4. Padasodhammasikkhāpada (PLI-TV-BU-VB-PC4)

Theravāda Vinaya

Mahāvibhaṅga

Pācittiyakaṇḍa

Musāvādavagga

4. Padasodhammasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena chabbaggiyā bhikkhū upāsake padaso dhammaṁ vācenti.

Upāsakā bhikkhūsu agāravā appatissā asabhāgavuttikā viharanti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū upāsake padaso dhammaṁ vācessanti.

Upāsakā bhikkhūsu agāravā appatissā asabhāgavuttikā viharantī”ti.

Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṁ ārocesuṁ …pe…

“saccaṁ kira tumhe, bhikkhave, upāsake padaso dhammaṁ vācetha;

upāsakā bhikkhūsu agāravā appatissā asabhāgavuttikā viharantī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, upāsake padaso dhammaṁ vācessatha.

Upāsakā bhikkhūsu agāravā appatissā asabhāgavuttikā viharanti.

Netaṁ, moghapurisā, appasannānaṁ vā pasādāya pasannānaṁ vā bhiyyobhāvāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu anupasampannaṁ padaso dhammaṁ vāceyya pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Anupasampanno nāma

bhikkhuñca bhikkhuniñca ṭhapetvā avaseso anupasampanno nāma.

Padaso nāma

padaṁ, anupadaṁ, anvakkharaṁ, anubyañjanaṁ.

Padaṁ nāma

ekato paṭṭhapetvā ekato osāpenti.

Anupadaṁ nāma

pāṭekkaṁ paṭṭhapetvā ekato osāpenti.

Anvakkharaṁ nāma

“rūpaṁ aniccan”ti vuccamāno, “run”ti opāteti.

Anubyañjanaṁ nāma

“rūpaṁ aniccan”ti vuccamāno, “vedanā aniccā”ti saddaṁ nicchāreti.

Yañca padaṁ, yañca anupadaṁ, yañca anvakkharaṁ, yañca anubyañjanaṁ—

sabbametaṁ padaso nāma.

Dhammo nāma

buddhabhāsito, sāvakabhāsito, isibhāsito, devatābhāsito, atthūpasañhito, dhammūpasañhito.

Vāceyyāti

padena vāceti, pade pade āpatti pācittiyassa.

Akkharāya vāceti, akkharakkharāya āpatti pācittiyassa.

Anupasampanne anupasampannasaññī padaso dhammaṁ vāceti, āpatti pācittiyassa.

Anupasampanne vematiko padaso dhammaṁ vāceti, āpatti pācittiyassa.

Anupasampanne upasampannasaññī padaso dhammaṁ vāceti, āpatti pācittiyassa.

Upasampanne anupasampannasaññī, āpatti dukkaṭassa.

Upasampanne vematiko, āpatti dukkaṭassa.

Upasampanne upasampannasaññī, anāpatti.

Anāpatti—

ekato uddisāpento,

ekato sajjhāyaṁ karonto,

yebhuyyena paguṇaṁ ganthaṁ bhaṇantaṁ opāteti,

osārentaṁ opāteti,

ummattakassa,

ādikammikassāti.

Padasodhammasikkhāpadaṁ niṭṭhitaṁ catutthaṁ.