Bhikkhunīpātimokkhapāḷi (PLI-TV-BI-PM)

Pācittiya 146. Ariṭṭhasikkhāpadaṁ

Yā pana bhikkhunī evaṁ vadeyya:

“tathāhaṁ bhagavatā dhammaṁ desitaṁ ājānāmi, yathā yeme antarāyikā dhammā vuttā bhagavatā, te paṭisevato nālaṁ antarāyāyā”ti.

Sā bhikkhunī bhikkhunīhi evamassa vacanīyā:

“māyye evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya,

anekapariyāyenāyye antarāyikā dhammā antarāyikā vuttā bhagavatā, alañca pana te paṭisevato antarāyāyā”ti.

Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṁ samanubhāsitabbā tassa paṭinissaggāya.

Yāvatatiyañce samanubhāsiyamānā taṁ paṭinissajjeyya, iccetaṁ kusalaṁ.

No ce paṭinissajjeyya, pācittiyaṁ.

Jotivaggo cuddasamo.

Diṭṭhivaggo

Pācittiya 147. Ukkhittasambhogasikkhāpadaṁ

Yā pana bhikkhunī jānaṁ tathāvādiniyā bhikkhuniyā akaṭānudhammāya taṁ diṭṭhiṁ appaṭinissaṭṭhāya saddhiṁ sambhuñjeyya vā, saṁvaseyya vā, saha vā seyyaṁ kappeyya, pācittiyaṁ.

Pācittiya 148. Kaṇṭakasikkhāpadaṁ

Samaṇuddesāpi ce evaṁ vadeyya:

“tathāhaṁ bhagavatā dhammaṁ desitaṁ ājānāmi, yathā yeme antarāyikā dhammā vuttā bhagavatā, te paṭisevato nālaṁ antarāyāyā”ti.

Sā samaṇuddesā bhikkhunīhi evamassa vacanīyā:

“māyye, samaṇuddese evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya,

anekapariyāyenāyye, samaṇuddese antarāyikā dhammā antarāyikā vuttā bhagavatā, alañca pana te paṭisevato antarāyāyā”ti.

Evañca sā samaṇuddesā bhikkhunīhi vuccamānā tatheva paggaṇheyya, sā samaṇuddesā bhikkhunīhi evamassa vacanīyā:

“ajjatagge te, ayye, samaṇuddese na ceva so bhagavā satthā apadisitabbo,

yampi caññā samaṇuddesā labhanti bhikkhunīhi saddhiṁ dirattatirattaṁ sahaseyyaṁ, sāpi te natthi,

cara pire, vinassā”ti.

Yā pana bhikkhunī jānaṁ tathānāsitaṁ samaṇuddesaṁ upalāpeyya vā, upaṭṭhāpeyya vā, sambhuñjeyya vā, saha vā seyyaṁ kappeyya, pācittiyaṁ.

Pācittiya 149. Sahadhammikasikkhāpadaṁ

Yā pana bhikkhunī bhikkhunīhi sahadhammikaṁ vuccamānā evaṁ vadeyya: “na tāvāhaṁ, ayye, etasmiṁ sikkhāpade sikkhissāmi, yāva na aññaṁ bhikkhuniṁ byattaṁ vinayadharaṁ paripucchāmī”ti, pācittiyaṁ.

Sikkhamānāya, bhikkhave, bhikkhuniyā aññātabbaṁ paripucchitabbaṁ paripañhitabbaṁ, ayaṁ tattha sāmīci.

Pācittiya 150. Vilekhanasikkhāpadaṁ

Yā pana bhikkhunī pātimokkhe uddissamāne evaṁ vadeyya: “kiṁ panimehi khuddānukhuddakehi sikkhāpadehi uddiṭṭhehi, yāvadeva kukkuccāya vihesāya vilekhāya saṁvattantī”ti, sikkhāpadavivaṇṇake pācittiyaṁ.

