Puggalakathā (KV1.1)

Kathāvatthu

Mahāpaṇṇāsaka

Paṭhamavagga

Puggalakathā

1. Anulomapaccanīka

Namo tassa Bhagavato Arahato Sammāsambuddhassa.

Puggalo upalabbhati saccikaṭṭhaparamatthenāti?

Āmantā.

Yo saccikaṭṭho paramattho, tato so puggalo upalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti micchā.

Anulomapañcakaṁ.

Puggalo nupalabbhati saccikaṭṭhaparamatthenāti?

Āmantā.

Yo saccikaṭṭho paramattho, tato so puggalo nupalabbhati saccikaṭṭhaparamatthenāti?

Na hevaṁ vattabbe.

Ājānāhi paṭikammaṁ.

Hañci puggalo nupalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti micchā.

Paṭikammacatukkaṁ.

Tvañce pana maññasi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti, tena tava tattha hetāya paṭiññāya hevaṁ paṭijānantaṁ hevaṁ niggahetabbe.

Atha taṁ niggaṇhāma.

Suniggahito ca hosi.

Hañci puggalo nupalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti idaṁ te micchā.

Niggahacatukkaṁ.

Ese ce dunniggahite hevamevaṁ tattha dakkha.

Vattabbe kho—

“puggalo upalabbhati saccikaṭṭhaparamatthena”, no ca vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti.

No ca mayaṁ tayā tattha hetāya paṭiññāya hevaṁ paṭijānantā hevaṁ niggahetabbā.

Atha maṁ niggaṇhāsi.

Dunniggahitā ca homa.

Hañci puggalo upalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti idaṁ te micchā.

Upanayanacatukkaṁ.

Na hevaṁ niggahetabbe.

Tena hi yaṁ niggaṇhāsi—

“hañci puggalo upalabbhati saccikaṭṭhaparamatthena, tena vata re vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’ti.

Yaṁ tattha vadesi—

‘vattabbe kho—

puggalo upalabbhati saccikaṭṭhaparamatthena, no ca vattabbe—

yo saccikaṭṭho paramattho, tato so puggalo upalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti idaṁ te micchā.

Tena hi ye kate niggahe se niggahe dukkaṭe.

Sukate paṭikamme.

Sukatā paṭipādanāti.

Niggamanacatukkaṁ.

Paṭhamo niggaho.

2. Paccanīkānuloma

Puggalo nupalabbhati saccikaṭṭhaparamatthenāti?

Āmantā.

Yo saccikaṭṭho paramattho, tato so puggalo nupalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo nupalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti micchā.

Paccanīkapañcakaṁ.

Puggalo upalabbhati saccikaṭṭhaparamatthenāti?

Āmantā.

Yo saccikaṭṭho paramattho, tato so puggalo upalabbhati saccikaṭṭhaparamatthenāti?

Na hevaṁ vattabbe.

Ājānāhi paṭikammaṁ.

Hañci puggalo upalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti micchā.

Paṭikammacatukkaṁ.

Tvañce pana maññasi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti, tena tava tattha hetāya paṭiññāya hevaṁ paṭijānantaṁ hevaṁ niggahetabbe.

Atha taṁ niggaṇhāma, suniggahito ca hosi.

Hañci puggalo upalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo upalabbhati saccikaṭṭhaparamatthenā’”ti idaṁ te micchā.

Niggahacatukkaṁ.

Ese ce dunniggahite hevamevaṁ tattha dakkha.

Vattabbe kho—

“puggalo nupalabbhati saccikaṭṭhaparamatthena”, no ca vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti.

No ca mayaṁ tayā tattha hetāya paṭiññāya hevaṁ paṭijānantā hevaṁ niggahetabbā.

Atha maṁ niggaṇhāsi, dunniggahitā ca homa.

Hañci puggalo nupalabbhati saccikaṭṭhaparamatthena, tena vata re vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti idaṁ te micchā.

Upanayanacatukkaṁ.

Na hevaṁ niggahetabbe.

Tena hi yaṁ niggaṇhāsi—

“hañci puggalo nupalabbhati saccikaṭṭhaparamatthena, tena vata re vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’ti.

Yaṁ tattha vadesi—

‘vattabbe kho—

puggalo nupalabbhati saccikaṭṭhaparamatthena, no ca vattabbe—

yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti micchā.

No ce pana vattabbe—

“yo saccikaṭṭho paramattho, tato so puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘yo saccikaṭṭho paramattho, tato so puggalo nupalabbhati saccikaṭṭhaparamatthenā’”ti idaṁ te micchā.

Tena hi ye kate niggahe se niggahe dukkaṭe.

Sukate paṭikamme, sukatā paṭipādanāti.

Niggamanacatukkaṁ.

Dutiyo niggaho.

Okāsasaccikaṭṭha

1. Anulomapaccanīka

Puggalo upalabbhati saccikaṭṭhaparamatthenāti?

Āmantā.

Sabbattha puggalo upalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“sabbattha puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘sabbattha puggalo upalabbhati saccikaṭṭhaparamatthenā’”ti micchā.

No ce pana vattabbe—

“sabbattha puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘sabbattha puggalo upalabbhati saccikaṭṭhaparamatthenā’”ti micchā …pe….

Tatiyo niggaho.

Kālasaccikaṭṭha

1. Anulomapaccanīka

Puggalo upalabbhati saccikaṭṭhaparamatthenāti?

Āmantā.

Sabbadā puggalo upalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“sabbadā puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘sabbadā puggalo upalabbhati saccikaṭṭhaparamatthenā’”ti micchā.

