75. Udakeuccārasikkhāpada (PLI-TV-BI-VB-SK75)

Theravāda Vinaya

Bhikkhunivibhaṅga

Sekhiyakaṇḍa

Pādukavagga

75. Udakeuccārasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena chabbaggiyā bhikkhuniyo udake uccārampi passāvampi kheḷampi karonti.

Manussā ujjhāyanti khiyyanti vipācenti—

“kathañhi nāma bhikkhuniyo udake uccārampi passāvampi kheḷampi karissanti, seyyathāpi gihiniyo kāmabhoginiyo”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā, tā ujjhāyanti khiyyanti vipācenti—

“kathañhi nāma chabbaggiyā bhikkhuniyo udake uccārampi passāvampi kheḷampi karissantī”ti.

Atha kho bhikkhuniyo bhikkhūnaṁ etamatthaṁ ārocesuṁ.

Bhikkhū bhagavato etamatthaṁ ārocesuṁ.

Atha kho bhagavā …pe…

bhikkhū paṭipucchi—

“saccaṁ kira, bhikkhave, chabbaggiyā bhikkhuniyo udake uccārampi passāvampi kheḷampi karontī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, chabbaggiyā bhikkhuniyo udake uccārampi passāvampi kheḷampi karissanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Na udake uccāraṁ vā passāvaṁ vā kheḷaṁ vā karissāmīti sikkhā karaṇīyā”ti.

Evañcidaṁ bhagavatā bhikkhunīnaṁ sikkhāpadaṁ paññattaṁ hoti.

Tena kho pana samayena gilānā bhikkhuniyo udake uccārampi passāvampi kheḷampi kātuṁ kukkuccāyanti.

Bhagavato etamatthaṁ ārocesuṁ …pe…

anujānāmi, bhikkhave, gilānāya bhikkhuniyā udake uccārampi passāvampi kheḷampi kātuṁ.

Evañca pana, bhikkhave, bhikkhuniyo imaṁ sikkhāpadaṁ uddisantu—

“Na udake agilānā uccāraṁ vā passāvaṁ vā kheḷaṁ vā karissāmīti sikkhā karaṇīyā”ti.

Na udake agilānāya uccāro vā passāvo vā kheḷo vā kātabbo.

Yā anādariyaṁ paṭicca udake agilānā uccāraṁ vā passāvaṁ vā kheḷaṁ vā karoti, āpatti dukkaṭassa.

Anāpatti—

asañcicca,

assatiyā,

ajānantiyā,

gilānāya,

thale kato udakaṁ ottharati,

āpadāsu,

ummattikāya,

khittacittāya,

vedanāṭṭāya,

ādikammikāyāti.

Pannarasamasikkhāpadaṁ niṭṭhitaṁ.

Pādukavaggo sattamo.

Uddiṭṭhā kho, ayyāyo, sekhiyā dhammā.

Tatthāyyāyo pucchāmi—

“kaccittha parisuddhā”?

Dutiyampi pucchāmi—

“kaccittha parisuddhā”?

Tatiyampi pucchāmi—

“kaccittha parisuddhā”?

Parisuddhetthāyyāyo, tasmā tuṇhī, evametaṁ dhārayāmīti.

Sekhiyakaṇḍaṁ niṭṭhitaṁ.