Pācittiya 151. Mohanasikkhāpadaṁ

Yā pana bhikkhunī anvaddhamāsaṁ pātimokkhe uddissamāne evaṁ vadeyya:

“idāneva kho ahaṁ, ayye, jānāmi ayampi kira dhammo suttāgato suttapariyāpanno anvaddhamāsaṁ uddesaṁ āgacchatī”ti,

tañce bhikkhuniṁ aññā bhikkhuniyo jāneyyuṁ nisinnapubbaṁ imāya bhikkhuniyā dvattikkhattuṁ pātimokkhe uddissamāne, ko pana vādo bhiyyo, na ca tassā bhikkhuniyā aññāṇakena mutti atthi, yañca tattha āpattiṁ āpannā, tañca yathādhammo kāretabbo, uttari cassā moho āropetabbo:

“tassā te, ayye, alābhā, tassā te dulladdhaṁ, yaṁ tvaṁ pātimokkhe uddissamāne na sādhukaṁ aṭṭhiṁ katvā manasi karosī”ti,

idaṁ tasmiṁ mohanake pācittiyaṁ.

Pācittiya 152. Pahārasikkhāpadaṁ

Yā pana bhikkhunī bhikkhuniyā kupitā anattamanā pahāraṁ dadeyya, pācittiyaṁ.

Pācittiya 153. Talasattikasikkhāpadaṁ

Yā pana bhikkhunī bhikkhuniyā kupitā anattamanā talasattikaṁ uggireyya, pācittiyaṁ.

Pācittiya 154. Amūlakasikkhāpadaṁ

Yā pana bhikkhunī bhikkhuniṁ amūlakena saṅghādisesena anuddhaṁseyya, pācittiyaṁ.

Pācittiya 155. Sañciccasikkhāpadaṁ

Yā pana bhikkhunī bhikkhuniyā sañcicca kukkuccaṁ upadaheyya, “itissā muhuttampi aphāsu bhavissatī”ti etadeva paccayaṁ karitvā anaññaṁ, pācittiyaṁ.

Pācittiya 156. Upassuti sikkhāpadaṁ

Yā pana bhikkhunī bhikkhunīnaṁ bhaṇḍanajātānaṁ kalahajātānaṁ vivādāpannānaṁ upassutiṁ tiṭṭheyya, “yaṁ imā bhaṇissanti, taṁ sossāmī”ti etadeva paccayaṁ karitvā anaññaṁ, pācittiyaṁ.

Diṭṭhivaggo pannarasamo.

Dhammikavaggo

Pācittiya 157. Kammappaṭibāhanasikkhāpadaṁ

Yā pana bhikkhunī dhammikānaṁ kammānaṁ chandaṁ datvā pacchā khīyanadhammaṁ āpajjeyya, pācittiyaṁ.

Pācittiya 158. Chandaṁadatvāgamanasikkhāpadaṁ

Yā pana bhikkhunī saṅghe vinicchayakathāya vattamānāya chandaṁ adatvā uṭṭhāyāsanā pakkameyya, pācittiyaṁ.

Pācittiya 159. Dubbalasikkhāpadaṁ

Yā pana bhikkhunī samaggena saṅghena cīvaraṁ datvā pacchā khīyanadhammaṁ āpajjeyya, “yathāsanthutaṁ bhikkhuniyo saṅghikaṁ lābhaṁ pariṇāmentī”ti, pācittiyaṁ.

Pācittiya 160. Pariṇāmanasikkhāpadaṁ

Yā pana bhikkhunī jānaṁ saṅghikaṁ lābhaṁ pariṇataṁ puggalassa pariṇāmeyya, pācittiyaṁ.

Pācittiya 161. Ratanasikkhāpadaṁ

Yā pana bhikkhunī ratanaṁ vā ratanasammataṁ vā aññatra ajjhārāmā vā ajjhāvasathā vā uggaṇheyya vā uggaṇhāpeyya vā, pācittiyaṁ.

Ratanaṁ vā pana bhikkhuniyā ratanasammataṁ vā ajjhārāme vā ajjhāvasathe vā uggahetvā vā uggahāpetvā vā nikkhipitabbaṁ, “yassa bhavissati, so harissatī”ti, ayaṁ tattha sāmīci.

Pācittiya 162. Sūcigharasikkhāpadaṁ

Yā pana bhikkhunī aṭṭhimayaṁ vā dantamayaṁ vā visāṇamayaṁ vā sūcigharaṁ kārāpeyya, bhedanakaṁ pācittiyaṁ.

Pācittiya 163. Mañcapīṭhasikkhāpadaṁ

Navaṁ pana bhikkhuniyā mañcaṁ vā pīṭhaṁ vā kārayamānāya aṭṭhaṅgulapādakaṁ kāretabbaṁ sugataṅgulena aññatra heṭṭhimāya aṭaniyā. Taṁ atikkāmentiyā chedanakaṁ pācittiyaṁ.

