7. Āmakadhaññasikkhāpada (PLI-TV-BI-VB-PC7)

Theravāda Vinaya

Bhikkhunivibhaṅga

Pācittiyakaṇḍa

Lasuṇavagga

7. Āmakadhaññasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhikkhuniyo sassakāle āmakadhaññaṁ viññāpetvā nagaraṁ atiharanti dvāraṭṭhāne—

“dethāyye, bhāgan”ti.

Palibundhetvā muñciṁsu.

Atha kho tā bhikkhuniyo upassayaṁ gantvā bhikkhunīnaṁ etamatthaṁ ārocesuṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo āmakadhaññaṁ viññāpessantī”ti …pe…

“saccaṁ kira, bhikkhave, bhikkhuniyo āmakadhaññaṁ viññāpentī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo āmakadhaññaṁ viññāpessanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī āmakadhaññaṁ viññatvā vā viññāpetvā vā bhajjitvā vā bhajjāpetvā vā koṭṭetvā vā koṭṭāpetvā vā pacitvā vā pacāpetvā vā bhuñjeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Āmakadhaññaṁ nāma

sāli vīhi yavo godhumo kaṅgu varako kudrusako.

Viññatvāti

sayaṁ viññatvā.

Viññāpetvāti

aññaṁ viññāpetvā.

Bhajjitvāti

sayaṁ bhajjitvā.

Bhajjāpetvāti

aññaṁ bhajjāpetvā.

Koṭṭetvāti

sayaṁ koṭṭetvā.

Koṭṭāpetvāti

aññaṁ koṭṭāpetvā.

Pacitvāti

sayaṁ pacitvā.

Pacāpetvāti

aññaṁ pacāpetvā.

“Bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti pācittiyassa.

Anāpatti—

ābādhapaccayā,

aparaṇṇaṁ viññāpeti,

ummattikāya,

ādikammikāyāti.

Sattamasikkhāpadaṁ niṭṭhitaṁ.