ hoti, upajjhāyena vivecetabbaṁ, vivecāpetabbaṁ, dhammakathā vāssa kātabbā.

Sace saddhivihāriko garudhammaṁ ajjhāpanno hoti parivāsāraho, upajjhāyena ussukkaṁ kātabbaṁ—

kinti nu kho saṅgho saddhivihārikassa parivāsaṁ dadeyyāti.

Sace saddhivihāriko mūlāyapaṭikassanāraho hoti, upajjhāyena ussukkaṁ kātabbaṁ—

kinti nu kho saṅgho saddhivihārikaṁ mūlāya paṭikasseyyāti.

Sace saddhivihāriko mānattāraho hoti, upajjhāyena ussukkaṁ kātabbaṁ—

kinti nu kho saṅgho saddhivihārikassa mānattaṁ dadeyyāti.

Sace saddhivihāriko abbhānāraho hoti, upajjhāyena ussukkaṁ kātabbaṁ—

kinti nu kho saṅgho saddhivihārikaṁ abbheyyāti.

Sace saṅgho saddhivihārikassa kammaṁ kattukāmo hoti, tajjanīyaṁ vā niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā, upajjhāyena ussukkaṁ kātabbaṁ—

kinti nu kho saṅgho saddhivihārikassa kammaṁ na kareyya, lahukāya vā pariṇāmeyyāti.

Kataṁ vā panassa hoti saṅghena kammaṁ, tajjanīyaṁ vā niyassaṁ vā pabbājanīyaṁ vā paṭisāraṇīyaṁ vā, ukkhepanīyaṁ vā, upajjhāyena ussukkaṁ kātabbaṁ—

kinti nu kho saddhivihāriko sammā vatteyya lomaṁ pāteyya, netthāraṁ vatteyya, saṅgho taṁ kammaṁ paṭippassambheyyāti.

Sace saddhivihārikassa cīvaraṁ dhovitabbaṁ hoti, upajjhāyena ācikkhitabbaṁ—evaṁ dhoveyyāsīti,

ussukkaṁ vā kātabbaṁ—kinti nu kho saddhivihārikassa cīvaraṁ dhoviyethāti.

Sace saddhivihārikassa cīvaraṁ kātabbaṁ hoti, upajjhāyena ācikkhitabbaṁ—evaṁ kareyyāsīti,

ussukkaṁ vā kātabbaṁ—kinti nu kho saddhivihārikassa cīvaraṁ kariyethāti.

Sace saddhivihārikassa rajanaṁ pacitabbaṁ hoti, upajjhāyena ācikkhitabbaṁ—evaṁ paceyyāsīti,

ussukkaṁ vā kātabbaṁ—kinti nu kho saddhivihārikassa rajanaṁ paciyethāti.

Sace saddhivihārikassa cīvaraṁ rajitabbaṁ hoti, upajjhāyena ācikkhitabbaṁ—evaṁ rajeyyāsīti,

ussukkaṁ vā kātabbaṁ—kinti nu kho saddhivihārikassa cīvaraṁ rajiyethāti.

Cīvaraṁ rajantena sādhukaṁ samparivattakaṁ samparivattakaṁ rajitabbaṁ, na ca acchinne theve pakkamitabbaṁ.

Sace saddhivihāriko gilāno hoti, yāvajīvaṁ upaṭṭhātabbo, vuṭṭhānamassa āgametabbaṁ.

Idaṁ kho, bhikkhave, upajjhāyānaṁ saddhivihārikesu vattaṁ yathā upajjhāyehi saddhivihārikesu sammā vattitabban”ti.

Dutiyabhāṇavāro niṭṭhito.

13. Ācariyavattakathā

Tena kho pana samayena antevāsikā ācariyesu na sammā vattanti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma antevāsikā ācariyesu na sammā vattissantī”ti.

Atha kho te bhikkhū bhagavato etamatthaṁ ārocesuṁ …pe…

“saccaṁ kira, bhikkhave, antevāsikā ācariyesu na sammā vattantī”ti?

“Saccaṁ, bhagavā”ti …pe…

vigarahitvā …pe…

dhammiṁ kathaṁ katvā bhikkhū āmantesi—

“Tena hi, bhikkhave, antevāsikānaṁ ācariyesu vattaṁ paññapessāmi yathā antevāsikehi ācariyesu sammā vattitabbaṁ.

Antevāsikena, bhikkhave, ācariyamhi sammā vattitabbaṁ.

Tatrāyaṁ sammāvattanā—

Kālasseva uṭṭhāya upāhanā omuñcitvā ekaṁsaṁ uttarāsaṅgaṁ karitvā dantakaṭṭhaṁ dātabbaṁ, mukhodakaṁ dātabbaṁ, āsanaṁ paññapetabbaṁ.

Sace yāgu hoti, bhājanaṁ dhovitvā yāgu upanāmetabbā.

Yāguṁ pītassa udakaṁ datvā bhājanaṁ paṭiggahetvā nīcaṁ katvā sādhukaṁ appaṭighaṁsantena dhovitvā paṭisāmetabbaṁ.

Ācariyamhi vuṭṭhite āsanaṁ uddharitabbaṁ.

Sace so deso uklāpo hoti, so deso sammajjitabbo.

Sace ācariyo gāmaṁ pavisitukāmo hoti, nivāsanaṁ dātabbaṁ, paṭinivāsanaṁ paṭiggahetabbaṁ, kāyabandhanaṁ dātabbaṁ, saguṇaṁ katvā saṅghāṭiyo dātabbā, dhovitvā patto sodako dātabbo.