Pācittiya 164. Tūlonaddhasikkhāpadaṁ

Yā pana bhikkhunī mañcaṁ vā pīṭhaṁ vā tūlonaddhaṁ kārāpeyya, uddālanakaṁ pācittiyaṁ.

Pācittiya 165. Kaṇḍuppaṭicchādisikkhāpadaṁ

Kaṇḍuppaṭicchādiṁ pana bhikkhuniyā kārayamānāya pamāṇikā kāretabbā, tatridaṁ pamāṇaṁ, dīghaso catasso vidatthiyo sugatavidatthiyā, tiriyaṁ dve vidatthiyo. Taṁ atikkāmentiyā chedanakaṁ pācittiyaṁ.

Pācittiya 166. Nandasikkhāpadaṁ

Yā pana bhikkhunī sugatacīvarappamāṇaṁ cīvaraṁ kārāpeyya, atirekaṁ vā, chedanakaṁ pācittiyaṁ.

Tatridaṁ sugatassa sugatacīvarappamāṇaṁ, dīghaso nava vidatthiyo sugatavidatthiyā, tiriyaṁ cha vidatthiyo, idaṁ sugatassa sugatacīvarappamāṇanti.

Dhammikavaggo soḷasamo.

Uddiṭṭhā kho, ayyāyo, chasaṭṭhisatā pācittiyā dhammā.

Tatthāyyāyo pucchāmi, kaccittha parisuddhā,

dutiyampi pucchāmi, kaccittha parisuddhā,

tatiyampi pucchāmi, kaccittha parisuddhā,

parisuddhetthāyyāyo, tasmā tuṇhī, evametaṁ dhārayāmīti.

Pācittiyā niṭṭhitā.

Pāṭidesanīyā

Ime kho panāyyāyo aṭṭha pāṭidesanīyā dhammā uddesaṁ āgacchanti.

Pāṭidesanīya 1. Sappiviññāpanasikkhāpadaṁ

Yā pana bhikkhunī agilānā sappiṁ viññāpetvā bhuñjeyya, paṭidesetabbaṁ tāya bhikkhuniyā:

“gārayhaṁ, ayye, dhammaṁ āpajjiṁ asappāyaṁ pāṭidesanīyaṁ, taṁ paṭidesemī”ti.

Pāṭidesanīya 2. Telaviññāpanasikkhāpadaṁ

Yā pana bhikkhunī agilānā telaṁ viññāpetvā bhuñjeyya …pe…

taṁ paṭidesemīti.

Pāṭidesanīya 3. Madhuviññāpanasikkhāpadaṁ

Yā pana bhikkhunī agilānā madhuṁ viññāpetvā bhuñjeyya …pe…

taṁ paṭidesemīti.

Pāṭidesanīya 4. Phāṇitaviññāpanasikkhāpadaṁ

Yā pana bhikkhunī agilānā phāṇitaṁ viññāpetvā bhuñjeyya …pe…

taṁ paṭidesemīti.

Pāṭidesanīya 5. Macchaviññāpanasikkhāpadaṁ

Yā pana bhikkhunī agilānā macchaṁ viññāpetvā bhuñjeyya …pe…

taṁ paṭidesemīti.

Pāṭidesanīya 6. Maṁsaviññāpanasikkhāpadaṁ

Yā pana bhikkhunī agilānā maṁsaṁ viññāpetvā bhuñjeyya …pe…

taṁ paṭidesemīti.

Pāṭidesanīya 7. Khīraviññāpanasikkhāpadaṁ

Yā pana bhikkhunī agilānā khīraṁ viññāpetvā bhuñjeyya …pe…

taṁ paṭidesemīti.

Pāṭidesanīya 8. Dadhiviññāpanasikkhāpadaṁ

Yā pana bhikkhunī agilānā dadhiṁ viññāpetvā bhuñjeyya, paṭidesetabbaṁ tāya bhikkhuniyā:

“gārayhaṁ, ayye, dhammaṁ āpajjiṁ asappāyaṁ pāṭidesanīyaṁ, taṁ paṭidesemī”ti.

