61. Sañciccasikkhāpada (PLI-TV-BU-VB-PC61)

Theravāda Vinaya

Mahāvibhaṅga

Pācittiyakaṇḍa

Sappāṇakavagga

61. Sañciccasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena āyasmā udāyī issāso hoti, kākā cassa amanāpā honti.

So kāke vijjhitvā vijjhitvā sīsaṁ chinditvā sūle paṭipāṭiyā ṭhapesi.

Bhikkhū evamāhaṁsu—

“kenime, āvuso, kākā jīvitā voropitā”ti?

“Mayā, āvuso.

Amanāpā me kākā”ti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma āyasmā udāyī sañcicca pāṇaṁ jīvitā voropessatī”ti …pe…

“saccaṁ kira tvaṁ, udāyi, sañcicca pāṇaṁ jīvitā voropesī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tvaṁ, moghapurisa, sañcicca pāṇaṁ jīvitā voropessasi.

Netaṁ, moghapurisa, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu sañcicca pāṇaṁ jīvitā voropeyya, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Sañciccāti

jānanto sañjānanto cecca abhivitaritvā vītikkamo.

Pāṇo nāma

tiracchānagatapāṇo vuccati.

Jīvitā voropeyyāti

jīvitindriyaṁ upacchindati uparodheti santatiṁ vikopeti, āpatti pācittiyassa.

Pāṇe pāṇasaññī jīvitā voropeti, āpatti pācittiyassa.

Pāṇe vematiko jīvitā voropeti, āpatti dukkaṭassa.

Pāṇe appāṇasaññī jīvitā voropeti, anāpatti.

Appāṇe pāṇasaññī, āpatti dukkaṭassa.

Appāṇe vematiko, āpatti dukkaṭassa.

Appāṇe appāṇasaññī, anāpatti.

Anāpatti—

asañcicca,

assatiyā,

ajānantassa,

namaraṇādhippāyassa,

ummattakassa,

ādikammikassāti.

Sañciccasikkhāpadaṁ niṭṭhitaṁ paṭhamaṁ.