Sace ācariyo pacchāsamaṇaṁ ākaṅkhati, timaṇḍalaṁ paṭicchādentena parimaṇḍalaṁ nivāsetvā kāyabandhanaṁ bandhitvā saguṇaṁ katvā saṅghāṭiyo pārupitvā gaṇṭhikaṁ paṭimuñcitvā dhovitvā pattaṁ gahetvā ācariyassa pacchāsamaṇena hotabbaṁ.

Nātidūre gantabbaṁ, nāccāsanne gantabbaṁ, pattapariyāpannaṁ paṭiggahetabbaṁ.

Na ācariyassa bhaṇamānassa antarantarā kathā opātetabbā.

Ācariyo āpattisāmantā bhaṇamāno nivāretabbo.

Nivattantena paṭhamataraṁ āgantvā āsanaṁ paññapetabbaṁ, pādodakaṁ pādapīṭhaṁ pādakathalikaṁ upanikkhipitabbaṁ, paccuggantvā pattacīvaraṁ paṭiggahetabbaṁ, paṭinivāsanaṁ dātabbaṁ, nivāsanaṁ paṭiggahetabbaṁ.

Sace cīvaraṁ sinnaṁ hoti, muhuttaṁ uṇhe otāpetabbaṁ, na ca uṇhe cīvaraṁ nidahitabbaṁ.

Cīvaraṁ saṅgharitabbaṁ.

Cīvaraṁ saṅgharantena caturaṅgulaṁ kaṇṇaṁ ussāretvā cīvaraṁ saṅgharitabbaṁ—

mā majjhe bhaṅgo ahosīti.

Obhoge kāyabandhanaṁ kātabbaṁ.

Sace piṇḍapāto hoti, ācariyo ca bhuñjitukāmo hoti, udakaṁ datvā piṇḍapāto upanāmetabbo.

Ācariyo pānīyena pucchitabbo.

Bhuttāvissa udakaṁ datvā pattaṁ paṭiggahetvā nīcaṁ katvā sādhukaṁ appaṭighaṁsantena dhovitvā vodakaṁ katvā muhuttaṁ uṇhe otāpetabbo, na ca uṇhe patto nidahitabbo.

Pattacīvaraṁ nikkhipitabbaṁ.

Pattaṁ nikkhipantena ekena hatthena pattaṁ gahetvā ekena hatthena heṭṭhāmañcaṁ vā heṭṭhāpīṭhaṁ vā parāmasitvā patto nikkhipitabbo.

Na ca anantarahitāya bhūmiyā patto nikkhipitabbo.

Cīvaraṁ nikkhipantena ekena hatthena cīvaraṁ gahetvā ekena hatthena cīvaravaṁsaṁ vā cīvararajjuṁ vā pamajjitvā pārato antaṁ orato bhogaṁ katvā cīvaraṁ nikkhipitabbaṁ.

Ācariyamhi vuṭṭhite āsanaṁ uddharitabbaṁ, pādodakaṁ pādapīṭhaṁ pādakathalikaṁ paṭisāmetabbaṁ.

Sace so deso uklāpo hoti, so deso sammajjitabbo.

Sace ācariyo nahāyitukāmo hoti, nahānaṁ paṭiyādetabbaṁ.

Sace sītena attho hoti, sītaṁ paṭiyādetabbaṁ.

Sace uṇhena attho hoti, uṇhaṁ paṭiyādetabbaṁ.

Sace ācariyo jantāgharaṁ pavisitukāmo hoti, cuṇṇaṁ sannetabbaṁ, mattikā temetabbā, jantāgharapīṭhaṁ ādāya ācariyassa piṭṭhito piṭṭhito gantvā jantāgharapīṭhaṁ datvā cīvaraṁ paṭiggahetvā ekamantaṁ nikkhipitabbaṁ, cuṇṇaṁ dātabbaṁ, mattikā dātabbā.

Sace ussahati, jantāgharaṁ pavisitabbaṁ.

Jantāgharaṁ pavisantena mattikāya mukhaṁ makkhetvā purato ca pacchato ca paṭicchādetvā jantāgharaṁ pavisitabbaṁ.

Na there bhikkhū anupakhajja nisīditabbaṁ.

Na navā bhikkhū āsanena paṭibāhitabbā.

Jantāghare ācariyassa parikammaṁ kātabbaṁ.

Jantāgharā nikkhamantena jantāgharapīṭhaṁ ādāya purato ca pacchato ca paṭicchādetvā jantāgharā nikkhamitabbaṁ.

Udakepi ācariyassa parikammaṁ kātabbaṁ.

Nahātena paṭhamataraṁ uttaritvā attano gattaṁ vodakaṁ katvā nivāsetvā ācariyassa gattato udakaṁ pamajjitabbaṁ, nivāsanaṁ dātabbaṁ, saṅghāṭi dātabbā, jantāgharapīṭhaṁ ādāya paṭhamataraṁ āgantvā āsanaṁ paññapetabbaṁ, pādodakaṁ pādapīṭhaṁ pādakathalikaṁ upanikkhipitabbaṁ.

Ācariyo pānīyena pucchitabbo.

Sace uddisāpetukāmo hoti, uddisitabbo.

Sace paripucchitukāmo hoti, paripucchitabbo.

Yasmiṁ vihāre ācariyo viharati, sace so vihāro uklāpo hoti, sace ussahati, sodhetabbo.

