12. Lahupāvuraṇasikkhāpada (PLI-TV-BI-VB-NP12)

Theravāda Vinaya

Bhikkhunivibhaṅga

Nissaggiyakaṇḍa

Cīvaravagga

12. Lahupāvuraṇasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṁ kathaṁ kātuṁ.

Atha kho rājā pasenadi kosalo uṇhakāle mahagghaṁ khomaṁ pārupitvā yena thullanandā bhikkhunī tenupasaṅkami; upasaṅkamitvā thullanandaṁ bhikkhuniṁ abhivādetvā ekamantaṁ nisīdi.

Ekamantaṁ nisinnaṁ kho rājānaṁ pasenadiṁ kosalaṁ thullanandā bhikkhunī dhammiyā kathāya sandassesi samādapesi samuttejesi sampahaṁsesi.

Atha kho rājā pasenadi kosalo thullanandāya bhikkhuniyā dhammiyā kathāya sandassito samādapito samuttejito sampahaṁsito thullanandaṁ bhikkhuniṁ etadavoca—

“vadeyyāsi, ayye, yena attho”ti.

“Sace me tvaṁ, mahārāja, dātukāmosi, imaṁ khomaṁ dehī”ti.

Atha kho rājā pasenadi kosalo thullanandāya bhikkhuniyā khomaṁ datvā uṭṭhāyāsanā thullanandaṁ bhikkhuniṁ abhivādetvā padakkhiṇaṁ katvā pakkāmi.

Manussā ujjhāyanti khiyyanti vipācenti—

“mahicchā imā bhikkhuniyo asantuṭṭhā.

Kathañhi nāma rājānaṁ khomaṁ viññāpessantī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma ayyā thullanandā rājānaṁ khomaṁ viññāpessatī”ti …pe…

“saccaṁ kira, bhikkhave, thullanandā bhikkhunī rājānaṁ khomaṁ viññāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī rājānaṁ khomaṁ viññāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Lahupāvuraṇaṁ pana bhikkhuniyā cetāpentiyā aḍḍhateyyakaṁsaparamaṁ cetāpetabbaṁ. Tato ce uttari cetāpeyya, nissaggiyaṁ pācittiyan”ti.

Lahupāvuraṇaṁ nāma

yaṁ kiñci uṇhakāle pāvuraṇaṁ.

Cetāpentiyāti

viññāpentiyā.

Aḍḍhateyyakaṁsaparamaṁ cetāpetabbanti

dasakahāpaṇagghanakaṁ cetāpetabbaṁ.

Tato ce uttari cetāpeyyāti

tatuttari viññāpeti, payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā ekabhikkhuniyā vā.

Evañca pana, bhikkhave, nissajjitabbaṁ.

…pe…

“idaṁ me, ayye, lahupāvuraṇaṁ atirekaaḍḍhateyyakaṁsaparamaṁ cetāpitaṁ nissaggiyaṁ, imāhaṁ saṅghassa nissajjāmī”ti …pe…

dadeyyā”ti …pe…

dadeyyun”ti …pe…

ayyāya dammī”ti.

Atirekaaḍḍhateyyakaṁse atirekasaññā cetāpeti, nissaggiyaṁ pācittiyaṁ.

Atirekaaḍḍhateyyakaṁse vematikā cetāpeti, nissaggiyaṁ pācittiyaṁ.

Atirekaaḍḍhateyyakaṁse ūnakasaññā cetāpeti, nissaggiyaṁ pācittiyaṁ.

Ūnakaaḍḍhateyyakaṁse atirekasaññā, āpatti dukkaṭassa.

Ūnakaaḍḍhateyyakaṁse vematikā, āpatti dukkaṭassa.

Ūnakaaḍḍhateyyakaṁse ūnakasaññā, anāpatti.

Anāpatti—

aḍḍhateyyakaṁsaparamaṁ cetāpeti,

ūnakaaḍḍhateyyakaṁsaparamaṁ cetāpeti,

ñātakānaṁ,

pavāritānaṁ,

aññassatthāya,

attano dhanena,

mahagghaṁ cetāpetukāmassa appagghaṁ cetāpeti,

ummattikāya,

ādikammikāyāti.

Dvādasamasikkhāpadaṁ niṭṭhitaṁ.

(Dutiya) Pattavagga

10 Pariṇatasikkhāpada

Uddiṭṭhā kho, ayyāyo, tiṁsa nissaggiyā pācittiyā dhammā.

Tatthāyyāyo pucchāmi—

“kaccittha parisuddhā”?

Dutiyampi pucchāmi—

“kaccittha parisuddhā”?

Tatiyampi pucchāmi—

“kaccittha parisuddhā”?

Parisuddhetthāyyāyo, tasmā tuṇhī, evametaṁ dhārayāmīti.

Bhikkhunivibhaṅge nissaggiyakaṇḍaṁ niṭṭhitaṁ.