No ce pana vattabbe—

“sabbadā puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘sabbadā puggalo upalabbhati saccikaṭṭhaparamatthenā’”ti micchā …pe….

Catuttho niggaho.

Avayavasaccikaṭṭha

1. Anulomapaccanīka

Puggalo upalabbhati saccikaṭṭhaparamatthenāti?

Āmantā.

Sabbesu puggalo upalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“sabbesu puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘sabbesu puggalo upalabbhati saccikaṭṭhaparamatthenā’”ti micchā.

No ce pana vattabbe—

“sabbesu puggalo upalabbhati saccikaṭṭhaparamatthenā”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘sabbesu puggalo upalabbhati saccikaṭṭhaparamatthenā’”ti micchā …pe….

Pañcamo niggaho.

1. Paccanīkānuloma

Puggalo nupalabbhati saccikaṭṭhaparamatthenāti?

Āmantā.

Sabbattha puggalo nupalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo nupalabbhati saccikaṭṭhaparamatthena, tena vata re vattabbe—

“sabbattha puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘sabbattha puggalo nupalabbhati saccikaṭṭhaparamatthenā’”ti micchā.

No ce pana vattabbe—

“sabbattha puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘sabbattha puggalo nupalabbhati saccikaṭṭhaparamatthenā’”ti micchā …pe….

Chaṭṭho niggaho.

1. Paccanīkānuloma

Puggalo nupalabbhati saccikaṭṭhaparamatthenāti?

Āmantā.

Sabbadā puggalo nupalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo nupalabbhati saccikaṭṭhaparamatthena, tena vata re vattabbe—

“sabbadā puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘sabbadā puggalo nupalabbhati saccikaṭṭhaparamatthenā’”ti micchā.

No ce pana vattabbe—

“sabbadā puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘sabbadā puggalo nupalabbhati saccikaṭṭhaparamatthenā’”ti micchā …pe….

Sattamo niggaho.

1. Paccanīkānuloma

Puggalo nupalabbhati saccikaṭṭhaparamatthenāti?

Āmantā.

Sabbesu puggalo nupalabbhati saccikaṭṭhaparamatthenāti?

Na hevaṁ vattabbe.

Ājānāhi niggahaṁ.

Hañci puggalo nupalabbhati saccikaṭṭhaparamatthena, tena vata re vattabbe—

“sabbesu puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘sabbesu puggalo nupalabbhati saccikaṭṭhaparamatthenā’”ti micchā.

No ce pana vattabbe—

“sabbesu puggalo nupalabbhati saccikaṭṭhaparamatthenā”ti, no ca vata re vattabbe—

“puggalo nupalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo nupalabbhati saccikaṭṭhaparamatthena’, no ca vattabbe—

‘sabbesu puggalo nupalabbhati saccikaṭṭhaparamatthenā’”ti micchā …pe….

Aṭṭhakaniggaho.

Suddhikasaṁsandana

Puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthenāti?

Āmantā.

Aññaṁ rūpaṁ añño puggaloti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena, tena vata re vattabbe—

“aññaṁ rūpaṁ añño puggalo”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā.

No ce pana vattabbe—

“aññaṁ rūpaṁ añño puggalo”ti, no ca vata re vattabbe—

“puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā …pe….

Puggalo upalabbhati saccikaṭṭhaparamatthena, vedanā ca upalabbhati saccikaṭṭhaparamatthena …pe…

saññā ca upalabbhati …pe…

saṅkhārā ca upalabbhanti …pe…

viññāṇañca upalabbhati saccikaṭṭhaparamatthenāti?

Āmantā.

Aññaṁ viññāṇaṁ añño puggaloti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena, tena vata re vattabbe—

“aññaṁ viññāṇaṁ añño puggalo”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena’, no ca vattabbe—

‘aññaṁ viññāṇaṁ añño puggalo’”ti micchā.

No ce pana vattabbe—

“aññaṁ viññāṇaṁ añño puggalo”ti, no ca vata re vattabbe—

“puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena’, no ca vattabbe—

‘aññaṁ viññāṇaṁ añño puggalo’”ti micchā …pe….

Puggalo upalabbhati saccikaṭṭhaparamatthena, cakkhāyatanañca upalabbhati saccikaṭṭhaparamatthena …pe…

sotāyatanañca upalabbhati … ghānāyatanañca upalabbhati … jivhāyatanañca upalabbhati … kāyāyatanañca upalabbhati … rūpāyatanañca upalabbhati … saddāyatanañca upalabbhati … gandhāyatanañca upalabbhati … rasāyatanañca upalabbhati … phoṭṭhabbāyatanañca upalabbhati … manāyatanañca upalabbhati … dhammāyatanañca upalabbhati saccikaṭṭhaparamatthena …pe….

Cakkhudhātu ca upalabbhati saccikaṭṭhaparamatthena …pe…

sotadhātu ca upalabbhati … ghānadhātu ca upalabbhati … jivhādhātu ca upalabbhati … kāyadhātu ca upalabbhati … rūpadhātu ca upalabbhati … saddadhātu ca upalabbhati … gandhadhātu ca upalabbhati … rasadhātu ca upalabbhati … phoṭṭhabbadhātu ca upalabbhati … cakkhuviññāṇadhātu ca upalabbhati … sotaviññāṇadhātu ca upalabbhati … ghānaviññāṇadhātu ca upalabbhati … jivhāviññāṇadhātu ca upalabbhati … kāyaviññāṇadhātu ca upalabbhati … manodhātu ca upalabbhati … manoviññāṇadhātu ca upalabbhati … dhammadhātu ca upalabbhati saccikaṭṭhaparamatthena …pe….