Vihāraṁ sodhentena paṭhamaṁ pattacīvaraṁ nīharitvā ekamantaṁ nikkhipitabbaṁ;

nisīdanapaccattharaṇaṁ nīharitvā ekamantaṁ nikkhipitabbaṁ;

bhisibibbohanaṁ nīharitvā ekamantaṁ nikkhipitabbaṁ;

mañco nīcaṁ katvā sādhukaṁ appaṭighaṁsantena asaṅghaṭṭentena kavāṭapiṭṭhaṁ, nīharitvā ekamantaṁ nikkhipitabbo;

pīṭhaṁ nīcaṁ katvā sādhukaṁ appaṭighaṁsantena, asaṅghaṭṭentena kavāṭapiṭṭhaṁ, nīharitvā ekamantaṁ nikkhipitabbaṁ;

mañcapaṭipādakā nīharitvā ekamantaṁ nikkhipitabbā;

kheḷamallako nīharitvā ekamantaṁ nikkhipitabbo;

apassenaphalakaṁ nīharitvā ekamantaṁ nikkhipitabbaṁ;

bhūmattharaṇaṁ yathāpaññattaṁ sallakkhetvā nīharitvā ekamantaṁ nikkhipitabbaṁ.

Sace vihāre santānakaṁ hoti, ullokā paṭhamaṁ ohāretabbaṁ, ālokasandhikaṇṇabhāgā pamajjitabbā.

Sace gerukaparikammakatā bhitti kaṇṇakitā hoti, coḷakaṁ temetvā pīḷetvā pamajjitabbā.

Sace kāḷavaṇṇakatā bhūmi kaṇṇakitā hoti, coḷakaṁ temetvā pīḷetvā pamajjitabbā.

Sace akatā hoti bhūmi, udakena paripphositvā paripphositvā sammajjitabbā—

mā vihāro rajena uhaññīti.

Saṅkāraṁ vicinitvā ekamantaṁ chaḍḍetabbaṁ.

Bhūmattharaṇaṁ otāpetvā sodhetvā papphoṭetvā atiharitvā yathāpaññattaṁ paññapetabbaṁ.

Mañcapaṭipādakā otāpetvā pamajjitvā atiharitvā yathāṭhāne ṭhapetabbā.

Mañco otāpetvā sodhetvā papphoṭetvā nīcaṁ katvā sādhukaṁ appaṭighaṁsantena, asaṅghaṭṭentena kavāṭapiṭṭhaṁ, atiharitvā yathāpaññattaṁ paññapetabbo.

Pīṭhaṁ otāpetvā sodhetvā papphoṭetvā nīcaṁ katvā sādhukaṁ appaṭighaṁsantena, asaṅghaṭṭentena kavāṭapiṭṭhaṁ, atiharitvā yathāpaññattaṁ paññapetabbaṁ.

Bhisibibbohanaṁ otāpetvā sodhetvā papphoṭetvā atiharitvā yathāpaññattaṁ paññapetabbaṁ.

Nisīdanapaccattharaṇaṁ otāpetvā sodhetvā papphoṭetvā atiharitvā yathāpaññattaṁ paññapetabbaṁ.

Kheḷamallako otāpetvā pamajjitvā atiharitvā yathāṭhāne ṭhapetabbo.

Apassenaphalakaṁ otāpetvā pamajjitvā atiharitvā yathāṭhāne ṭhapetabbaṁ.

Pattacīvaraṁ nikkhipitabbaṁ.

Pattaṁ nikkhipantena ekena hatthena pattaṁ gahetvā ekena hatthena heṭṭhāmañcaṁ vā heṭṭhāpīṭhaṁ vā parāmasitvā patto nikkhipitabbo.

Na ca anantarahitāya bhūmiyā patto nikkhipitabbo.

Cīvaraṁ nikkhipantena ekena hatthena cīvaraṁ gahetvā ekena hatthena cīvaravaṁsaṁ vā cīvararajjuṁ vā pamajjitvā pārato antaṁ orato bhogaṁ katvā cīvaraṁ nikkhipitabbaṁ.

Sace puratthimā sarajā vātā vāyanti, puratthimā vātapānā thaketabbā.

Sace pacchimā sarajā vātā vāyanti, pacchimā vātapānā thaketabbā.

Sace uttarā sarajā vātā vāyanti, uttarā vātapānā thaketabbā.

Sace dakkhiṇā sarajā vātā vāyanti, dakkhiṇā vātapānā thaketabbā.

Sace sītakālo hoti, divā vātapānā vivaritabbā, rattiṁ thaketabbā.

Sace uṇhakālo hoti, divā vātapānā thaketabbā, rattiṁ vivaritabbā.

Sace pariveṇaṁ uklāpaṁ hoti, pariveṇaṁ sammajjitabbaṁ.

Sace koṭṭhako uklāpo hoti, koṭṭhako sammajjitabbo.

Sace upaṭṭhānasālā uklāpā hoti, upaṭṭhānasālā sammajjitabbā.

Sace aggisālā uklāpā hoti, aggisālā sammajjitabbā.

Sace vaccakuṭi uklāpā hoti, vaccakuṭi sammajjitabbā.

Sace pānīyaṁ na hoti, pānīyaṁ upaṭṭhāpetabbaṁ.

Sace paribhojanīyaṁ na hoti, paribhojanīyaṁ upaṭṭhāpetabbaṁ.

Sace ācamanakumbhiyā udakaṁ na hoti, ācamanakumbhiyā udakaṁ āsiñcitabbaṁ.

Sace ācariyassa anabhirati uppannā hoti, antevāsikena vūpakāsetabbo, vūpakāsāpetabbo, dhammakathā vāssa kātabbā.

Sace ācariyassa kukkuccaṁ uppannaṁ hoti, antevāsikena vinodetabbaṁ, vinodāpetabbaṁ, dhammakathā vāssa kātabbā.

Sace ācariyassa diṭṭhigataṁ uppannaṁ hoti, antevāsikena vivecetabbaṁ, vivecāpetabbaṁ, dhammakathā vāssa kātabbā.

Sace ācariyo garudhammaṁ ajjhāpanno hoti, parivāsāraho, antevāsikena ussukkaṁ kātabbaṁ—

kinti nu kho saṅgho ācariyassa parivāsaṁ dadeyyāti.

