79. Sokāvāsasikkhāpada (PLI-TV-BI-VB-PC79)

Theravāda Vinaya

Bhikkhunivibhaṅga

Pācittiyakaṇḍa

Kumāribhūtavagga

79. Sokāvāsasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī purisasaṁsaṭṭhaṁ kumārakasaṁsaṭṭhaṁ caṇḍiṁ sokāvāsaṁ caṇḍakāḷiṁ sikkhamānaṁ vuṭṭhāpeti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā purisasaṁsaṭṭhaṁ kumārakasaṁsaṭṭhaṁ caṇḍiṁ sokāvāsaṁ caṇḍakāḷiṁ sikkhamānaṁ vuṭṭhāpessatī”ti …pe…

“saccaṁ kira, bhikkhave, thullanandā bhikkhunī purisasaṁsaṭṭhaṁ kumārakasaṁsaṭṭhaṁ caṇḍiṁ sokāvāsaṁ caṇḍakāḷiṁ sikkhamānaṁ vuṭṭhāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī purisasaṁsaṭṭhaṁ kumārakasaṁsaṭṭhaṁ caṇḍiṁ sokāvāsaṁ caṇḍakāḷiṁ sikkhamānaṁ vuṭṭhāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī purisasaṁsaṭṭhaṁ kumārakasaṁsaṭṭhaṁ caṇḍiṁ sokāvāsaṁ sikkhamānaṁ vuṭṭhāpeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Puriso nāma

pattavīsativasso.

Kumārako nāma

appattavīsativasso.

Saṁsaṭṭhā nāma

ananulomikena kāyikavācasikena saṁsaṭṭhā.

Caṇḍī nāma

kodhanā vuccati.

Sokāvāsā nāma

paresaṁ dukkhaṁ uppādeti, sokaṁ āvisati.

Sikkhamānā nāma

dve vassāni chasu dhammesu sikkhitasikkhā.

Vuṭṭhāpeyyāti

upasampādeyya.

“Vuṭṭhāpessāmī”ti gaṇaṁ vā ācariniṁ vā pattaṁ vā cīvaraṁ vā pariyesati, sīmaṁ vā sammannati, āpatti dukkaṭassa.

Ñattiyā dukkaṭaṁ.

Dvīhi kammavācāhi dukkaṭā.

Kammavācāpariyosāne upajjhāyāya āpatti pācittiyassa;

gaṇassa ca ācariniyā ca āpatti dukkaṭassa.

Anāpatti—

ajānantī vuṭṭhāpeti,

ummattikāya,

ādikammikāyāti.

Navamasikkhāpadaṁ niṭṭhitaṁ.