13. Ajjhokāsasallapanasikkhāpada (PLI-TV-BI-VB-PC13)

Theravāda Vinaya

Bhikkhunivibhaṅga

Pācittiyakaṇḍa

Rattandhakāravagga

13. Ajjhokāsasallapanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhaddāya kāpilāniyā antevāsiniyā bhikkhuniyā ñātako puriso gāmakā sāvatthiṁ agamāsi kenacideva karaṇīyena.

Atha kho sā bhikkhunī—

“bhagavatā paṭikkhittaṁ paṭicchanne okāse purisena saddhiṁ ekenekā santiṭṭhituṁ sallapitun”ti teneva purisena saddhiṁ ajjhokāse ekenekā santiṭṭhatipi sallapatipi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī ajjhokāse purisena saddhiṁ ekenekā santiṭṭhissatipi sallapissatipī”ti …pe…

“saccaṁ kira, bhikkhave, bhikkhunī ajjhokāse purisena saddhiṁ ekenekā santiṭṭhatipi sallapatipī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī ajjhokāse purisena saddhiṁ ekenekā santiṭṭhissatipi sallapissatipi.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī ajjhokāse purisena saddhiṁ ekenekā santiṭṭheyya vā sallapeyya vā, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Ajjhokāso nāma

appaṭicchanno hoti kuṭṭena vā kavāṭena vā kilañjena vā sāṇipākārena vā rukkhena vā thambhena vā kotthaḷiyā vā, yena kenaci appaṭicchanno hoti.

Puriso nāma

manussapuriso, na yakkho na peto na tiracchānagato, viññū paṭibalo santiṭṭhituṁ sallapituṁ.

Saddhinti

ekato.

Ekenekāti

puriso ceva hoti bhikkhunī ca.

Santiṭṭheyya vāti

purisassa hatthapāse tiṭṭhati, āpatti pācittiyassa.

Sallapeyya vāti

purisassa hatthapāse ṭhitā sallapati, āpatti pācittiyassa.

Hatthapāsaṁ vijahitvā santiṭṭhati vā sallapati vā, āpatti dukkaṭassa.

Yakkhena vā petena vā paṇḍakena vā tiracchānagatamanussaviggahena vā saddhiṁ santiṭṭhati vā sallapati vā, āpatti dukkaṭassa.

Anāpatti—

yo koci viññū dutiyo hoti,

arahopekkhā,

aññavihitā santiṭṭhati vā sallapati vā,

ummattikāya,

ādikammikāyāti.

Tatiyasikkhāpadaṁ niṭṭhitaṁ.