Cakkhundriyañca upalabbhati saccikaṭṭhaparamatthena …pe…

sotindriyañca upalabbhati … ghānindriyañca upalabbhati … jivhindriyañca upalabbhati … kāyindriyañca upalabbhati … manindriyañca upalabbhati … jīvitindriyañca upalabbhati … itthindriyañca upalabbhati … purisindriyañca upalabbhati … sukhindriyañca upalabbhati … dukkhindriyañca upalabbhati … somanassindriyañca upalabbhati … domanassindriyañca upalabbhati … upekkhindriyañca upalabbhati … saddhindriyañca upalabbhati … vīriyindriyañca upalabbhati … satindriyañca upalabbhati … samādhindriyañca upalabbhati … paññindriyañca upalabbhati … anaññātaññassāmītindriyañca upalabbhati … aññindriyañca upalabbhati … aññātāvindriyañca upalabbhati saccikaṭṭhaparamatthenāti?

Āmantā.

Aññaṁ aññātāvindriyaṁ añño puggaloti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthena, tena vata re vattabbe—

“aññaṁ aññātāvindriyaṁ añño puggalo”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā.

No ce pana vattabbe—

“aññaṁ aññātāvindriyaṁ añño puggalo”ti, no ca vata re vattabbe—

“puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā …pe….

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”, rūpañca upalabbhati saccikaṭṭhaparamatthenāti?

Āmantā.

Aññaṁ rūpaṁ añño puggaloti?

Na hevaṁ vattabbe.

Ājānāhi paṭikammaṁ.

Hañci vuttaṁ bhagavatā—

“atthi puggalo attahitāya paṭipanno”, rūpañca upalabbhati saccikaṭṭhaparamatthena, tena vata re vattabbe—

“aññaṁ rūpaṁ añño puggalo”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā.

No ce pana vattabbe—

“aññaṁ rūpaṁ añño puggalo”ti, no ca vata re vattabbe—

“vuttaṁ bhagavatā—

‘atthi puggalo attahitāya paṭipanno’, rūpañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā …pe….

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”, vedanā ca upalabbhati …pe…

saññā ca upalabbhati …pe…

saṅkhārā ca upalabbhanti …pe…

viññāṇañca upalabbhati saccikaṭṭhaparamatthenāti?

Āmantā.

Aññaṁ viññāṇaṁ añño puggaloti?

Na hevaṁ vattabbe.

Ājānāhi paṭikammaṁ.

Hañci vuttaṁ bhagavatā—

“atthi puggalo attahitāya paṭipanno”, viññāṇañca upalabbhati saccikaṭṭhaparamatthena, tena vata re vattabbe—

“aññaṁ viññāṇaṁ añño puggalo”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno, viññāṇañca upalabbhati saccikaṭṭhaparamatthena’, no ca vattabbe—

‘aññaṁ viññāṇaṁ añño puggalo’”ti micchā.

No ce pana vattabbe—

“aññaṁ viññāṇaṁ añño puggalo”ti, no ca vata re vattabbe—

“vuttaṁ bhagavatā—

‘atthi puggalo attahitāya paṭipanno’, viññāṇañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno’, viññāṇañca upalabbhati saccikaṭṭhaparamatthena, no ca vattabbe—

‘aññaṁ viññāṇaṁ añño puggalo’”ti micchā …pe….

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”, cakkhāyatanañca upalabbhati saccikaṭṭhaparamatthena …pe…

sotāyatanañca upalabbhati …pe…

dhammāyatanañca upalabbhati saccikaṭṭhaparamatthena …pe….

Cakkhudhātu ca upalabbhati saccikaṭṭhaparamatthena …pe…

kāyadhātu ca upalabbhati …pe…

rūpadhātu ca upalabbhati …pe…

phoṭṭhabbadhātu ca upalabbhati …pe…

cakkhuviññāṇadhātu ca upalabbhati …pe…

manoviññāṇadhātu ca upalabbhati …pe…

dhammadhātu ca upalabbhati saccikaṭṭhaparamatthena …pe….

Cakkhundriyañca upalabbhati saccikaṭṭhaparamatthena …pe…

sotindriyañca upalabbhati saccikaṭṭhaparamatthena …pe…

aññindriyañca upalabbhati saccikaṭṭhaparamatthena …pe….

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”, aññātāvindriyañca upalabbhati saccikaṭṭhaparamatthenāti?

Āmantā.

Aññaṁ aññātāvindriyaṁ añño puggaloti?

Na hevaṁ vattabbe.

Ājānāhi paṭikammaṁ.

Hañci vuttaṁ bhagavatā—

“atthi puggalo attahitāya paṭipanno”, aññātāvindriyañca upalabbhati saccikaṭṭhaparamatthena, tena vata re vattabbe—

“aññaṁ aññātāvindriyaṁ añño puggalo”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā.

No ce pana vattabbe—

“aññaṁ aññātāvindriyaṁ añño puggalo”ti, no ca vata re vattabbe—

“vuttaṁ bhagavatā—

‘atthi puggalo attahitāya paṭipanno’, aññātāvindriyañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā …pe….

Suddhikasaṁsandanā.

Opammasaṁsandana

Rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanāti?

Āmantā.

Puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthenāti?

Āmantā.

Aññaṁ rūpaṁ añño puggaloti?

Na hevaṁ vattabbe.

Ājānāhi niggahaṁ.

Hañci rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena;

tena vata re vattabbe—

“aññaṁ rūpaṁ añño puggalo”ti.

Yaṁ tattha vadesi—

“vattabbe kho—

‘rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā.

No ce pana vattabbe—

“aññaṁ rūpaṁ añño puggalo”ti, no ca vata re vattabbe—

“rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā …pe….

