Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Aṅguttara Nikāya
Rajanīyasutta (AN5.81)
- Thông tin
- Mã SuttaCentral: AN5.81
Aṅguttara Nikāya 5.81
9. Theravagga
Rajanīyasutta
“Pañcahi, bhikkhave, dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
Katamehi pañcahi?
Rajanīye rajjati, dussanīye dussati, mohanīye muyhati, kuppanīye kuppati, madanīye majjati—
imehi kho, bhikkhave, pañcahi dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
Katamehi pañcahi?
Rajanīye na rajjati, dussanīye na dussati, mohanīye na muyhati, kuppanīye na kuppati, madanīye na majjati—
imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
Paṭhamaṁ.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.