Uddiṭṭhā kho, ayyāyo, aṭṭha pāṭidesanīyā dhammā.

Tatthāyyāyo pucchāmi, kaccittha parisuddhā,

dutiyampi pucchāmi, kaccittha parisuddhā,

tatiyampi pucchāmi, kaccittha parisuddhā,

parisuddhetthāyyāyo, tasmā tuṇhī, evametaṁ dhārayāmīti.

Pāṭidesanīyā niṭṭhitā.

Sekhiyā

Ime kho panāyyāyo, sekhiyā dhammā uddesaṁ āgacchanti.

Parimaṇḍalavaggo

Sekhiya 1. Parimaṇḍalasikkhāpadaṁ

Parimaṇḍalaṁ nivāsessāmīti sikkhā karaṇīyā.

Sekhiya 2. Dutiyaparimaṇḍalasikkhāpadaṁ

Parimaṇḍalaṁ pārupissāmīti sikkhā karaṇīyā.

Sekhiya 3. Suppaṭicchannasikkhāpadaṁ

Suppaṭicchannā antaraghare gamissāmīti sikkhā karaṇīyā.

Sekhiya 4. Dutiyasuppaṭicchannasikkhāpadaṁ

Suppaṭicchannā antaraghare nisīdissāmīti sikkhā karaṇīyā.

Sekhiya 5. Susaṁvutasikkhāpadaṁ

Susaṁvutā antaraghare gamissāmīti sikkhā karaṇīyā.

Sekhiya 6. Dutiyasusaṁvutasikkhāpadaṁ

Susaṁvutā antaraghare nisīdissāmīti sikkhā karaṇīyā.

Sekhiya 7. Okkhittacakkhusikkhāpadaṁ

Okkhittacakkhunī antaraghare gamissāmīti sikkhā karaṇīyā.

Sekhiya 8. Dutiya-okkhittacakkhusikkhāpadaṁ

Okkhittacakkhunī antaraghare nisīdissāmīti sikkhā karaṇīyā.

Sekhiya 9. Ukkhittakasikkhāpadaṁ

Na ukkhittakāya antaraghare gamissāmīti sikkhā karaṇīyā.

Sekhiya 10. Dutiya-ukkhittakasikkhāpadaṁ

Na ukkhittakāya antaraghare nisīdissāmīti sikkhā karaṇīyā.

Parimaṇḍalavaggo paṭhamo.

Ujjagghikavaggo

Sekhiya 11. Ujjagghikasikkhāpadaṁ

Na ujjagghikāya antaraghare gamissāmīti sikkhā karaṇīyā.

Sekhiya 12. Dutiya-ujjagghikasikkhāpadaṁ

Na ujjagghikāya antaraghare nisīdissāmīti sikkhā karaṇīyā.

Sekhiya 13. Uccasaddasikkhāpadaṁ

Appasaddā antaraghare gamissāmīti sikkhā karaṇīyā.

Sekhiya 14. Dutiya-uccasaddasikkhāpadaṁ

Appasaddā antaraghare nisīdissāmīti sikkhā karaṇīyā.

Sekhiya 15. Kāyappacālakasikkhāpadaṁ

Na kāyappacālakaṁ antaraghare gamissāmīti sikkhā karaṇīyā.

Sekhiya 16. Dutiyakāyappacālakasikkhāpadaṁ

Na kāyappacālakaṁ antaraghare nisīdissāmīti sikkhā karaṇīyā.

Sekhiya 17. Bāhuppacālakasikkhāpadaṁ

Na bāhuppacālakaṁ antaraghare gamissāmīti sikkhā karaṇīyā.

Sekhiya 18. Dutiyabāhuppacālakasikkhāpadaṁ

Na bāhuppacālakaṁ antaraghare nisīdissāmīti sikkhā karaṇīyā.

Sekhiya 19. Sīsappacālakasikkhāpadaṁ

Na sīsappacālakaṁ antaraghare gamissāmīti sikkhā karaṇīyā.

Sekhiya 20. Dutiyasīsappacālakasikkhāpadaṁ

Na sīsappacālakaṁ antaraghare nisīdissāmīti sikkhā karaṇīyā.

Ujjagghikavaggo dutiyo.

Khambhakatavaggo

Sekhiya 21. Khambhakatasikkhāpadaṁ

Na khambhakatā antaraghare gamissāmīti sikkhā karaṇīyā.

