11. Sampakkhandanalakkhaṇasaddhāpañha (MIL3.1.11)

Milindapañha

Mahāvagga

11. Sampakkhandanalakkhaṇasaddhāpañha

“Kathaṁ, bhante, sampakkhandanalakkhaṇā saddhā”ti?

“Yathā, mahārāja, yogāvacaro aññesaṁ cittaṁ vimuttaṁ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṁ karoti appattassa pattiyā anadhigatassa adhigamāya asacchikatassa sacchikiriyāya.

Evaṁ kho, mahārāja, sampakkhandanalakkhaṇā saddhā”ti.

“Opammaṁ karohī”ti.

“Yathā, mahārāja, uparipabbate mahāmegho abhippavasseyya, taṁ udakaṁ yathāninnaṁ pavattamānaṁ pabbatakandarapadarasākhā paripūretvā nadiṁ paripūreyya, sā ubhato kūlāni saṁvissandantī gaccheyya, atha mahājanakāyo āgantvā tassā nadiyā uttānataṁ vā gambhīrataṁ vā ajānanto bhīto vitthato tīre tiṭṭheyya, athaññataro puriso āgantvā attano thāmañca balañca sampassanto gāḷhaṁ kacchaṁ bandhitvā pakkhanditvā tareyya, taṁ tiṇṇaṁ passitvā mahājanakāyopi tareyya;

evameva kho, mahārāja, yogāvacaro aññesaṁ cittaṁ vimuttaṁ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṁ karoti appattassa pattiyā anadhigatassa adhigamāya asacchikatassa sacchikiriyāya.

Evaṁ kho, mahārāja, sampakkhandanalakkhaṇā saddhāti.

Bhāsitampetaṁ, mahārāja, bhagavatā saṁyuttanikāyavare—

‘Saddhāya taratī oghaṁ,

appamādena aṇṇavaṁ;

Vīriyena dukkhamacceti,

paññāya parisujjhatī’”ti.

“Kallosi, bhante nāgasenā”ti.

Sampakkhandanalakkhaṇasaddhāpañho ekādasamo.