12. Pāpasamācārasikkhāpada (PLI-TV-BI-VB-SS12)

Theravāda Vinaya

Bhikkhunivibhaṅga

Saṅghādisesakaṇḍa

12. Pāpasamācārasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandāya bhikkhuniyā antevāsikā bhikkhuniyo saṁsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo saṁsaṭṭhā viharissanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā”ti …pe…

“saccaṁ kira, bhikkhave, bhikkhuniyo saṁsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo saṁsaṭṭhā viharissanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Bhikkhuniyo paneva saṁsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā.

Tā bhikkhuniyo bhikkhunīhi evamassu vacanīyā—

‘bhaginiyo kho saṁsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā aññamaññissā vajjappaṭicchādikā.

Viviccathāyye. Vivekaññeva bhaginīnaṁ saṅgho vaṇṇetī’ti.

Evañca tā bhikkhuniyo bhikkhunīhi vuccamānā tatheva paggaṇheyyuṁ, tā bhikkhuniyo bhikkhunīhi yāvatatiyaṁ samanubhāsitabbā tassa paṭinissaggāya.

Yāvatatiyañce samanubhāsīyamānā taṁ paṭinissajjeyyuṁ, iccetaṁ kusalaṁ;

no ce paṭinissajjeyyuṁ, imāpi bhikkhuniyo yāvatatiyakaṁ dhammaṁ āpannā nissāraṇīyaṁ saṅghādisesan”ti.

Bhikkhuniyo panevāti

upasampannāyo vuccanti.

Saṁsaṭṭhā viharantīti

saṁsaṭṭhā nāma ananulomikena kāyikavācasikena saṁsaṭṭhā viharanti.

Pāpācārāti

pāpakena ācārena samannāgatā.

Pāpasaddāti

pāpakena kittisaddena abbhuggatā.

Pāpasilokāti

pāpakena micchājīvena jīvitaṁ kappenti.

Bhikkhunisaṅghassa vihesikāti

aññamaññissā kamme karīyamāne paṭikkosanti.

Aññamaññissā vajjappaṭicchādikāti

aññamaññaṁ vajjaṁ paṭicchādenti.

Tā bhikkhuniyoti

yā tā saṁsaṭṭhā bhikkhuniyo.

Bhikkhunīhīti

aññāhi bhikkhunīhi. Yā passanti yā suṇanti tāhi vattabbā—

“bhaginiyo kho saṁsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā.

Viviccathāyye. Vivekaññeva bhaginīnaṁ saṅgho vaṇṇetī”ti.

Dutiyampi vattabbā.

Tatiyampi vattabbā.

Sace paṭinissajjanti, iccetaṁ kusalaṁ;

no ce paṭinissajjanti, āpatti dukkaṭassa.

Sutvā na vadanti, āpatti dukkaṭassa.

Tā bhikkhuniyo saṅghamajjhampi ākaḍḍhitvā vattabbā—

“bhaginiyo kho saṁsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā.

Viviccathāyye. Vivekaññeva bhaginīnaṁ saṅgho vaṇṇetī”ti.

Dutiyampi vattabbā.

Tatiyampi vattabbā.

Sace paṭinissajjanti, iccetaṁ kusalaṁ;

no ce paṭinissajjanti, āpatti dukkaṭassa.

Tā bhikkhuniyo samanubhāsitabbā.

Evañca pana, bhikkhave, samanubhāsitabbā.

Byattāya bhikkhuniyā paṭibalāya saṅgho ñāpetabbo—

“Suṇātu me, ayye, saṅgho.

Itthannāmā ca itthannāmā ca bhikkhuniyo saṁsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā.

Tā taṁ vatthuṁ na paṭinissajjanti.

Yadi saṅghassa pattakallaṁ, saṅgho itthannāmañca itthannāmañca bhikkhuniyo samanubhāseyya tassa vatthussa paṭinissaggāya.

Esā ñatti.

Suṇātu me, ayye, saṅgho.

Itthannāmā ca itthannāmā ca bhikkhuniyo saṁsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā.

Tā taṁ vatthuṁ na paṭinissajjanti.

Saṅgho itthannāmañca itthannāmañca bhikkhuniyo samanubhāsati tassa vatthussa paṭinissaggāya.

Yassā ayyāya khamati itthannāmāya ca itthannāmāya ca bhikkhunīnaṁ samanubhāsanā tassa vatthussa paṭinissaggāya, sā tuṇhassa;

yassā nakkhamati, sā bhāseyya.

Dutiyampi etamatthaṁ vadāmi …pe…

tatiyampi etamatthaṁ vadāmi …pe….

Samanubhaṭṭhā saṅghena, itthannāmā ca itthannāmā ca bhikkhuniyo tassa vatthussa paṭinissaggāya.

Khamati saṅghassa, tasmā tuṇhī, evametaṁ dhārayāmī”ti.

Ñattiyā dukkaṭaṁ,

dvīhi kammavācāhi thullaccayā,

kammavācāpariyosāne āpatti saṅghādisesassa.

Saṅghādisesaṁ ajjhāpajjantīnaṁ ñattiyā dukkaṭaṁ dvīhi kammavācāhi thullaccayā paṭippassambhanti.

Dve tisso ekato samanubhāsitabbā. Tatuttari na samanubhāsitabbā.

Imāpi bhikkhuniyoti

purimāyo upādāya vuccanti.

Yāvatatiyakanti

yāvatatiyaṁ samanubhāsanāya āpajjanti, na saha vatthujjhācārā.

Nissāraṇīyanti

saṅghamhā nissārīyati.

Saṅghādisesoti

…pe… tenapi vuccati saṅghādisesoti.

Dhammakamme dhammakammasaññā na paṭinissajjanti, āpatti saṅghādisesassa.

Dhammakamme vematikā na paṭinissajjanti, āpatti saṅghādisesassa.

Dhammakamme adhammakammasaññā na paṭinissajjanti, āpatti saṅghādisesassa.

Adhammakamme dhammakammasaññā, āpatti dukkaṭassa.

Adhammakamme vematikā, āpatti dukkaṭassa.

Adhammakamme adhammakammasaññā, āpatti dukkaṭassa.

Anāpatti—

asamanubhāsantīnaṁ,

paṭinissajjantīnaṁ,

ummattikānaṁ,

ādikammikānanti.

Navamasaṅghādisesasikkhāpadaṁ niṭṭhitaṁ.