Rūpaṁ upalabbhati saccikaṭṭhaparamatthena, saññā ca upalabbhati …pe…

saṅkhārā ca upalabbhanti …pe…

viññāṇañca upalabbhati saccikaṭṭhaparamatthena, aññaṁ rūpaṁ aññaṁ viññāṇanti?

Āmantā.

Puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthenāti?

Āmantā.

Aññaṁ rūpaṁ añño puggaloti?

Na hevaṁ vattabbe.

Ājānāhi niggahaṁ.

Hañci rūpaṁ upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena, aññaṁ rūpaṁ aññaṁ viññāṇaṁ, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena;

tena vata re vattabbe—

“aññaṁ rūpaṁ añño puggalo”ti.

Yaṁ tattha vadesi—

“vattabbe kho—

‘rūpaṁ upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena, aññaṁ rūpaṁ aññaṁ viññāṇaṁ, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā.

No ce pana vattabbe—

“aññaṁ rūpaṁ añño puggalo”ti, no ca vata re vattabbe—

“rūpaṁ upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena, aññaṁ rūpaṁ aññaṁ viññāṇaṁ, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘rūpaṁ upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena, aññaṁ rūpaṁ aññaṁ viññāṇaṁ, puggalo upalabbhati saccikaṭṭhaparamatthena, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā …pe….

Vedanā upalabbhati saccikaṭṭhaparamatthena, saññā ca upalabbhati …pe…

saṅkhārā ca upalabbhanti …pe…

viññāṇañca upalabbhati …pe…

rūpañca upalabbhati saccikaṭṭhaparamatthena …pe….

Saññā upalabbhati saccikaṭṭhaparamatthena, saṅkhārā ca upalabbhanti …pe…

viññāṇañca upalabbhati …pe…

rūpañca upalabbhati …pe…

vedanā ca upalabbhati saccikaṭṭhaparamatthena …pe….

Saṅkhārā upalabbhanti saccikaṭṭhaparamatthena, viññāṇañca upalabbhati …pe…

rūpañca upalabbhati …pe…

vedanā ca upalabbhati …pe…

saññā ca upalabbhati saccikaṭṭhaparamatthena …pe….

Viññāṇaṁ upalabbhati saccikaṭṭhaparamatthena, rūpañca upalabbhati …pe…

vedanā ca upalabbhati …pe…

saññā ca upalabbhati …pe…

saṅkhārā ca upalabbhanti saccikaṭṭhaparamatthena, aññaṁ viññāṇaṁ aññe saṅkhārāti?

Āmantā.

Puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthenāti?

Āmantā.

Aññaṁ viññāṇaṁ añño puggaloti?

Na hevaṁ vattabbe.

Ājānāhi niggahaṁ.

Hañci viññāṇaṁ upalabbhati saccikaṭṭhaparamatthena, saṅkhārā ca upalabbhanti saccikaṭṭhaparamatthena, aññaṁ viññāṇaṁ aññe saṅkhārā, puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena;

tena vata re vattabbe—

“aññaṁ viññāṇaṁ añño puggalo”ti.

Yaṁ tattha vadesi—

“vattabbe kho—

‘viññāṇaṁ upalabbhati saccikaṭṭhaparamatthena, saṅkhārā ca upalabbhanti saccikaṭṭhaparamatthena, aññaṁ viññāṇaṁ aññe saṅkhārā, puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena’, no ca vattabbe—

‘aññaṁ viññāṇaṁ añño puggalo’”ti micchā.

No ce pana vattabbe—

“aññaṁ viññāṇaṁ añño puggalo”ti, no ca vata re vattabbe—

“viññāṇaṁ upalabbhati saccikaṭṭhaparamatthena, saṅkhārā ca upalabbhanti saccikaṭṭhaparamatthena, aññaṁ viññāṇaṁ aññe saṅkhārā, puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘viññāṇaṁ upalabbhati saccikaṭṭhaparamatthena, saṅkhārā ca upalabbhanti saccikaṭṭhaparamatthena, aññaṁ viññāṇaṁ aññe saṅkhārā, puggalo upalabbhati saccikaṭṭhaparamatthena, viññāṇañca upalabbhati saccikaṭṭhaparamatthena’, no ca vattabbe—

‘aññaṁ viññāṇaṁ añño puggalo’”ti micchā …pe….

Cakkhāyatanaṁ upalabbhati saccikaṭṭhaparamatthena, sotāyatanañca upalabbhati …pe…

dhammāyatanañca upalabbhati saccikaṭṭhaparamatthena …pe…

sotāyatanaṁ upalabbhati …pe…

dhammāyatanaṁ upalabbhati saccikaṭṭhaparamatthena, cakkhāyatanañca upalabbhati …pe…

manāyatanañca upalabbhati saccikaṭṭhaparamatthena …pe….

Cakkhudhātu upalabbhati saccikaṭṭhaparamatthena, sotadhātu ca upalabbhati …pe…

dhammadhātu ca upalabbhati saccikaṭṭhaparamatthena …pe…

sotadhātu upalabbhati …pe…

dhammadhātu upalabbhati saccikaṭṭhaparamatthena, cakkhudhātu ca upalabbhati …pe…

manoviññāṇadhātu ca upalabbhati saccikaṭṭhaparamatthena …pe….

Cakkhundriyaṁ upalabbhati saccikaṭṭhaparamatthena, sotindriyañca upalabbhati …pe…

aññātāvindriyañca upalabbhati saccikaṭṭhaparamatthena …pe…

sotindriyaṁ upalabbhati …pe…

aññātāvindriyaṁ upalabbhati saccikaṭṭhaparamatthena …pe…

cakkhundriyañca upalabbhati …pe…

aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyanti?

