96. Asaṅkaccikasikkhāpada (PLI-TV-BI-VB-PC96)

Theravāda Vinaya

Bhikkhunivibhaṅga

Pācittiyakaṇḍa

Chattupāhanavagga

96. Asaṅkaccikasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarā bhikkhunī asaṅkaccikā gāmaṁ piṇḍāya pāvisi.

Tassā rathikāya vātamaṇḍalikā saṅghāṭiyo ukkhipiṁsu.

Manussā ukkuṭṭhiṁ akaṁsu—

“sundarā ayyāya thanudarā”ti.

Sā bhikkhunī tehi manussehi uppaṇḍiyamānā maṅku ahosi.

Atha kho sā bhikkhunī upassayaṁ gantvā bhikkhunīnaṁ etamatthaṁ ārocesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī asaṅkaccikā gāmaṁ pavisissatī”ti …pe…

“saccaṁ kira, bhikkhave, bhikkhunī asaṅkaccikā gāmaṁ pāvisī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī asaṅkaccikā gāmaṁ pavisissati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī asaṅkaccikā gāmaṁ paviseyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Asaṅkaccikāti

vinā saṅkaccikaṁ.

Saṅkaccikaṁ nāma

adhakkhakaṁ ubbhanābhi, tassa paṭicchādanatthāya.

Gāmaṁ paviseyyāti

parikkhittassa gāmassa parikkhepaṁ atikkāmentiyā āpatti pācittiyassa.

Aparikkhittassa gāmassa upacāraṁ okkamantiyā āpatti pācittiyassa.

Anāpatti—

acchinnacīvarikāya,

naṭṭhacīvarikāya,

gilānāya,

assatiyā,

ajānantiyā,

āpadāsu,

ummattikāya,

ādikammikāyāti.

Terasamasikkhāpadaṁ niṭṭhitaṁ.

Chattupāhanavaggo navamo.

Dhammikavagga

Nandasikkhāpada

Uddiṭṭhā kho, ayyāyo, chasaṭṭhisatā pācittiyā dhammā.

Tatthāyyāyo pucchāmi—

“kaccittha parisuddhā”?

Dutiyampi pucchāmi—

“kaccittha parisuddhā”?

Tatiyampi pucchāmi—

“kaccittha parisuddhā”?

Parisuddhetthāyyāyo, tasmā tuṇhī, evametaṁ dhārayāmīti.

Khuddakaṁ samattaṁ.

Bhikkhunivibhaṅge pācittiyakaṇḍaṁ niṭṭhitaṁ.

(…)