Sace ācariyo mūlāyapaṭikassanāraho hoti, antevāsikena ussukkaṁ kātabbaṁ—

kinti nu kho saṅgho ācariyaṁ mūlāya paṭikasseyyāti.

Sace ācariyo mānattāraho hoti, antevāsikena ussukkaṁ kātabbaṁ—

kinti nu kho saṅgho ācariyassa mānattaṁ dadeyyāti.

Sace ācariyo abbhānāraho hoti, antevāsikena ussukkaṁ kātabbaṁ—

kinti nu kho saṅgho ācariyaṁ abbheyyāti.

Sace saṅgho ācariyassa kammaṁ kattukāmo hoti, tajjanīyaṁ vā niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā, antevāsikena ussukkaṁ kātabbaṁ—

kinti nu kho saṅgho ācariyassa kammaṁ na kareyya, lahukāya vā pariṇāmeyyāti.

Kataṁ vā panassa hoti saṅghena kammaṁ, tajjanīyaṁ vā niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā, antevāsikena ussukkaṁ kātabbaṁ—

kinti nu kho ācariyo sammā vatteyya, lomaṁ pāteyya, netthāraṁ vatteyya, saṅgho taṁ kammaṁ paṭippassambheyyāti.

Sace ācariyassa cīvaraṁ dhovitabbaṁ hoti, antevāsikena dhovitabbaṁ, ussukkaṁ vā kātabbaṁ—

kinti nu kho ācariyassa cīvaraṁ dhoviyethāti.

Sace ācariyassa cīvaraṁ kātabbaṁ hoti, antevāsikena kātabbaṁ, ussukkaṁ vā kātabbaṁ—

kinti nu kho ācariyassa cīvaraṁ kariyethāti.

Sace ācariyassa rajanaṁ pacitabbaṁ hoti, antevāsikena pacitabbaṁ, ussukkaṁ vā kātabbaṁ—

kinti nu kho ācariyassa rajanaṁ paciyethāti.

Sace ācariyassa cīvaraṁ rajitabbaṁ hoti, antevāsikena rajitabbaṁ, ussukkaṁ vā kātabbaṁ—

kinti nu kho ācariyassa cīvaraṁ rajiyethāti.

Cīvaraṁ rajantena sādhukaṁ samparivattakaṁ samparivattakaṁ rajitabbaṁ, na ca acchinne theve pakkamitabbaṁ.

Na ācariyaṁ anāpucchā ekaccassa patto dātabbo, na ekaccassa patto paṭiggahetabbo;

na ekaccassa cīvaraṁ dātabbaṁ, na ekaccassa cīvaraṁ paṭiggahetabbaṁ;

na ekaccassa parikkhāro dātabbo, na ekaccassa parikkhāro paṭiggahetabbo;

na ekaccassa kesā cheditabbā, na ekaccena kesā chedāpetabbā;

na ekaccassa parikammaṁ kātabbaṁ, na ekaccena parikammaṁ kārāpetabbaṁ;

na ekaccassa veyyāvacco kātabbo, na ekaccena veyyāvacco kārāpetabbo;

na ekaccassa pacchāsamaṇena hotabbaṁ, na ekacco pacchāsamaṇo ādātabbo;

na ekaccassa piṇḍapāto nīharitabbo, na ekaccena piṇḍapāto nīharāpetabbo;

na ācariyaṁ anāpucchā gāmo pavisitabbo;

na susānaṁ gantabbaṁ;

na disā pakkamitabbā.

Sace ācariyo gilāno hoti, yāvajīvaṁ upaṭṭhātabbo, vuṭṭhānamassa āgametabbaṁ.

Idaṁ kho, bhikkhave, antevāsikānaṁ ācariyesu vattaṁ yathā antevāsikehi ācariyesu sammā vattitabban”ti.

14. Antevāsikavattakathā

Tena kho pana samayena ācariyā antevāsikesu na sammā vattanti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma ācariyā antevāsikesu na sammā vattissantī”ti.

Atha kho te bhikkhū bhagavato etamatthaṁ ārocesuṁ.

Atha kho bhagavā etasmiṁ nidāne etasmiṁ pakaraṇe bhikkhusaṅghaṁ sannipātāpetvā bhikkhū paṭipucchi—

“saccaṁ kira, bhikkhave, ācariyā antevāsikesu na sammā vattantī”ti?

“Saccaṁ, bhagavā”ti …pe…

vigarahitvā …pe…

dhammiṁ kathaṁ katvā bhikkhū āmantesi—

“Tena hi, bhikkhave, ācariyānaṁ antevāsikesu vattaṁ paññapessāmi yathā ācariyehi antevāsikesu sammā vattitabbaṁ.

Ācariyena, bhikkhave, antevāsikamhi sammā vattitabbaṁ.

Tatrāyaṁ sammāvattanā—

Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā.

Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṁ vā kātabbaṁ—

kinti nu kho antevāsikassa patto uppajjiyethāti.

Sace ācariyassa cīvaraṁ hoti, antevāsikassa cīvaraṁ na hoti, ācariyena antevāsikassa cīvaraṁ dātabbaṁ, ussukkaṁ vā kātabbaṁ—

kinti nu kho antevāsikassa cīvaraṁ uppajjiyethāti.

Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṁ vā kātabbaṁ—

kinti nu kho antevāsikassa parikkhāro uppajjiyethāti.

Sace antevāsiko gilāno hoti, kālasseva uṭṭhāya dantakaṭṭhaṁ dātabbaṁ, mukhodakaṁ dātabbaṁ, āsanaṁ paññapetabbaṁ.

Sace yāgu hoti, bhājanaṁ dhovitvā yāgu upanāmetabbā.

