Appamādavagga (DHP21-32)

Khuddakanikāya

Dhammapada

Appamādavagga

Sāmāvatīvatthu

Appamādo amatapadaṁ,

pamādo maccuno padaṁ;

Appamattā na mīyanti,

ye pamattā yathā matā.

Evaṁ visesato ñatvā,

appamādamhi paṇḍitā;

Appamāde pamodanti,

ariyānaṁ gocare ratā.

Te jhāyino sātatikā,

niccaṁ daḷhaparakkamā;

Phusanti dhīrā nibbānaṁ,

yogakkhemaṁ anuttaraṁ.

Kumbaghosakaseṭṭhivatthu

Uṭṭhānavato satīmato,

Sucikammassa nisammakārino;

Saññatassa dhammajīvino,

Appamattassa yasobhivaḍḍhati.

Cūḷapanthakavatthu

Uṭṭhānenappamādena,

saṁyamena damena ca;

Dīpaṁ kayirātha medhāvī,

yaṁ ogho nābhikīrati.

Bālanakkhattasaṅghuṭṭhavatthu

Pamādamanuyuñjanti,

bālā dummedhino janā;

Appamādañca medhāvī,

dhanaṁ seṭṭhaṁva rakkhati.

Mā pamādamanuyuñjetha,

mā kāmaratisanthavaṁ;

Appamatto hi jhāyanto,

pappoti vipulaṁ sukhaṁ.

Mahākassapattheravatthu

Pamādaṁ appamādena,

yadā nudati paṇḍito;

Paññāpāsādamāruyha,

asoko sokiniṁ pajaṁ;

Pabbataṭṭhova bhūmaṭṭhe,

dhīro bāle avekkhati.

Pamattāpamattadvesahāyakabhikkhuvatthu

Appamatto pamattesu,

suttesu bahujāgaro;

Abalassaṁva sīghasso,

hitvā yāti sumedhaso.

Maghavatthu

Appamādena maghavā,

devānaṁ seṭṭhataṁ gato;

Appamādaṁ pasaṁsanti,

pamādo garahito sadā.

Aññatarabhikkhuvatthu

Appamādarato bhikkhu,

pamāde bhayadassi vā;

Saṁyojanaṁ aṇuṁ thūlaṁ,

ḍahaṁ aggīva gacchati.

Nigamavāsitissattheravatthu

Appamādarato bhikkhu,

pamāde bhayadassi vā;

Abhabbo parihānāya,

nibbānasseva santike.

Appamādavaggo dutiyo.