Āmantā.

Puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthenāti?

Āmantā.

Aññaṁ aññātāvindriyaṁ añño puggaloti?

Na hevaṁ vattabbe.

Ājānāhi niggahaṁ.

Hañci aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthena;

tena vata re vattabbe—

“aññaṁ aññātāvindriyaṁ añño puggalo”ti.

Yaṁ tattha vadesi—

“vattabbe kho—

‘aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā.

No ce pana vattabbe—

“aññaṁ aññātāvindriyaṁ añño puggalo”ti, no ca vata re vattabbe—

“aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, puggalo upalabbhati saccikaṭṭhaparamatthena, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā …pe….

Rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanāti?

Āmantā.

Vuttaṁ bhagavatā—

“atthi puggalo attahitāya paṭipanno”, rūpañca upalabbhati saccikaṭṭhaparamatthenāti?

Āmantā.

Aññaṁ rūpaṁ añño puggaloti?

Na hevaṁ vattabbe.

Ājānāhi paṭikammaṁ.

Hañci rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, vuttaṁ bhagavatā—

“atthi puggalo attahitāya paṭipanno”, rūpañca upalabbhati saccikaṭṭhaparamatthena;

tena vata re vattabbe—

“aññaṁ rūpaṁ añño puggalo”ti.

Yaṁ tattha vadesi—

“vattabbe kho—

‘rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, vuttaṁ bhagavatā—

atthi puggalo attahitāya paṭipanno, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā.

No ce pana vattabbe—

“aññaṁ rūpaṁ añño puggalo”ti, no ca vata re vattabbe—

“rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, vuttaṁ bhagavatā—

‘atthi puggalo attahitāya paṭipanno’, rūpañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘rūpaṁ upalabbhati saccikaṭṭhaparamatthena, vedanā ca upalabbhati saccikaṭṭhaparamatthena, aññaṁ rūpaṁ aññā vedanā, vuttaṁ bhagavatā—

atthi puggalo attahitāya paṭipanno, rūpañca upalabbhati saccikaṭṭhaparamatthena’, no ca vattabbe—

‘aññaṁ rūpaṁ añño puggalo’”ti micchā …pe….

Rūpaṁ upalabbhati saccikaṭṭhaparamatthena, saññā ca upalabbhati …

saṅkhārā ca upalabbhanti …

viññāṇañca upalabbhati saccikaṭṭhaparamatthena …pe….

Vedanā upalabbhati saccikaṭṭhaparamatthena, saññā ca upalabbhati …

saṅkhārā ca upalabbhanti …

viññāṇañca upalabbhati …

rūpañca upalabbhati saccikaṭṭhaparamatthena …pe….

Saññā upalabbhati saccikaṭṭhaparamatthena, saṅkhārā ca upalabbhanti …

viññāṇañca upalabbhati …

rūpañca upalabbhati …

vedanā ca upalabbhati saccikaṭṭhaparamatthena …pe….

Saṅkhārā upalabbhanti saccikaṭṭhaparamatthena, viññāṇañca upalabbhati …

rūpañca upalabbhati …

vedanā ca upalabbhati …

saññā ca upalabbhati saccikaṭṭhaparamatthena …pe….

Viññāṇaṁ upalabbhati saccikaṭṭhaparamatthena, rūpañca upalabbhati …

vedanā ca upalabbhati …

saññā ca upalabbhati …

saṅkhārā ca upalabbhanti saccikaṭṭhaparamatthena …pe….

Cakkhāyatanaṁ upalabbhati saccikaṭṭhaparamatthena, sotāyatanañca upalabbhati …pe…

dhammāyatanañca upalabbhati saccikaṭṭhaparamatthena …pe…

sotāyatanaṁ upalabbhati …pe…

dhammāyatanaṁ upalabbhati saccikaṭṭhaparamatthena, cakkhāyatanañca upalabbhati …pe…

manāyatanañca upalabbhati saccikaṭṭhaparamatthena …pe….

Cakkhudhātu upalabbhati saccikaṭṭhaparamatthena, sotadhātu ca upalabbhati …pe…

dhammadhātu ca upalabbhati saccikaṭṭhaparamatthena …pe…

sotadhātu upalabbhati saccikaṭṭhaparamatthena …pe…

dhammadhātu upalabbhati saccikaṭṭhaparamatthena, cakkhudhātu ca upalabbhati …pe…

manoviññāṇadhātu ca upalabbhati saccikaṭṭhaparamatthena …pe….

Cakkhundriyaṁ upalabbhati saccikaṭṭhaparamatthena, sotindriyañca upalabbhati …pe…

aññātāvindriyañca upalabbhati saccikaṭṭhaparamatthena …pe…

sotindriyaṁ upalabbhati …pe…

aññātāvindriyaṁ upalabbhati saccikaṭṭhaparamatthena, cakkhundriyañca upalabbhati …pe…

aññindriyañca upalabbhati saccikaṭṭhaparamatthena;

aññaṁ aññātāvindriyaṁ aññaṁ aññindriyanti?

Āmantā.

Vuttaṁ bhagavatā—

“atthi puggalo attahitāya paṭipanno”, aññātāvindriyañca upalabbhati saccikaṭṭhaparamatthenāti?

Āmantā.

Aññaṁ aññātāvindriyaṁ añño puggaloti?

Na hevaṁ vattabbe.

Ājānāhi paṭikammaṁ.