Yāguṁ pītassa udakaṁ datvā bhājanaṁ paṭiggahetvā nīcaṁ katvā sādhukaṁ appaṭighaṁsantena dhovitvā paṭisāmetabbaṁ.

Antevāsikamhi vuṭṭhite āsanaṁ uddharitabbaṁ.

Sace so deso uklāpo hoti, so deso sammajjitabbo.

Sace antevāsiko gāmaṁ pavisitukāmo hoti, nivāsanaṁ dātabbaṁ, paṭinivāsanaṁ paṭiggahetabbaṁ, kāyabandhanaṁ dātabbaṁ, saguṇaṁ katvā saṅghāṭiyo dātabbā, dhovitvā patto sodako dātabbo.

Ettāvatā nivattissatīti āsanaṁ paññapetabbaṁ, pādodakaṁ pādapīṭhaṁ pādakathalikaṁ upanikkhipitabbaṁ, paccuggantvā pattacīvaraṁ paṭiggahetabbaṁ, paṭinivāsanaṁ dātabbaṁ, nivāsanaṁ paṭiggahetabbaṁ.

Sace cīvaraṁ sinnaṁ hoti, muhuttaṁ uṇhe otāpetabbaṁ, na ca uṇhe cīvaraṁ nidahitabbaṁ.

Cīvaraṁ saṅgharitabbaṁ.

Cīvaraṁ saṅgharantena caturaṅgulaṁ kaṇṇaṁ ussāretvā cīvaraṁ saṅgharitabbaṁ—

mā majjhe bhaṅgo ahosīti.

Obhoge kāyabandhanaṁ kātabbaṁ.

Sace piṇḍapāto hoti, antevāsiko ca bhuñjitukāmo hoti, udakaṁ datvā piṇḍapāto upanāmetabbo.

Antevāsiko pānīyena pucchitabbo.

Bhuttāvissa udakaṁ datvā pattaṁ paṭiggahetvā nīcaṁ katvā sādhukaṁ appaṭighaṁsantena dhovitvā vodakaṁ katvā muhuttaṁ uṇhe otāpetabbo, na ca uṇhe patto nidahitabbo.

Pattacīvaraṁ nikkhipitabbaṁ.

Pattaṁ nikkhipantena …pe…

cīvaraṁ nikkhipantena …pe…

pārato antaṁ orato bhogaṁ katvā cīvaraṁ nikkhipitabbaṁ.

Antevāsikamhi uṭṭhite āsanaṁ uddharitabbaṁ, pādodakaṁ pādapīṭhaṁ pādakathalikaṁ paṭisāmetabbaṁ.

Sace so deso uklāpo hoti, so deso sammajjitabbo.

Sace antevāsiko nahāyitukāmo hoti, nahānaṁ paṭiyādetabbaṁ.

Sace sītena attho hoti, sītaṁ paṭiyādetabbaṁ.

Sace uṇhena attho hoti, uṇhaṁ paṭiyādetabbaṁ.

Sace antevāsiko jantāgharaṁ pavisitukāmo hoti, cuṇṇaṁ sannetabbaṁ, mattikā temetabbā, jantāgharapīṭhaṁ ādāya gantvā jantāgharapīṭhaṁ datvā cīvaraṁ paṭiggahetvā ekamantaṁ nikkhipitabbaṁ, cuṇṇaṁ dātabbaṁ, mattikā dātabbā.

Sace ussahati jantāgharaṁ pavisitabbaṁ.

Jantāgharaṁ pavisantena mattikāya mukhaṁ makkhetvā purato ca pacchato ca paṭicchādetvā jantāgharaṁ pavisitabbaṁ.

Na there bhikkhū anupakhajja nisīditabbaṁ.

Na navā bhikkhū āsanena paṭibāhitabbā.

Jantāghare antevāsikassa parikammaṁ kātabbaṁ.

Jantāgharā nikkhamantena jantāgharapīṭhaṁ ādāya purato ca pacchato ca paṭicchādetvā jantāgharā nikkhamitabbaṁ.

Udakepi antevāsikassa parikammaṁ kātabbaṁ.

Nahātena paṭhamataraṁ uttaritvā attano gattaṁ vodakaṁ katvā nivāsetvā antevāsikassa gattato udakaṁ pamajjitabbaṁ, nivāsanaṁ dātabbaṁ, saṅghāṭi dātabbā, jantāgharapīṭhaṁ ādāya paṭhamataraṁ āgantvā āsanaṁ paññapetabbaṁ, pādodakaṁ pādapīṭhaṁ pādakathalikaṁ upanikkhipitabbaṁ, antevāsiko pānīyena pucchitabbo.

Yasmiṁ vihāre antevāsiko viharati, sace so vihāro uklāpo hoti, sace ussahati, sodhetabbo.

Vihāraṁ sodhentena paṭhamaṁ pattacīvaraṁ nīharitvā ekamantaṁ nikkhipitabbaṁ

…pe…

ācamanakumbhiyā udakaṁ na hoti, ācamanakumbhiyā udakaṁ āsiñcitabbaṁ.

Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā.

Sace antevāsikassa kukkuccaṁ uppannaṁ hoti, ācariyena vinodetabbaṁ, vinodāpetabbaṁ, dhammakathā vāssa kātabbā.

Sace antevāsikassa diṭṭhigataṁ uppannaṁ hoti, ācariyena vivecetabbaṁ, vivecāpetabbaṁ, dhammakathā vāssa kātabbā.

Sace antevāsiko garudhammaṁ ajjhāpanno hoti, parivāsāraho, ācariyena ussukkaṁ kātabbaṁ—

kinti nu kho saṅgho antevāsikassa parivāsaṁ dadeyyāti.

