4. Ukkhittakaosāraṇasikkhāpada (PLI-TV-BI-VB-SS4)

Theravāda Vinaya

Bhikkhunivibhaṅga

Saṅghādisesakaṇḍa

4. Ukkhittakaosāraṇasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena caṇḍakāḷī bhikkhunī bhaṇḍanakārikā hoti kalahakārikā vivādakārikā bhassakārikā saṅghe adhikaraṇakārikā.

Thullanandā bhikkhunī tassā kamme karīyamāne paṭikkosati.

Tena kho pana samayena thullanandā bhikkhunī gāmakaṁ agamāsi kenacideva karaṇīyena.

Atha kho bhikkhunisaṅgho—

“thullanandā bhikkhunī pakkantā”ti, caṇḍakāḷiṁ bhikkhuniṁ āpattiyā adassane ukkhipi.

Thullanandā bhikkhunī gāmake taṁ karaṇīyaṁ tīretvā punadeva sāvatthiṁ paccāgacchi.

Caṇḍakāḷī bhikkhunī thullanandāya bhikkhuniyā āgacchantiyā neva āsanaṁ paññapesi na pādodakaṁ pādapīṭhaṁ pādakaṭhalikaṁ upanikkhipi na paccuggantvā pattacīvaraṁ paṭiggahesi na pānīyena āpucchi.

Thullanandā bhikkhunī caṇḍakāḷiṁ bhikkhuniṁ etadavoca—

“kissa tvaṁ, ayye, mayi āgacchantiyā neva āsanaṁ paññapesi na pādodakaṁ pādapīṭhaṁ pādakaṭhalikaṁ upanikkhipi na paccuggantvā pattacīvaraṁ paṭiggahesi na pānīyena āpucchī”ti?

“Evañhetaṁ, ayye, hoti yathā taṁ anāthāyā”ti.

“Kissa pana tvaṁ, ayye, anāthā”ti?

“Imā maṁ, ayye, bhikkhuniyo—

‘ayaṁ anāthā appaññātā, natthi imissā kāci paṭivattā’ti, āpattiyā adassane ukkhipiṁsū”ti.

Thullanandā bhikkhunī—

“bālā etā abyattā etā, neva jānanti kammaṁ vā kammadosaṁ vā kammavipattiṁ vā kammasampattiṁ vā.

Mayaṁ kho jānāma kammampi kammadosampi kammavipattimpi kammasampattimpi.

Mayaṁ kho akataṁ vā kammaṁ kāreyyāma kataṁ vā kammaṁ kopeyyāmā”ti, lahuṁ lahuṁ bhikkhunisaṅghaṁ sannipātetvā caṇḍakāḷiṁ bhikkhuniṁ osāresi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā samaggena saṅghena ukkhittaṁ bhikkhuniṁ dhammena vinayena satthusāsanena anapaloketvā kārakasaṅghaṁ anaññāya gaṇassa chandaṁ osāressatī”ti …pe…

“saccaṁ kira, bhikkhave, thullanandā bhikkhunī samaggena saṅghena ukkhittaṁ bhikkhuniṁ dhammena vinayena satthusāsanena anapaloketvā kārakasaṅghaṁ anaññāya gaṇassa chandaṁ osāretī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī samaggena saṅghena ukkhittaṁ bhikkhuniṁ dhammena vinayena satthusāsanena anapaloketvā kārakasaṅghaṁ anaññāya gaṇassa chandaṁ osāressati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī samaggena saṅghena ukkhittaṁ bhikkhuniṁ dhammena vinayena satthusāsanena anapaloketvā kārakasaṅghaṁ anaññāya gaṇassa chandaṁ osāreyya, ayampi bhikkhunī paṭhamāpattikaṁ dhammaṁ āpannā nissāraṇīyaṁ saṅghādisesan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Samaggo nāma saṅgho

samānasaṁvāsako samānasīmāyaṁ ṭhito.

Ukkhittā nāma

āpattiyā adassane vā appaṭikamme vā appaṭinissagge vā ukkhittā.

Dhammena vinayenāti

yena dhammena yena vinayena.

Satthusāsanenāti

jinasāsanena buddhasāsanena.

Anapaloketvā kārakasaṅghanti

kammakārakasaṅghaṁ anāpucchā.

Anaññāya gaṇassa chandanti

gaṇassa chandaṁ ajānitvā.

“Osāressāmī”ti gaṇaṁ vā pariyesati, sīmaṁ vā sammannati, āpatti dukkaṭassa.

Ñattiyā dukkaṭaṁ, dvīhi kammavācāhi thullaccayā, kammavācāpariyosāne āpatti saṅghādisesassa.

Ayampīti

purimāyo upādāya vuccati.

Paṭhamāpattikanti

saha vatthujjhācārā āpajjati asamanubhāsanāya.

Nissāraṇīyanti

saṅghamhā nissārīyati.

Saṅghādisesoti

…pe… tenapi vuccati saṅghādisesoti.

Dhammakamme dhammakammasaññā osāreti, āpatti saṅghādisesassa.

Dhammakamme vematikā osāreti āpatti saṅghādisesassa.

Dhammakamme adhammakammasaññā osāreti, āpatti saṅghādisesassa.

Adhammakamme dhammakammasaññā, āpatti dukkaṭassa.

Adhammakamme vematikā, āpatti dukkaṭassa.

Adhammakamme adhammakammasaññā, āpatti dukkaṭassa.

Anāpatti—

kammakārakasaṅghaṁ apaloketvā osāreti,

gaṇassa chandaṁ jānitvā osāreti,

vatte vattantiṁ osāreti,

asante kammakārakasaṅghe osāreti,

ummattikāya,

ādikammikāyāti.

Catutthasaṅghādisesasikkhāpadaṁ niṭṭhitaṁ.