Hañci aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, vuttaṁ bhagavatā—

“atthi puggalo attahitāya paṭipanno”, aññātāvindriyañca upalabbhati saccikaṭṭhaparamatthena;

tena vata re vattabbe—

“aññaṁ aññātāvindriyaṁ añño puggalo”ti.

Yaṁ tattha vadesi—

“vattabbe kho—

‘aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, vuttaṁ bhagavatā—

atthi puggalo attahitāya paṭipanno, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā.

No ce pana vattabbe—

“aññaṁ aññātāvindriyaṁ añño puggalo”ti, no ca vata re vattabbe—

“aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, vuttaṁ bhagavatā—

‘atthi puggalo attahitāya paṭipanno’, aññātāvindriyañca upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘aññātāvindriyaṁ upalabbhati saccikaṭṭhaparamatthena, aññindriyañca upalabbhati saccikaṭṭhaparamatthena, aññaṁ aññātāvindriyaṁ aññaṁ aññindriyaṁ, vuttaṁ bhagavatā—

atthi puggalo attahitāya paṭipanno, aññātāvindriyañca upalabbhati saccikaṭṭhaparamatthena’, no ca vattabbe—

‘aññaṁ aññātāvindriyaṁ añño puggalo’”ti micchā …pe….

Opammasaṁsandanaṁ.

Catukkanayasaṁsandana

Puggalo upalabbhati saccikaṭṭhaparamatthenāti?

Āmantā.

Rūpaṁ puggaloti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“rūpaṁ puggalo”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘rūpaṁ puggalo’”ti micchā.

No ce pana vattabbe—

“rūpaṁ puggalo”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘rūpaṁ puggalo’”ti micchā …pe….

Puggalo upalabbhati saccikaṭṭhaparamatthenāti?

Āmantā.

Rūpasmiṁ puggalo …pe…

aññatra rūpā puggalo …pe…

puggalasmiṁ rūpanti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“puggalasmiṁ rūpan”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘puggalasmiṁ rūpan’”ti micchā.

No ce pana vattabbe—

“puggalasmiṁ rūpan”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘puggalasmiṁ rūpan’”ti micchā …pe….

Puggalo upalabbhati saccikaṭṭhaparamatthenāti?

Āmantā.

Vedanā puggalo …pe…

vedanāya puggalo …pe…

aññatra vedanāya puggalo …pe…

puggalasmiṁ vedanā …pe….

Saññā puggalo …pe…

saññāya puggalo …pe…

aññatra saññāya puggalo …pe…

puggalasmiṁ saññā …pe….

Saṅkhārā puggalo …pe…

saṅkhāresu puggalo …pe…

aññatra saṅkhārehi puggalo …pe…

puggalasmiṁ saṅkhārā …pe….

Viññāṇaṁ puggalo …pe…

viññāṇasmiṁ puggalo …pe…

aññatra viññāṇā puggalo …pe…

puggalasmiṁ viññāṇanti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“puggalasmiṁ viññāṇan”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘puggalasmiṁ viññāṇan’”ti micchā.

No ce pana vattabbe—

“puggalasmiṁ viññāṇan”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘puggalasmiṁ viññāṇan’”ti micchā …pe….

Puggalo upalabbhati saccikaṭṭhaparamatthenāti?

Āmantā.

Cakkhāyatanaṁ puggalo …pe…

cakkhāyatanasmiṁ puggalo …pe…

aññatra cakkhāyatanā puggalo …pe…

puggalasmiṁ cakkhāyatanaṁ …pe…

dhammāyatanaṁ puggalo …pe…

dhammāyatanasmiṁ puggalo …pe…

aññatra dhammāyatanā puggalo …pe…

puggalasmiṁ dhammāyatanaṁ …pe….

Cakkhudhātu puggalo …pe…

cakkhudhātuyā puggalo …pe…

aññatra cakkhudhātuyā puggalo …pe…

puggalasmiṁ cakkhudhātu …pe…

dhammadhātu puggalo …pe…

dhammadhātuyā puggalo …pe…

aññatra dhammadhātuyā puggalo …pe…

puggalasmiṁ dhammadhātu …pe….

Cakkhundriyaṁ puggalo …pe…

cakkhundriyasmiṁ puggalo …pe…

aññatra cakkhundriyā puggalo …pe…

puggalasmiṁ cakkhundriyaṁ …pe…

aññātāvindriyaṁ puggalo …pe…

aññātāvindriyasmiṁ puggalo …pe…

aññatra aññātāvindriyā puggalo …pe…

puggalasmiṁ aññātāvindriyanti?

Na hevaṁ vattabbe.

Ājānāhi niggahaṁ.

Hañci puggalo upalabbhati saccikaṭṭhaparamatthena, tena vata re vattabbe—

“puggalasmiṁ aññātāvindriyan”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘puggalasmiṁ aññātāvindriyan’”ti micchā.

No ce pana vattabbe—

“puggalasmiṁ aññātāvindriyan”ti, no ca vata re vattabbe—

“puggalo upalabbhati saccikaṭṭhaparamatthenā”ti.

Yaṁ tattha vadesi—

“vattabbe kho—

‘puggalo upalabbhati saccikaṭṭhaparamatthena’, no ca vattabbe—

‘puggalasmiṁ aññātāvindriyan’”ti micchā …pe….

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”ti?

Āmantā.

Rūpaṁ puggaloti?

Na hevaṁ vattabbe.

Ājānāhi paṭikammaṁ.

Hañci vuttaṁ bhagavatā—

“atthi puggalo attahitāya paṭipanno”, tena vata re vattabbe—

“rūpaṁ puggalo”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno’, no ca vattabbe—

‘rūpaṁ puggaloti’” micchā.