Sace antevāsiko mūlāyapaṭikassanāraho hoti, ācariyena ussukkaṁ kātabbaṁ—

kinti nu kho saṅgho antevāsikaṁ mūlāya paṭikasseyyāti.

Sace antevāsiko mānattāraho hoti, ācariyena ussukkaṁ kātabbaṁ—

kinti nu kho saṅgho antevāsikassa mānattaṁ dadeyyāti.

Sace antevāsiko abbhānāraho hoti, ācariyena ussukkaṁ kātabbaṁ—

kinti nu kho saṅgho antevāsikaṁ abbheyyāti.

Sace saṅgho antevāsikassa kammaṁ kattukāmo hoti, tajjanīyaṁ vā niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā, ācariyena ussukkaṁ kātabbaṁ—

kinti nu kho saṅgho antevāsikassa kammaṁ na kareyya, lahukāya vā pariṇāmeyyāti.

Kataṁ vā panassa hoti, saṅghena kammaṁ, tajjanīyaṁ vā niyassaṁ vā pabbājanīyaṁ vā paṭisāraṇīyaṁ vā ukkhepanīyaṁ vā, ācariyena ussukkaṁ kātabbaṁ—

kinti nu kho antevāsiko sammā vatteyya, lomaṁ pāteyya, netthāraṁ vatteyya, saṅgho taṁ kammaṁ paṭippassambheyyāti.

Sace antevāsikassa cīvaraṁ dhovitabbaṁ hoti, ācariyena ācikkhitabbaṁ—evaṁ dhoveyyāsīti,

ussukkaṁ vā kātabbaṁ—kinti nu kho antevāsikassa cīvaraṁ dhoviyethāti.

Sace antevāsikassa cīvaraṁ kātabbaṁ hoti, ācariyena ācikkhitabbaṁ—evaṁ kareyyāsīti,

ussukkaṁ vā kātabbaṁ—kinti nu kho antevāsikassa cīvaraṁ kariyethāti.

Sace antevāsikassa rajanaṁ pacitabbaṁ hoti, ācariyena ācikkhitabbaṁ—evaṁ paceyyāsīti,

ussukkaṁ vā kātabbaṁ—kinti nu kho antevāsikassa rajanaṁ paciyethāti.

Sace antevāsikassa cīvaraṁ rajitabbaṁ hoti, ācariyena ācikkhitabbaṁ—evaṁ rajeyyāsīti,

ussukkaṁ vā kātabbaṁ—kinti nu kho antevāsikassa cīvaraṁ rajiyethāti.

Cīvaraṁ rajantena sādhukaṁ samparivattakaṁ samparivattakaṁ rajitabbaṁ.

Na ca acchinne theve pakkamitabbaṁ.

Sace antevāsiko gilāno hoti, yāvajīvaṁ upaṭṭhātabbo, vuṭṭhānamassa āgametabbaṁ.

Idaṁ kho, bhikkhave, ācariyānaṁ antevāsikesu vattaṁ yathā ācariyehi antevāsikesu sammā vattitabban”ti.

Vattakkhandhako aṭṭhamo. Imamhi khandhake vatthū ekūnavīsati, vattā cuddasa.

Tassuddānaṁ

Saupāhanā chattā ca,

oguṇṭhi sīsaṁ pānīyaṁ;

Nābhivāde na pucchanti,

ahi ujjhanti pesalā.

Omuñci chattaṁ khandhe ca,

atarañca paṭikkamaṁ;

Pattacīvaraṁ nikkhipā,

patirūpañca pucchitā.

Āsiñceyya dhovitena,

sukkhenallenupāhanā;

Vuḍḍho navako puccheyya,

ajjhāvuṭṭhañca gocarā.

Sekkhā vaccā pānī pari,

kattaraṁ katikaṁ tato;

Kālaṁ muhuttaṁ uklāpo,

bhūmattharaṇaṁ nīhare.

Paṭipādo bhisibibbo,

mañcapīṭhañca mallakaṁ;

Apassenullokakaṇṇā,

gerukā kāḷa akatā.

Saṅkārañca bhūmattharaṇaṁ,

paṭipādakaṁ mañcapīṭhaṁ;

Bhisi nisīdanampi,

mallakaṁ apassena ca.

Pattacīvaraṁ bhūmi ca,

pārantaṁ orato bhogaṁ;

Puratthimā pacchimā ca,

uttarā atha dakkhiṇā.

Sītuṇhe ca divārattiṁ,

pariveṇañca koṭṭhako;

Upaṭṭhānaggi sālā ca,

vattaṁ vaccakuṭīsu ca.

Pānī paribhojaniyā,

kumbhi ācamanesu ca;

Anopamena paññattaṁ,

vattaṁ āgantukehime.

Nevāsanaṁ na udakaṁ,

na paccu na ca pāniyaṁ;

Nābhivāde na paññape,

ujjhāyanti ca pesalā.

Vuḍḍhāsanañca udakaṁ,

paccuggantvā ca pāniyaṁ;

Upāhane ekamantaṁ,

abhivāde ca paññape.

Vutthaṁ gocarasekkho ca,

ṭhānaṁ pāniyabhojanaṁ;

Kattaraṁ katikaṁ kālaṁ,

navakassa nisinnake.

Abhivādaye ācikkhe,

yathā heṭṭhā tathā naye;

Niddiṭṭhaṁ satthavāhena,

vattaṁ āvāsikehime.

Gamikā dārumatti ca,

vivaritvā na pucchiya;

Nassanti ca aguttañca,

ujjhāyanti ca pesalā.

Paṭisāmetvā thaketvā,

āpucchitvāva pakkame;

Bhikkhu vā sāmaṇero vā,

ārāmiko upāsako.

Pāsāṇakesu ca puñjaṁ,

paṭisāme thakeyya ca;

Sace ussahati ussukkaṁ,

anovasse tatheva ca.

