Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Aṅguttara Nikāya
Sārajjasutta (AN5.101)
- Thông tin
- Mã SuttaCentral: AN5.101
Aṅguttara Nikāya 5.101
11. Phāsuvihāravagga
Sārajjasutta
“Pañcime, bhikkhave, sekhavesārajjakaraṇā dhammā.
Katame pañca?
Idha, bhikkhave, bhikkhu saddho hoti, sīlavā hoti, bahussuto hoti, āraddhavīriyo hoti, paññavā hoti.
Yaṁ, bhikkhave, assaddhassa sārajjaṁ hoti, saddhassa taṁ sārajjaṁ na hoti.
Tasmāyaṁ dhammo sekhavesārajjakaraṇo.
Yaṁ, bhikkhave, dussīlassa sārajjaṁ hoti, sīlavato taṁ sārajjaṁ na hoti.
Tasmāyaṁ dhammo sekhavesārajjakaraṇo.
Yaṁ, bhikkhave, appassutassa sārajjaṁ hoti, bahussutassa taṁ sārajjaṁ na hoti.
Tasmāyaṁ dhammo sekhavesārajjakaraṇo.
Yaṁ, bhikkhave, kusītassa sārajjaṁ hoti, āraddhavīriyassa taṁ sārajjaṁ na hoti.
Tasmāyaṁ dhammo sekhavesārajjakaraṇo.
Yaṁ, bhikkhave, duppaññassa sārajjaṁ hoti, paññavato taṁ sārajjaṁ na hoti.
Tasmāyaṁ dhammo sekhavesārajjakaraṇo.
Ime kho, bhikkhave, pañca sekhavesārajjakaraṇā dhammā”ti.
Paṭhamaṁ.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.