Attavagga (DHP157-166)

Khuddakanikāya

Dhammapada

Attavagga

Bodhirājakumāravatthu

Attānañce piyaṁ jaññā,

rakkheyya naṁ surakkhitaṁ;

Tiṇṇaṁ aññataraṁ yāmaṁ,

paṭijaggeyya paṇḍito.

Upanandasakyaputtattheravatthu

Attānameva paṭhamaṁ,

patirūpe nivesaye;

Athaññamanusāseyya,

na kilisseyya paṇḍito.

Padhānikatissattheravatthu

Attānañce tathā kayirā,

yathāññamanusāsati;

Sudanto vata dametha,

attā hi kira duddamo.

Kumārakassapamātuttherivatthu

Attā hi attano nātho,

ko hi nātho paro siyā;

Attanā hi sudantena,

nāthaṁ labhati dullabhaṁ.

Mahākālaupāsakavatthu

Attanā hi kataṁ pāpaṁ,

Attajaṁ attasambhavaṁ;

Abhimatthati dummedhaṁ,

Vajiraṁvasmamayaṁ maṇiṁ.

Devadattavatthu

Yassa accantadussilyaṁ,

māluvā sālamivotthataṁ;

Karoti so tathattānaṁ,

yathā naṁ icchatī diso.

Saṅghabhedaparisakkanavatthu

Sukarāni asādhūni,

attano ahitāni ca;

Yaṁ ve hitañca sādhuñca,

taṁ ve paramadukkaraṁ.

Kālattheravatthu

Yo sāsanaṁ arahataṁ,

ariyānaṁ dhammajīvinaṁ;

Paṭikkosati dummedho,

diṭṭhiṁ nissāya pāpikaṁ;

Phalāni kaṭṭhakasseva,

attaghātāya phallati.

Cūḷakālaupāsakavatthu

Attanā hi kataṁ pāpaṁ,

attanā saṅkilissati;

Attanā akataṁ pāpaṁ,

attanāva visujjhati;

Suddhī asuddhi paccattaṁ,

nāñño aññaṁ visodhaye.

Attadatthattheravatthu

Attadatthaṁ paratthena,

bahunāpi na hāpaye;

Attadatthamabhiññāya,

sadatthapasuto siyā.

Attavaggo dvādasamo.