Sabbo ovassati gāmaṁ,

ajjhokāse tatheva ca;

Appevaṅgāni seseyyuṁ,

vattaṁ gamikabhikkhunā.

Nānumodanti therena,

ohāya catupañcahi;

Vaccito mucchito āsi,

vattānumodanesume.

Chabbaggiyā dunnivatthā,

athopi ca duppārutā;

Anākappā ca vokkamma,

there anupakhajjane.

Nave bhikkhū ca saṅghāṭi,

ujjhāyanti ca pesalā;

Timaṇḍalaṁ nivāsetvā,

kāyasaguṇagaṇṭhikā.

Na vokkamma paṭicchannaṁ,

susaṁvutokkhittacakkhu;

Ukkhittojjagghikāsaddo,

tayo ceva pacālanā.

Khambhoguṇṭhiukkuṭikā,

paṭicchannaṁ susaṁvuto;

Okkhittukkhittaujjagghi,

appasaddo tayo calā.

Khambhoguṇṭhipallatthi ca,

anupakhajja nāsane;

Ottharitvāna udake,

nīcaṁ katvāna siñciyā.

Paṭi sāmantā saṅghāṭi,

odane ca paṭiggahe;

Sūpaṁ uttaribhaṅgena,

sabbesaṁ samatitthi ca.

Sakkaccaṁ pattasaññī ca,

sapadānañca sūpakaṁ;

Na thūpato paṭicchāde,

viññattujjhānasaññinā.

Mahantamaṇḍaladvāraṁ,

sabbahattho na byāhare;

Ukkhepo chedanāgaṇḍa,

dhunaṁ sitthāvakārakaṁ.

Jivhānicchārakañceva,

capucapu surusuru;

Hatthapattoṭṭhanillehaṁ,

sāmisena paṭiggahe.

Yāva na sabbe udake,

nīcaṁ katvāna siñciyaṁ;

Paṭi sāmantā saṅghāṭi,

nīcaṁ katvā chamāya ca.

Sasitthakaṁ nivattante,

suppaṭicchannamukkuṭi;

Dhammarājena paññattaṁ,

idaṁ bhattaggavattanaṁ.

Dunnivatthā anākappā,

asallakkhetvā ca sahasā;

Dūre acca ciraṁ lahuṁ,

tatheva piṇḍacāriko.

Paṭicchannova gaccheyya,

susaṁvutokkhittacakkhu;

Ukkhittojjagghikāsaddo,

tayo ceva pacālanā.

Khambhoguṇṭhiukkuṭikā,

sallakkhetvā ca sahasā;

Dūre acca ciraṁ lahuṁ,

āsanakaṁ kaṭacchukā.

Bhājanaṁ vā ṭhapeti ca,

uccāretvā paṇāmetvā;

Paṭiggahe na ulloke,

sūpesupi tatheva taṁ.

Bhikkhu saṅghāṭiyā chāde,

paṭicchanneva gacchiyaṁ;

Saṁvutokkhittacakkhu ca,

ukkhittojjagghikāya ca;

Appasaddo tayo cālā,

khambhoguṇṭhikaukkuṭi.

Paṭhamāsanavakkāra,

pāniyaṁ paribhojanī;

Pacchākaṅkhati bhuñjeyya,

opilāpeyya uddhare.

Paṭisāmeyya sammajje,

rittaṁ tucchaṁ upaṭṭhape;

Hatthavikāre bhindeyya,

vattidaṁ piṇḍacārike.

Pānī pari aggiraṇi,

nakkhattadisacorā ca;

Sabbaṁ natthīti koṭṭetvā,

pattaṁse cīvaraṁ tato.

Idāni aṁse laggetvā,

timaṇḍalaṁ parimaṇḍalaṁ;

Yathā piṇḍacārivattaṁ,

naye āraññakesupi.

Pattaṁse cīvaraṁ sīse,

ārohitvā ca pāniyaṁ;

Paribhojaniyaṁ aggi,

araṇī cāpi kattaraṁ.

Nakkhattaṁ sappadesaṁ vā,

disāpi kusalo bhave;

Sattuttamena paññattaṁ,

vattaṁ āraññakesume.

Ajjhokāse okiriṁsu,

ujjhāyanti ca pesalā;

Sace vihāro uklāpo,

paṭhamaṁ pattacīvaraṁ.

Bhisibibbohanaṁ mañcaṁ,

pīṭhañca kheḷamallakaṁ;

Apassenullokakaṇṇā,

gerukā kāḷa akatā.

Saṅkāraṁ bhikkhusāmantā,

senāvihārapāniyaṁ;

Paribhojanasāmantā,

paṭivāte ca aṅgaṇe.

Adhovāte attharaṇaṁ,

paṭipādakamañco ca;

Pīṭhaṁ bhisi nisīdanaṁ,

mallakaṁ apassena ca.

Pattacīvaraṁ bhūmi ca,

pārantaṁ orato bhogaṁ;

Puratthimā ca pacchimā,

uttarā atha dakkhiṇā.

Sītuṇhe ca divā rattiṁ,

pariveṇañca koṭṭhako;

Upaṭṭhānaggisālā ca,

vaccakuṭī ca pāniyaṁ.

Ācamanakumbhi vuḍḍhe ca,

uddesapucchanā sajjhā;

Dhammo padīpaṁ vijjhāpe,

na vivare napi thake.

Yena vuḍḍho parivatti,

kaṇṇenapi na ghaṭṭaye;

Paññapesi mahāvīro,

vattaṁ senāsanesu taṁ.

Nivāriyamānā dvāraṁ,

mucchitujjhanti pesalā;

Chārikaṁ chaḍḍaye jantā,

paribhaṇḍaṁ tatheva ca.

