Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Khuddaka Nikāya · Milindapañha
16. Nānādhammānaṁekakiccaabhinipphādanapañha (MIL3.1.16)
- Thông tin
- Mã SuttaCentral: MIL3.1.16
Milindapañha
Mahāvagga
16. Nānādhammānaṁekakiccaabhinipphādanapañha
Rājā āha—
“bhante nāgasena, ime dhammā nānā santā ekaṁ atthaṁ abhinipphādentī”ti?
“Āma, mahārāja, ime dhammā nānā santā ekaṁ atthaṁ abhinipphādenti, kilese hanantī”ti.
“Kathaṁ, bhante, ime dhammā nānā santā ekaṁ atthaṁ abhinipphādenti, kilese hananti?
Opammaṁ karohī”ti.
“Yathā, mahārāja, senā nānā santā hatthī ca assā ca rathā ca pattī ca ekaṁ atthaṁ abhinipphādenti, saṅgāme parasenaṁ abhivijinanti;
evameva kho, mahārāja, ime dhammā nānā santā ekaṁ atthaṁ abhinipphādenti, kilese hanantī”ti.
“Kallosi, bhante nāgasenā”ti.
Nānādhammānaṁ ekakiccaabhinipphādanapañho soḷasamo.
Mahāvaggo paṭhamo.
Imasmiṁ vagge soḷasa pañhā.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.