Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Khuddaka Nikāya · Milindapañha
5. Asaṅkamanapaṭisandahanapañha (MIL3.5.5)
- Thông tin
- Mã SuttaCentral: MIL3.5.5
Milindapañha
Buddhavagga
5. Asaṅkamanapaṭisandahanapañha
Rājā āha—
“bhante nāgasena, na ca saṅkamati paṭisandahati cā”ti?
“Āma, mahārāja, na ca saṅkamati paṭisandahati cā”ti.
“Kathaṁ, bhante nāgasena, na ca saṅkamati paṭisandahati ca, opammaṁ karohī”ti?
“Yathā, mahārāja, kocideva puriso padīpato padīpaṁ padīpeyya, kiṁ nu kho so, mahārāja, padīpo padīpamhā saṅkanto”ti?
“Na hi, bhante”ti.
“Evameva kho, mahārāja, na ca saṅkamati paṭisandahati cā”ti.
“Bhiyyo opammaṁ karohī”ti.
“Abhijānāsi nu tvaṁ, mahārāja, daharako santo silokācariyassa santike kiñci silokaṁ gahitan”ti?
“Āma, bhante”ti.
“Kiṁ nu kho, mahārāja, so siloko ācariyamhā saṅkanto”ti?
“Na hi, bhante”ti.
“Evameva kho, mahārāja, na ca saṅkamati paṭisandahati cā”ti.
“Kallosi, bhante nāgasenā”ti.
Asaṅkamanapaṭisandahanapañho pañcamo.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.