82. Pariṇāmanasikkhāpada (PLI-TV-BU-VB-PC82)

Theravāda Vinaya

Mahāvibhaṅga

Pācittiyakaṇḍa

Sahadhammikavagga

82. Pariṇāmanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena sāvatthiyaṁ aññatarassa pūgassa saṅghassa sacīvarabhattaṁ paṭiyattaṁ hoti—

“bhojetvā cīvarena acchādessāmā”ti.

Atha kho chabbaggiyā bhikkhū yena so pūgo tenupasaṅkamiṁsu;

upasaṅkamitvā taṁ pūgaṁ etadavocuṁ—

“dethāvuso, imāni cīvarāni imesaṁ bhikkhūnan”ti.

“Na mayaṁ, bhante, dassāma.

Amhākaṁ saṅghassa anuvassaṁ sacīvarabhikkhā paññattā”ti.

“Bahū, āvuso, saṅghassa dāyakā, bahū saṅghassa bhattā.

Ime tumhe nissāya tumhe sampassantā idha viharanti.

Tumhe ce imesaṁ na dassatha, atha ko carahi imesaṁ dassati?

Dethāvuso, imāni cīvarāni imesaṁ bhikkhūnan”ti.

Atha kho so pūgo chabbaggiyehi bhikkhūhi nippīḷiyamāno yathāpaṭiyattaṁ cīvaraṁ chabbaggiyānaṁ bhikkhūnaṁ datvā saṅghaṁ bhattena parivisi.

Ye te bhikkhū jānanti saṅghassa sacīvarabhattaṁ paṭiyattaṁ “na ca jānanti chabbaggiyānaṁ bhikkhūnaṁ dinnan”ti te evamāhaṁsu—

“oṇojethāvuso, saṅghassa cīvaran”ti.

“Natthi, bhante.

Yathāpaṭiyattaṁ cīvaraṁ ayyā chabbaggiyā ayyānaṁ chabbaggiyānaṁ pariṇāmesun”ti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū jānaṁ saṅghikaṁ lābhaṁ pariṇataṁ puggalassa pariṇāmessantī”ti …pe…

“saccaṁ kira tumhe, bhikkhave, jānaṁ saṅghikaṁ lābhaṁ pariṇataṁ puggalassa pariṇāmethā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, jānaṁ saṅghikaṁ lābhaṁ pariṇataṁ puggalassa pariṇāmessatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu jānaṁ saṅghikaṁ lābhaṁ pariṇataṁ puggalassa pariṇāmeyya, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Jānāti nāma

sāmaṁ vā jānāti, aññe vā tassa ārocenti, so vā āroceti.

Saṅghikaṁ nāma

saṅghassa dinnaṁ hoti pariccattaṁ.

Lābho nāma

cīvarapiṇḍapātasenāsanagilānappaccayabhesajjaparikkhārā, antamaso cuṇṇapiṇḍopi, dantakaṭṭhampi, dasikasuttampi.

Pariṇataṁ nāma

“dassāma karissāmā”ti vācā bhinnā hoti, taṁ puggalassa pariṇāmeti, āpatti pācittiyassa.

Pariṇate pariṇatasaññī puggalassa pariṇāmeti, āpatti pācittiyassa.

Pariṇate vematiko puggalassa pariṇāmeti, āpatti dukkaṭassa.

Pariṇate apariṇatasaññī puggalassa pariṇāmeti, anāpatti.

Saṅghassa pariṇataṁ aññasaṅghassa vā cetiyassa vā pariṇāmeti, āpatti dukkaṭassa.

Cetiyassa pariṇataṁ aññacetiyassa vā saṅghassa vā puggalassa vā pariṇāmeti, āpatti dukkaṭassa.

Puggalassa pariṇataṁ aññapuggalassa vā saṅghassa vā cetiyassa vā pariṇāmeti, āpatti dukkaṭassa.

Apariṇate pariṇatasaññī, āpatti dukkaṭassa.

Apariṇate vematiko, āpatti dukkaṭassa.

Apariṇate apariṇatasaññī, anāpatti.

Anāpatti—

“kattha demā”ti pucchīyamāno—

“yattha tumhākaṁ deyyadhammo paribhogaṁ vā labheyya paṭisaṅkhāraṁ vā labheyya ciraṭṭhitiko vā assa yattha vā pana tumhākaṁ cittaṁ pasīdati tattha dethā”ti bhaṇati,

ummattakassa,

ādikammikassāti.

Pariṇāmanasikkhāpadaṁ niṭṭhitaṁ dvādasamaṁ.

Sahadhammikavaggo aṭṭhamo.

Tassuddānaṁ

Sahadhamma vivaṇṇañca,

mohāpanaṁ pahārakaṁ;

Talasatti amūlañca,

sañcicca ca upassuti;

Paṭibāhana chandañca,

dabbañca pariṇāmananti.