10. Puggalikacetāpanasikkhāpada (PLI-TV-BI-VB-NP10)

Theravāda Vinaya

Bhikkhunivibhaṅga

Nissaggiyakaṇḍa

Pattavagga

10. Puggalikacetāpanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṁ kathaṁ kātuṁ.

Bahū manussā thullanandaṁ bhikkhuniṁ payirupāsanti.

Tena kho pana samayena thullanandāya bhikkhuniyā pariveṇaṁ undriyati.

Manussā thullanandaṁ bhikkhuniṁ etadavocuṁ—

“kissidaṁ te, ayye, pariveṇaṁ undriyatī”ti?

“Natthāvuso, dāyakā, natthi kārakā”ti.

Atha kho te manussā thullanandāya bhikkhuniyā pariveṇatthāya chandakaṁ saṅgharitvā thullanandāya bhikkhuniyā parikkhāraṁ adaṁsu.

Thullanandā bhikkhunī tena ca parikkhārena sayampi yācitvā bhesajjaṁ cetāpetvā paribhuñji.

Manussā jānitvā ujjhāyanti khiyyanti vipācenti—

“kathañhi nāma ayyā thullanandā aññadatthikena parikkhārena aññuddisikena puggalikena saññācikena aññaṁ cetāpessatī”ti …pe…

“saccaṁ kira, bhikkhave, thullanandā bhikkhunī aññadatthikena parikkhārena aññuddisikena puggalikena saññācikena aññaṁ cetāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, thullanandā bhikkhunī aññadatthikena parikkhārena aññuddisikena puggalikena saññācikena aññaṁ cetāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī aññadatthikena parikkhārena aññuddisikena puggalikena saññācikena aññaṁ cetāpeyya, nissaggiyaṁ pācittiyan”ti.

Yā panāti

yā yādisā …pe…

bhikkhunīti …pe…

ayaṁ imasmiṁ atthe adhippetā bhikkhunīti.

Aññadatthikena parikkhārena aññuddisikenāti

aññassatthāya dinnena.

Puggalikenāti

ekāya bhikkhuniyā, na saṅghassa, na gaṇassa.

Saññācikenāti

sayaṁ yācitvā.

Aññaṁ cetāpeyyāti

yaṁatthāya dinnaṁ taṁ ṭhapetvā aññaṁ cetāpeti, payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā ekabhikkhuniyā vā.

Evañca pana, bhikkhave, nissajjitabbaṁ.

…pe…

“idaṁ me, ayye, aññadatthikena parikkhārena aññuddisikena puggalikena saññācikena aññaṁ cetāpitaṁ nissaggiyaṁ, imāhaṁ saṅghassa nissajjāmī”ti …pe…

dadeyyā”ti …pe…

dadeyyun”ti …pe…

ayyāya dammī”ti.

Aññadatthike aññadatthikasaññā aññaṁ cetāpeti, nissaggiyaṁ pācittiyaṁ.

Aññadatthike vematikā aññaṁ cetāpeti, nissaggiyaṁ pācittiyaṁ.

Aññadatthike anaññadatthikasaññā aññaṁ cetāpeti, nissaggiyaṁ pācittiyaṁ.

Nissaṭṭhaṁ paṭilabhitvā yathādāne upanetabbaṁ.

Anaññadatthike aññadatthikasaññā, āpatti dukkaṭassa.

Anaññadatthike vematikā, āpatti dukkaṭassa.

Anaññadatthike anaññadatthikasaññā, anāpatti.

Anāpatti—

sesakaṁ upaneti,

sāmike apaloketvā upaneti,

āpadāsu,

ummattikāya,

ādikammikāyāti.

Dasamasikkhāpadaṁ niṭṭhitaṁ.