Pariveṇaṁ koṭṭhako sālā,

cuṇṇamattikadoṇikā;

Mukhaṁ purato na there,

na nave ussahati sace.

Purato uparimaggo,

cikkhallaṁ matti pīṭhakaṁ;

Vijjhāpetvā thaketvā ca,

vattaṁ jantāgharesume.

Nācameti yathāvuḍḍhaṁ,

paṭipāṭi ca sahasā;

Ubbhaji nitthuno kaṭṭhaṁ,

vaccaṁ passāva kheḷakaṁ.

Pharusā kūpa sahasā,

ubbhaji capu sesena;

Bahi anto ca ukkāse,

rajju ataramānañca.

Sahasā ubbhaji ṭhite,

nitthune kaṭṭha vaccañca;

Passāva kheḷa pharusā,

kūpañca vaccapāduke.

Nātisahasā ubbhaji,

pādukāya capucapu;

Na sesaye paṭicchāde,

uhatapidharena ca.

Vaccakuṭī paribhaṇḍaṁ,

pariveṇañca koṭṭhako;

Ācamane ca udakaṁ,

vattaṁ vaccakuṭīsume.

Upāhanā dantakaṭṭhaṁ,

mukhodakañca āsanaṁ;

Yāgu udakaṁ dhovitvā,

uddhāruklāpa gāma ca.

Nivāsanā kāyabandhā,

saguṇaṁ pattasodakaṁ;

Pacchā timaṇḍalo ceva,

parimaṇḍala bandhanaṁ.

Saguṇaṁ dhovitvā pacchā,

nātidūre paṭiggahe;

Bhaṇamānassa āpatti,

paṭhamāgantvāna āsanaṁ.

Udakaṁ pīṭhakathali,

paccuggantvā nivāsanaṁ;

Otāpe nidahi bhaṅgo,

obhoge bhuñjitu name.

Pānīyaṁ udakaṁ nīcaṁ,

muhuttaṁ na ca nidahe;

Pattacīvaraṁ bhūmi ca,

pārantaṁ orato bhogaṁ.

Uddhare paṭisāme ca,

uklāpo ca nahāyituṁ;

Sītaṁ uṇhaṁ jantāgharaṁ,

cuṇṇaṁ mattika piṭṭhito.

Pīṭhañca cīvaraṁ cuṇṇaṁ,

mattikussahati mukhaṁ;

Purato there nave ca,

parikammañca nikkhame.

Purato udake nhāte,

nivāsetvā upajjhāyaṁ;

Nivāsanañca saṅghāṭi,

pīṭhakaṁ āsanena ca.

Pādo pīṭhaṁ kathaliñca,

pānīyuddesapucchanā;

Uklāpaṁ susodheyya,

paṭhamaṁ pattacīvaraṁ.

Nisīdanapaccattharaṇaṁ,

bhisi bibbohanāni ca;

Mañco pīṭhaṁ paṭipādaṁ,

mallakaṁ apassena ca.

Bhūma santāna āloka,

gerukā kāḷa akatā;

Bhūmattharapaṭipādā,

mañco pīṭhaṁ bibbohanaṁ.

Nisīdattharaṇaṁ kheḷa,

apasse pattacīvaraṁ;

Puratthimā pacchimā ca,

uttarā atha dakkhiṇā.

Sītuṇhañca divā rattiṁ,

pariveṇañca koṭṭhako;

Upaṭṭhānaggisālā ca,

vaccapāniyabhojanī.

Ācamaṁ anabhirati,

kukkuccaṁ diṭṭhi ca garu;

Mūlamānattaabbhānaṁ,

tajjanīyaṁ niyassakaṁ.

Pabbāja paṭisāraṇī,

ukkhepañca kataṁ yadi;

Dhove kātabbaṁ rajañca,

raje samparivattakaṁ.

Pattañca cīvarañcāpi,

parikkhārañca chedanaṁ;

Parikammaṁ veyyāvaccaṁ,

pacchā piṇḍaṁ pavisanaṁ.

Na susānaṁ disā ceva,

yāvajīvaṁ upaṭṭhahe;

Saddhivihārikenetaṁ,

vattupajjhāyakesume.

Ovādasāsanuddesā,

pucchā pattañca cīvaraṁ;

Parikkhāro gilāno ca,

na pacchāsamaṇo bhave.

Upajjhāyesu ye vattā,

evaṁ ācariyesupi;

Saddhivihārike vattā,

tatheva antevāsike.

Āgantukesu ye vattā,

puna āvāsikesu ca;

Gamikānumodanikā,

bhattagge piṇḍacārike.

Āraññakesu yaṁ vattaṁ,

yañca senāsanesupi;

Jantāghare vaccakuṭī,

upajjhā saddhivihārike.

Ācariyesu yaṁ vattaṁ,

tatheva antevāsike;

Ekūnavīsati vatthū,

vattā cuddasa khandhake.

Vattaṁ aparipūrento,

na sīlaṁ paripūrati;

Asuddhasīlo duppañño,

cittekaggaṁ na vindati.

Vikkhittacittonekaggo,

sammā dhammaṁ na passati;

Apassamāno saddhammaṁ,

dukkhā na parimuccati.

Yaṁ vattaṁ paripūrento,

sīlampi paripūrati;

Visuddhasīlo sappañño,

cittekaggampi vindati.

Avikkhittacitto ekaggo,

sammā dhammaṁ vipassati;

Sampassamāno saddhammaṁ,

dukkhā so parimuccati.

Tasmā hi vattaṁ pūreyya,

jinaputto vicakkhaṇo;

Ovādaṁ buddhaseṭṭhassa,

tato nibbānamehitīti.

Vattakkhandhako niṭṭhito.