Pupphavagga (DHP44-59)

Khuddakanikāya

Dhammapada

Pupphavagga

Pathavikathāpasutapañcasatabhikkhuvatthu

Ko imaṁ pathaviṁ vicessati,

Yamalokañca imaṁ sadevakaṁ;

Ko dhammapadaṁ sudesitaṁ,

Kusalo pupphamiva pacessati.

Sekho pathaviṁ vicessati,

Yamalokañca imaṁ sadevakaṁ;

Sekho dhammapadaṁ sudesitaṁ,

Kusalo pupphamiva pacessati.

Marīcikammaṭṭhānikabhikkhuvatthu

Pheṇūpamaṁ kāyamimaṁ viditvā,

Marīcidhammaṁ abhisambudhāno;

Chetvāna mārassa papupphakāni,

Adassanaṁ maccurājassa gacche.

Viṭaṭūbhavatthu

Pupphāni heva pacinantaṁ,

byāsattamanasaṁ naraṁ;

Suttaṁ gāmaṁ mahoghova,

maccu ādāya gacchati.

Patipūjikakumārivatthu

Pupphāni heva pacinantaṁ,

byāsattamanasaṁ naraṁ;

Atittaññeva kāmesu,

antako kurute vasaṁ.

Macchariyakosiyaseṭṭhivatthu

Yathāpi bhamaro pupphaṁ,

vaṇṇagandhamaheṭhayaṁ;

Paleti rasamādāya,

evaṁ gāme munī care.

Pāveyyaājīvakavatthu

Na paresaṁ vilomāni,

na paresaṁ katākataṁ;

Attanova avekkheyya,

katāni akatāni ca.

Chattapāṇiupāsakavatthu

Yathāpi ruciraṁ pupphaṁ,

vaṇṇavantaṁ agandhakaṁ;

Evaṁ subhāsitā vācā,

aphalā hoti akubbato.

Yathāpi ruciraṁ pupphaṁ,

Vaṇṇavantaṁ sagandhakaṁ;

Evaṁ subhāsitā vācā,

Saphalā hoti kubbato.

Visākhāvatthu

Yathāpi puppharāsimhā,

kayirā mālāguṇe bahū;

Evaṁ jātena maccena,

kattabbaṁ kusalaṁ bahuṁ.

Ānandattherapañhavatthu

Na pupphagandho paṭivātameti,

Na candanaṁ tagaramallikā vā;

Satañca gandho paṭivātameti,

Sabbā disā sappuriso pavāyati.

Candanaṁ tagaraṁ vāpi,

uppalaṁ atha vassikī;

Etesaṁ gandhajātānaṁ,

sīlagandho anuttaro.

Mahākassapattherapiṇḍapātadinnavatthu

Appamatto ayaṁ gandho,

yāyaṁ tagaracandanī;

Yo ca sīlavataṁ gandho,

vāti devesu uttamo.

Godhikattheraparinibbānavatthu

Tesaṁ sampannasīlānaṁ,

appamādavihārinaṁ;

Sammadaññāvimuttānaṁ,

māro maggaṁ na vindati.

Garahadinnavatthu

Yathā saṅkāradhānasmiṁ,

ujjhitasmiṁ mahāpathe;

Padumaṁ tattha jāyetha,

sucigandhaṁ manoramaṁ.

Evaṁ saṅkārabhūtesu,

andhabhūte puthujjane;

Atirocati paññāya,

sammāsambuddhasāvako.

Pupphavaggo catuttho.