20. Sappāṇakasikkhāpada (PLI-TV-BU-VB-PC20)

Theravāda Vinaya

Mahāvibhaṅga

Pācittiyakaṇḍa

Bhūtagāmavagga

20. Sappāṇakasikkhāpada

Tena samayena buddho bhagavā āḷaviyaṁ viharati aggāḷave cetiye.

Tena kho pana samayena āḷavakā bhikkhū navakammaṁ karontā jānaṁ sappāṇakaṁ udakaṁ tiṇampi mattikampi siñcantipi siñcāpentipi.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma āḷavakā bhikkhū jānaṁ sappāṇakaṁ udakaṁ tiṇampi mattikampi siñcissantipi siñcāpessantipī”ti.

Atha kho te bhikkhū āḷavake bhikkhū anekapariyāyena vigarahitvā bhagavato etamatthaṁ ārocesuṁ …pe…

“saccaṁ kira tumhe, bhikkhave, jānaṁ sappāṇakaṁ udakaṁ tiṇampi mattikampi siñcathapi siñcāpethapī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, jānaṁ sappāṇakaṁ udakaṁ tiṇampi mattikampi siñcissathapi siñcāpessathapi.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu jānaṁ sappāṇakaṁ udakaṁ tiṇaṁ vā mattikaṁ vā siñceyya vā siñcāpeyya vā, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Jānāti nāma

sāmaṁ vā jānāti. Aññe vā tassa ārocenti.

Siñceyyāti

sayaṁ siñcati, āpatti pācittiyassa.

Siñcāpeyyāti

aññaṁ āṇāpeti, āpatti pācittiyassa.

Sakiṁ āṇatto bahukampi siñcati, āpatti pācittiyassa.

Sappāṇake sappāṇakasaññī tiṇaṁ vā mattikaṁ vā siñcati vā siñcāpeti vā, āpatti pācittiyassa.

Sappāṇake vematiko tiṇaṁ vā mattikaṁ vā siñcati vā siñcāpeti vā, āpatti dukkaṭassa.

Sappāṇake appāṇakasaññī tiṇaṁ vā mattikaṁ vā siñcati vā siñcāpeti vā, anāpatti.

Appāṇake sappāṇakasaññī, āpatti dukkaṭassa.

Appāṇake vematiko, āpatti dukkaṭassa.

Appāṇake appāṇakasaññī, anāpatti.

Anāpatti—

asañcicca,

assatiyā,

ajānantassa,

ummattakassa,

ādikammikassāti.

Sappāṇakasikkhāpadaṁ niṭṭhitaṁ dasamaṁ.

Bhūtagāmavaggo dutiyo.

Tassuddānaṁ

Bhūtaṁ aññāya ujjhāyaṁ,

pakkamantena te duve;

Pubbe nikkaḍḍhanāhacca,

dvāraṁ sappāṇakena cāti.