Sekhiya 22. Dutiyakhambhakatasikkhāpadaṁ

Na khambhakatā antaraghare nisīdissāmīti sikkhā karaṇīyā.

Sekhiya 23. Oguṇṭhitasikkhāpadaṁ

Na oguṇṭhitā antaraghare gamissāmīti sikkhā karaṇīyā.

Sekhiya 24. Dutiya-oguṇṭhitasikkhāpadaṁ

Na oguṇṭhitā antaraghare nisīdissāmīti sikkhā karaṇīyā.

Sekhiya 25. Ukkuṭikasikkhāpadaṁ

Na ukkuṭikāya antaraghare gamissāmīti sikkhā karaṇīyā.

Sekhiya 26. Pallatthikasikkhāpadaṁ

Na pallatthikāya antaraghare nisīdissāmīti sikkhā karaṇīyā.

Sekhiya 27. Sakkaccapaṭiggahaṇasikkhāpadaṁ

Sakkaccaṁ piṇḍapātaṁ paṭiggahessāmīti sikkhā karaṇīyā.

Sekhiya 28. Pattasaññinīpaṭiggahaṇasikkhāpadaṁ

Pattasaññinī piṇḍapātaṁ paṭiggahessāmīti sikkhā karaṇīyā.

Sekhiya 29. Samasūpakapaṭiggahaṇasikkhāpadaṁ

Samasūpakaṁ piṇḍapātaṁ paṭiggahessāmīti sikkhā karaṇīyā.

Sekhiya 30. Samatittikasikkhāpadaṁ

Samatittikaṁ piṇḍapātaṁ paṭiggahessāmīti sikkhā karaṇīyā.

Khambhakatavaggo tatiyo.

Sakkaccavaggo

Sekhiya 31. Sakkaccabhuñjanasikkhāpadaṁ

Sakkaccaṁ piṇḍapātaṁ bhuñjissāmīti sikkhā karaṇīyā.

Sekhiya 32. Pattasaññinībhuñjanasikkhāpadaṁ

Pattasaññinī piṇḍapātaṁ bhuñjissāmīti sikkhā karaṇīyā.

Sekhiya 33. Sapadānasikkhāpadaṁ

Sapadānaṁ piṇḍapātaṁ bhuñjissāmīti sikkhā karaṇīyā.

Sekhiya 34. Samasūpakasikkhāpadaṁ

Samasūpakaṁ piṇḍapātaṁ bhuñjissāmīti sikkhā karaṇīyā.

Sekhiya 35. Na thūpakatasikkhāpadaṁ

Na thūpakato omadditvā piṇḍapātaṁ bhuñjissāmīti sikkhā karaṇīyā.

Sekhiya 36. Odanappaṭicchādanasikkhāpadaṁ

Na sūpaṁ vā byañjanaṁ vā odanena paṭicchādessāmi bhiyyokamyataṁ upādāyāti sikkhā karaṇīyā.

Sekhiya 37. Sūpodanaviññattisikkhāpadaṁ

Na sūpaṁ vā odanaṁ vā agilānā attano atthāya viññāpetvā bhuñjissāmīti sikkhā karaṇīyā.

Sekhiya 38. Ujjhānasaññinīsikkhāpadaṁ

Na ujjhānasaññinī paresaṁ pattaṁ olokessāmīti sikkhā karaṇīyā.

Sekhiya 39. Kabaḷasikkhāpadaṁ

Nātimahantaṁ kabaḷaṁ karissāmīti sikkhā karaṇīyā.

Sekhiya 40. Ālopasikkhāpadaṁ

Parimaṇḍalaṁ ālopaṁ karissāmīti sikkhā karaṇīyā.

Sakkaccavaggo catuttho.

Kabaḷavaggo

Sekhiya 41. Anāhaṭasikkhāpadaṁ

Na anāhaṭe kabaḷe mukhadvāraṁ vivarissāmīti sikkhā karaṇīyā.

Sekhiya 42. Bhuñjamānasikkhāpadaṁ

Na bhuñjamānā sabbahatthaṁ mukhe pakkhipissāmīti sikkhā karaṇīyā.

Sekhiya 43. Sakabaḷasikkhāpadaṁ

Na sakabaḷena mukhena byāharissāmīti sikkhā karaṇīyā.