No ce pana vattabbe—

“rūpaṁ puggalo”ti, no ca vata re vattabbe—

“vuttaṁ bhagavatā—

‘atthi puggalo attahitāya paṭipanno’”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno’, no ca vattabbe—

‘rūpaṁ puggalo’”ti micchā …pe….

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”ti?

Āmantā.

Rūpasmiṁ puggalo …pe…

aññatra rūpā puggalo …pe…

puggalasmiṁ rūpaṁ …pe….

Vedanā puggalo …pe…

vedanāya puggalo …pe…

aññatra vedanāya puggalo …pe…

puggalasmiṁ vedanā …pe….

Saññā puggalo …pe…

saññāya puggalo …pe…

aññatra saññāya puggalo …pe…

puggalasmiṁ saññā …pe….

Saṅkhārā puggalo …pe…

saṅkhāresu puggalo …pe…

aññatra saṅkhārehi puggalo …pe…

puggalasmiṁ saṅkhārā …pe….

Viññāṇaṁ puggalo …pe…

viññāṇasmiṁ puggalo …pe…

aññatra viññāṇā puggalo …pe…

puggalasmiṁ viññāṇanti?

Na hevaṁ vattabbe.

Ājānāhi paṭikammaṁ.

Hañci vuttaṁ bhagavatā—

“atthi puggalo attahitāya paṭipanno”, tena vata re vattabbe—

“puggalasmiṁ viññāṇan”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno’, no ca vattabbe—

‘puggalasmiṁ viññāṇan’”ti micchā.

No ce pana vattabbe—

“puggalasmiṁ viññāṇan”ti, no ca vata re vattabbe—

“vuttaṁ bhagavatā—

‘atthi puggalo attahitāya paṭipanno’”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno’, no ca vattabbe—

‘puggalasmiṁ viññāṇan’”ti micchā …pe….

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”ti?

Āmantā.

Cakkhāyatanaṁ puggalo …pe…

cakkhāyatanasmiṁ puggalo …pe…

aññatra cakkhāyatanā puggalo …pe…

puggalasmiṁ cakkhāyatanaṁ …pe…

dhammāyatanaṁ puggalo …pe…

dhammāyatanasmiṁ puggalo …pe…

aññatra dhammāyatanā puggalo …pe…

puggalasmiṁ dhammāyatanaṁ …pe….

Cakkhudhātu puggalo …pe…

cakkhudhātuyā puggalo …pe…

aññatra cakkhudhātuyā puggalo …pe…

puggalasmiṁ cakkhudhātu …pe…

dhammadhātu puggalo …pe…

dhammadhātuyā puggalo …pe…

aññatra dhammadhātuyā puggalo …pe…

puggalasmiṁ dhammadhātu …pe….

Cakkhundriyaṁ puggalo …pe…

cakkhundriyasmiṁ puggalo …pe…

aññatra cakkhundriyā puggalo …pe…

puggalasmiṁ cakkhundriyaṁ …pe…

aññātāvindriyaṁ puggalo …pe…

aññātāvindriyasmiṁ puggalo …pe…

aññatra aññātāvindriyā puggalo …pe…

puggalasmiṁ aññātāvindriyanti?

Na hevaṁ vattabbe.

Ājānāhi paṭikammaṁ.

Hañci vuttaṁ bhagavatā—

“atthi puggalo attahitāya paṭipanno”, tena vata re vattabbe—

“puggalasmiṁ aññātāvindriyan”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno’, no ca vattabbe—

‘puggalasmiṁ aññātāvindriyan’”ti micchā.

No ce pana vattabbe—

“puggalasmiṁ aññātāvindriyan”ti, no ca vata re vattabbe—

“vuttaṁ bhagavatā—

‘atthi puggalo attahitāya paṭipanno’”ti.

Yaṁ tattha vadesi—

“vattabbe kho—

‘vuttaṁ bhagavatā—

atthi puggalo attahitāya paṭipanno’, no ca vattabbe—

‘puggalasmiṁ aññātāvindriyan’”ti micchā …pe….

Catukkanayasaṁsandanaṁ.

Lakkhaṇayutti

Puggalo upalabbhati saccikaṭṭhaparamatthenāti?

Āmantā.

Puggalo sappaccayo …pe…

puggalo appaccayo …

puggalo saṅkhato …

puggalo asaṅkhato …

puggalo sassato …

puggalo asassato …

puggalo sanimitto …

puggalo animittoti?

Na hevaṁ vattabbe.

(Saṅkhittaṁ.)

Puggalo nupalabbhati saccikaṭṭhaparamatthenāti?

Āmantā.

Vuttaṁ bhagavatā—

“atthi puggalo attahitāya paṭipanno”ti?

Āmantā.

Puggalo sappaccayo …pe…

puggalo appaccayo …

puggalo saṅkhato …

puggalo asaṅkhato …

puggalo sassato …

puggalo asassato …

puggalo sanimitto …

puggalo animittoti?

Na hevaṁ vattabbe.

(Saṅkhittaṁ.)

Lakkhaṇayuttikathā.

Vacanasodhana

Puggalo upalabbhati, upalabbhati puggaloti?

Puggalo upalabbhati, upalabbhati kehici puggalo kehici na puggaloti.

Puggalo kehici upalabbhati kehici na upalabbhatīti?

Na hevaṁ vattabbe …pe….

Puggalo saccikaṭṭho, saccikaṭṭho puggaloti?

Puggalo saccikaṭṭho, saccikaṭṭho kehici puggalo kehici na puggaloti.

Puggalo kehici saccikaṭṭho kehici na saccikaṭṭhoti?

Na hevaṁ vattabbe …pe….

Puggalo vijjamāno, vijjamāno puggaloti?

