83. Ekavassasikkhāpada (PLI-TV-BI-VB-PC83)

Theravāda Vinaya

Bhikkhunivibhaṅga

Pācittiyakaṇḍa

Kumāribhūtavagga

83. Ekavassasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhikkhuniyo ekaṁ vassaṁ dve vuṭṭhāpenti.

Upassayo tatheva na sammati.

Manussā tatheva ujjhāyanti khiyyanti vipācenti—

“kathañhi nāma bhikkhuniyo ekaṁ vassaṁ dve vuṭṭhāpessanti.

Upassayo tatheva na sammatī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo ekaṁ vassaṁ dve vuṭṭhāpessantī”ti …pe…

“saccaṁ kira, bhikkhave, bhikkhuniyo ekaṁ vassaṁ dve vuṭṭhāpentī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo ekaṁ vassaṁ dve vuṭṭhāpessanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī ekaṁ vassaṁ dve vuṭṭhāpeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Ekaṁ vassanti

ekaṁ saṁvaccharaṁ.

Dve vuṭṭhāpeyyāti

dve upasampādeyya.

“Dve vuṭṭhāpessāmī”ti gaṇaṁ vā ācariniṁ vā pattaṁ vā cīvaraṁ vā pariyesati, sīmaṁ vā sammannati, āpatti dukkaṭassa.

Ñattiyā dukkaṭaṁ.

Dvīhi kammavācāhi dukkaṭā.

Kammavācāpariyosāne upajjhāyāya āpatti pācittiyassa.

Gaṇassa ca ācariniyā ca āpatti dukkaṭassa.

Anāpatti—

ekantarikaṁ ekaṁ vuṭṭhāpeti,

ummattikāya,

ādikammikāyāti.

Terasamasikkhāpadaṁ niṭṭhitaṁ.

Kumāribhūtavaggo aṭṭhamo.