Sekhiya 44. Piṇḍukkhepakasikkhāpadaṁ

Na piṇḍukkhepakaṁ bhuñjissāmīti sikkhā karaṇīyā.

Sekhiya 45. Kabaḷāvacchedakasikkhāpadaṁ

Na kabaḷāvacchedakaṁ bhuñjissāmīti sikkhā karaṇīyā.

Sekhiya 46. Avagaṇḍakārakasikkhāpadaṁ

Na avagaṇḍakārakaṁ bhuñjissāmīti sikkhā karaṇīyā.

Sekhiya 47. Hatthaniddhunakasikkhāpadaṁ

Na hatthaniddhunakaṁ bhuñjissāmīti sikkhā karaṇīyā.

Sekhiya 48. Sitthāvakārakasikkhāpadaṁ

Na sitthāvakārakaṁ bhuñjissāmīti sikkhā karaṇīyā.

Sekhiya 49. Jivhānicchārakasikkhāpadaṁ

Na jivhānicchārakaṁ bhuñjissāmīti sikkhā karaṇīyā.

Sekhiya 50. Capucapukārakasikkhāpadaṁ

Na capucapukārakaṁ bhuñjissāmīti sikkhā karaṇīyā.

Kabaḷavaggo pañcamo.

Surusuruvaggo

Sekhiya 51. Surusurukārakasikkhāpadaṁ

Na surusurukārakaṁ bhuñjissāmīti sikkhā karaṇīyā.

Sekhiya 52. Hatthanillehakasikkhāpadaṁ

Na hatthanillehakaṁ bhuñjissāmīti sikkhā karaṇīyā.

Sekhiya 53. Pattanillehakasikkhāpadaṁ

Na pattanillehakaṁ bhuñjissāmīti sikkhā karaṇīyā.

Sekhiya 54. Oṭṭhanillehakasikkhāpadaṁ

Na oṭṭhanillehakaṁ bhuñjissāmīti sikkhā karaṇīyā.

Sekhiya 55. Sāmisasikkhāpadaṁ

Na sāmisena hatthena pānīyathālakaṁ paṭiggahessāmīti sikkhā karaṇīyā.

Sekhiya 56. Sasitthakasikkhāpadaṁ

Na sasitthakaṁ pattadhovanaṁ antaraghare chaḍḍessāmīti sikkhā karaṇīyā.

Sekhiya 57. Chattapāṇisikkhāpadaṁ

Na chattapāṇissa agilānassa dhammaṁ desessāmīti sikkhā karaṇīyā.

Sekhiya 58. Daṇḍapāṇisikkhāpadaṁ

Na daṇḍapāṇissa agilānassa dhammaṁ desessāmīti sikkhā karaṇīyā.

Sekhiya 59. Satthapāṇisikkhāpadaṁ

Na satthapāṇissa agilānassa dhammaṁ desessāmīti sikkhā karaṇīyā.

Sekhiya 60. Āvudhapāṇisikkhāpadaṁ

Na āvudhapāṇissa agilānassa dhammaṁ desessāmīti sikkhā karaṇīyā.

Surusuruvaggo chaṭṭho.

Pādukavaggo

Sekhiya 61. Pādukasikkhāpadaṁ

Na pādukāruḷhassa agilānassa dhammaṁ desessāmīti sikkhā karaṇīyā.

Sekhiya 62. Upāhanasikkhāpadaṁ

Na upāhanāruḷhassa agilānassa dhammaṁ desessāmīti sikkhā karaṇīyā.

Sekhiya 63. Yānasikkhāpadaṁ

Na yānagatassa agilānassa dhammaṁ desessāmīti sikkhā karaṇīyā.

Sekhiya 64. Sayanasikkhāpadaṁ

Na sayanagatassa agilānassa dhammaṁ desessāmīti sikkhā karaṇīyā.

Sekhiya 65. Pallatthikasikkhāpadaṁ

Na pallatthikāya nisinnassa agilānassa dhammaṁ desessāmīti sikkhā karaṇīyā.

Sekhiya 66. Veṭhitasikkhāpadaṁ

Na veṭhitasīsassa agilānassa dhammaṁ desessāmīti sikkhā karaṇīyā.

Sekhiya 67. Oguṇṭhitasikkhāpadaṁ

Na oguṇṭhitasīsassa agilānassa dhammaṁ desessāmīti sikkhā karaṇīyā.

