6. Saṅghikacetapanasikkhāpada (PLI-TV-BI-VB-NP6)

Theravāda Vinaya

Bhikkhunivibhaṅga

Nissaggiyakaṇḍa

Pattavagga

6. Saṅghikacetapanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena upāsakā bhikkhunisaṅghassa cīvaratthāya chandakaṁ saṅgharitvā aññatarassa pāvārikassa ghare parikkhāraṁ nikkhipitvā bhikkhuniyo upasaṅkamitvā etadavocuṁ—

“amukassa, ayye, pāvārikassa ghare cīvaratthāya parikkhāro nikkhitto, tato cīvaraṁ āharāpetvā bhājethā”ti.

Bhikkhuniyo tena parikkhārena bhesajjaṁ cetāpetvā paribhuñjiṁsu.

Upāsakā jānitvā ujjhāyanti khiyyanti vipācenti—

“kathañhi nāma bhikkhuniyo aññadatthikena parikkhārena aññuddisikena saṅghikena aññaṁ cetāpessantī”ti.

Assosuṁ kho bhikkhuniyo tesaṁ upāsakānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo aññadatthikena parikkhārena aññuddisikena saṅghikena aññaṁ cetāpessantī”ti …pe…

“saccaṁ kira, bhikkhave, bhikkhuniyo aññadatthikena parikkhārena aññuddisikena saṅghikena aññaṁ cetāpentī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo aññadatthikena parikkhārena aññuddisikena saṅghikena aññaṁ cetāpessanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī aññadatthikena parikkhārena aññuddisikena saṅghikena aññaṁ cetāpeyya, nissaggiyaṁ pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Aññadatthikena parikkhārena aññuddisikenāti

aññassatthāya dinnena.

Saṅghikenāti

saṅghassa, na gaṇassa, na ekabhikkhuniyā.

Aññaṁ cetāpeyyāti

yaṁatthāya dinnaṁ, taṁ ṭhapetvā aññaṁ cetāpeti, payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā ekabhikkhuniyā vā.

Evañca pana, bhikkhave, nissajjitabbaṁ.

…pe…

“idaṁ me, ayye, aññadatthikena parikkhārena aññuddisikena saṅghikena aññaṁ cetāpitaṁ nissaggiyaṁ, imāhaṁ saṅghassa nissajjāmī”ti.

…pe…

dadeyyā”ti …pe…

dadeyyun”ti …pe…

ayyāya dammī”ti.

Aññadatthike aññadatthikasaññā aññaṁ cetāpeti, nissaggiyaṁ pācittiyaṁ.

Aññadatthike vematikā aññaṁ cetāpeti, nissaggiyaṁ pācittiyaṁ.

Aññadatthike anaññadatthikasaññā aññaṁ cetāpeti, nissaggiyaṁ pācittiyaṁ.

Nissaṭṭhaṁ paṭilabhitvā yathādāne upanetabbaṁ.

Anaññadatthike aññadatthikasaññā, āpatti dukkaṭassa.

Anaññadatthike vematikā, āpatti dukkaṭassa.

Anaññadatthike anaññadatthikasaññā, anāpatti.

Anāpatti—

sesakaṁ upaneti,

sāmike apaloketvā upaneti,

āpadāsu,

ummattikāya,

ādikammikāyāti.

Chaṭṭhasikkhāpadaṁ niṭṭhitaṁ.