Puggalo vijjamāno, vijjamāno kehici puggalo kehici na puggaloti.

Puggalo kehici vijjamāno kehici na vijjamānoti?

Na hevaṁ vattabbe …pe….

Puggalo saṁvijjamāno, saṁvijjamāno puggaloti?

Puggalo saṁvijjamāno, saṁvijjamāno kehici puggalo kehici na puggaloti.

Puggalo kehici saṁvijjamāno kehici na saṁvijjamānoti?

Na hevaṁ vattabbe …pe….

Puggalo atthi, atthi puggaloti?

Puggalo atthi, atthi kehici puggalo kehici na puggaloti.

Puggalo kehici atthi kehici natthīti?

Na hevaṁ vattabbe …pe….

Puggalo atthi, atthi na sabbo puggaloti?

Āmantā …pe…

puggalo natthi, natthi na sabbo puggaloti?

Na hevaṁ vattabbe.

(Saṅkhittaṁ.)

Vacanasodhanaṁ.

Paññattānuyoga

Rūpadhātuyā rūpī puggaloti?

Āmantā.

Kāmadhātuyā kāmī puggaloti?

Na hevaṁ vattabbe …pe….

Rūpadhātuyā rūpino sattāti?

Āmantā.

Kāmadhātuyā kāmino sattāti?

Na hevaṁ vattabbe …pe….

Arūpadhātuyā arūpī puggaloti?

Āmantā.

Kāmadhātuyā kāmī puggaloti?

Na hevaṁ vattabbe …pe….

Arūpadhātuyā arūpino sattāti?

Āmantā.

Kāmadhātuyā kāmino sattāti?

Na hevaṁ vattabbe …pe….

Rūpadhātuyā rūpī puggalo arūpadhātuyā arūpī puggalo, atthi ca koci rūpadhātuyā cuto arūpadhātuṁ upapajjatīti?

Āmantā.

Rūpī puggalo upacchinno, arūpī puggalo jātoti?

Na hevaṁ vattabbe …pe….

Rūpadhātuyā rūpino sattā arūpadhātuyā arūpino sattā, atthi ca koci rūpadhātuyā cuto arūpadhātuṁ upapajjatīti?

Āmantā.

Rūpī satto upacchinno, arūpī satto jātoti?

Na hevaṁ vattabbe …pe….

Kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāteti?

Āmantā.

Puggaloti vā jīvoti vā, jīvoti vā puggaloti vā, puggalaṁ appiyaṁ karitvā esese ekaṭṭhe same samabhāge tajjāteti?

Āmantā.

Añño kāyo, añño puggaloti?

Āmantā.

Aññaṁ jīvaṁ, aññaṁ sarīranti?

Na hevaṁ vattabbe.

Ājānāhi niggahaṁ.

Hañci kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, puggaloti vā jīvoti vā, jīvoti vā puggaloti vā, puggalaṁ appiyaṁ karitvā esese ekaṭṭhe same samabhāge tajjāte, añño kāyo añño puggalo;

tena vata re vattabbe—

“aññaṁ jīvaṁ aññaṁ sarīran”ti.

Yaṁ tattha vadesi—

“vattabbe kho—

‘kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, puggaloti vā jīvoti vā, jīvoti vā puggaloti vā, puggalaṁ appiyaṁ karitvā esese ekaṭṭhe same samabhāge tajjāte, añño kāyo añño puggalo’, no ca vattabbe—

‘aññaṁ jīvaṁ aññaṁ sarīran’”ti micchā.

No ce pana vattabbe—

“aññaṁ jīvaṁ aññaṁ sarīran”ti, no ca vata re vattabbe—

“kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, puggaloti vā jīvoti vā, jīvoti vā puggaloti vā, puggalaṁ appiyaṁ karitvā esese ekaṭṭhe same samabhāge tajjāte, añño kāyo añño puggalo”ti.

Yaṁ tattha vadesi—

“vattabbe kho—

‘kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, puggaloti vā jīvoti vā, jīvoti vā puggaloti vā, puggalaṁ appiyaṁ karitvā esese ekaṭṭhe same samabhāge tajjāte, añño kāyo añño puggalo’, no ca vattabbe—

‘aññaṁ jīvaṁ aññaṁ sarīran’”ti micchā …pe….

Kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāteti?

Āmantā.

Vuttaṁ bhagavatā—

“atthi puggalo attahitāya paṭipanno”ti?

Āmantā.

Añño kāyo añño puggaloti?

Na hevaṁ vattabbe.

Ājānāhi paṭikammaṁ.

Hañci kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, vuttaṁ bhagavatā—

“atthi puggalo attahitāya paṭipanno”, tena vata re vattabbe—

“añño kāyo añño puggalo”ti.

Yaṁ tattha vadesi—

“vattabbe kho—

‘kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, vuttaṁ bhagavatā—

atthi puggalo attahitāya paṭipanno’, no ca vattabbe—

‘añño kāyo añño puggalo’”ti micchā.

No ce pana vattabbe—

“añño kāyo añño puggalo”ti, no ca vata re vattabbe—

“kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, vuttaṁ bhagavatā—

‘atthi puggalo attahitāya paṭipanno’”ti.

Yaṁ tattha vadesi—

“vattabbe kho—

‘kāyoti vā sarīranti vā, sarīranti vā kāyoti vā, kāyaṁ appiyaṁ karitvā esese ekaṭṭhe same samabhāge tajjāte, vuttaṁ bhagavatā—

atthi puggalo attahitāya paṭipanno’, no ca vattabbe—

‘añño kāyo añño puggalo’”ti micchā.

(Saṅkhittaṁ.)

Paññattānuyogo.