Sekhiya 68. Chamāsikkhāpadaṁ

Na chamāyaṁ nisīditvā āsane nisinnassa agilānassa dhammaṁ desessāmīti sikkhā karaṇīyā.

Sekhiya 69. Nīcāsanasikkhāpadaṁ

Na nīce āsane nisīditvā ucce āsane nisinnassa agilānassa dhammaṁ desessāmīti sikkhā karaṇīyā.

Sekhiya 70. Ṭhitāsikkhāpadaṁ

Na ṭhitā nisinnassa agilānassa dhammaṁ desessāmīti sikkhā karaṇīyā.

Sekhiya 71. Pacchatogacchantīsikkhāpadaṁ

Na pacchato gacchantī purato gacchantassa agilānassa dhammaṁ desessāmīti sikkhā karaṇīyā.

Sekhiya 72. Uppathenagacchantīsikkhāpadaṁ

Na uppathena gacchantī pathena gacchantassa agilānassa dhammaṁ desessāmīti sikkhā karaṇīyā.

Sekhiya 73. Ṭhitāuccārasikkhāpadaṁ

Na ṭhitā agilānā uccāraṁ vā passāvaṁ vā karissāmīti sikkhā karaṇīyā.

Sekhiya 74. Hariteuccārasikkhāpadaṁ

Na harite agilānā uccāraṁ vā passāvaṁ vā kheḷaṁ vā karissāmīti sikkhā karaṇīyā.

Sekhiya 75. Udakeuccārasikkhāpadaṁ

Na udake agilānā uccāraṁ vā passāvaṁ vā kheḷaṁ vā karissāmīti sikkhā karaṇīyā.

Pādukavaggo sattamo.

Uddiṭṭhā kho, ayyāyo, sekhiyā dhammā.

Tatthāyyāyo pucchāmi, kaccittha parisuddhā,

dutiyampi pucchāmi, kaccittha parisuddhā,

tatiyampi pucchāmi, kaccittha parisuddhā,

parisuddhetthāyyāyo, tasmā tuṇhī, evametaṁ dhārayāmīti.

Sekhiyā niṭṭhitā.

Adhikaraṇasamathā

Ime kho panāyyāyo, satta adhikaraṇasamathā dhammā uddesaṁ āgacchanti.

Adhikaraṇasamatha 1

Sammukhāvinayo dātabbo.

Adhikaraṇasamatha 2

Sativinayo dātabbo.

Adhikaraṇasamatha 3

Amūḷhavinayo dātabbo.

Adhikaraṇasamatha 4

Paṭiññāya kāretabbaṁ.

Adhikaraṇasamatha 5

Yebhuyyasikā.

Adhikaraṇasamatha 6

Tassapāpiyasikā.

Adhikaraṇasamatha 7

Tiṇavatthārakoti.

Uddiṭṭhā kho ayyāyo satta adhikaraṇasamathā dhammā.

Tatthāyyāyo pucchāmi, kaccittha parisuddhā,

dutiyampi pucchāmi, kaccittha parisuddhā,

tatiyampi pucchāmi, kaccittha parisuddhā,

parisuddhetthāyyāyo, tasmā tuṇhī, evametaṁ dhārayāmīti.

Adhikaraṇasamathā niṭṭhitā.

Uddiṭṭhaṁ kho ayyāyo nidānaṁ

uddiṭṭhā aṭṭha pārājikā dhammā,

uddiṭṭhā sattarasa saṅghādisesā dhammā,

uddiṭṭhā tiṁsa nissaggiyā pācittiyā dhammā,

uddiṭṭhā chasaṭṭhi satā pācittiyā dhammā,

uddiṭṭhā aṭṭha pāṭidesanīyā dhammā,

uddiṭṭhā sekhiyā dhammā,

uddiṭṭhā satta adhikaraṇasamathā dhammā.

Ettakaṁ tassa bhagavato suttāgataṁ suttapariyāpannaṁ anvaddhamāsaṁ uddesaṁ āgacchati.

Tattha sabbāheva samaggāhi sammodamānāhi avivadamānāhi sikkhitabbanti.

Vitthāruddeso catuttho.

Bhikkhunipātimokkhaṁ niṭṭhitaṁ.

Namo tassa bhagavato arahato sammāsambuddhassa