18. Paraujjhāpanakasikkhāpada (PLI-TV-BI-VB-PC18)

Theravāda Vinaya

Bhikkhunivibhaṅga

Pācittiyakaṇḍa

Rattandhakāravagga

18. Paraujjhāpanakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhaddāya kāpilāniyā antevāsinī bhikkhunī bhaddaṁ kāpilāniṁ sakkaccaṁ upaṭṭheti.

Bhaddā kāpilānī bhikkhuniyo etadavoca—

“ayaṁ maṁ, ayye, bhikkhunī sakkaccaṁ upaṭṭheti, imissāhaṁ cīvaraṁ dassāmī”ti.

Atha kho sā bhikkhunī duggahitena dūpadhāritena paraṁ ujjhāpesi—

“ahaṁ kirāyye, ayyaṁ na sakkaccaṁ upaṭṭhemi, na kira me ayyā cīvaraṁ dassatī”ti.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī duggahitena dūpadhāritena paraṁ ujjhāpessatī”ti …pe…

“saccaṁ kira, bhikkhave, bhikkhunī duggahitena dūpadhāritena paraṁ ujjhāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī duggahitena dūpadhāritena paraṁ ujjhāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī duggahitena dūpadhāritena paraṁ ujjhāpeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Duggahitenāti

aññathā gahitena.

Dūpadhāritenāti

aññathā upadhāritena.

Paranti

upasampannaṁ ujjhāpeti, āpatti pācittiyassa.

Upasampannāya upasampannasaññā ujjhāpeti, āpatti pācittiyassa.

Upasampannāya vematikā ujjhāpeti, āpatti pācittiyassa.

Upasampannāya anupasampannasaññā ujjhāpeti, āpatti pācittiyassa.

Anupasampannaṁ ujjhāpeti, āpatti dukkaṭassa.

Anupasampannāya upasampannasaññā, āpatti dukkaṭassa.

Anupasampannāya vematikā, āpatti dukkaṭassa.

Anupasampannāya anupasampannasaññā, āpatti dukkaṭassa.

Anāpatti—

ummattikāya,

ādikammikāyāti.

Aṭṭhamasikkhāpadaṁ niṭṭhitaṁ.