Rūpasutta (AN4.65)

Aṅguttara Nikāya 4.65

7. Pattakammavagga

Rūpasutta

“Cattārome, bhikkhave, puggalā santo saṁvijjamānā lokasmiṁ.

Katame cattāro?

Rūpappamāṇo rūpappasanno, ghosappamāṇo ghosappasanno, lūkhappamāṇo lūkhappasanno, dhammappamāṇo dhammappasanno—

Ime kho, bhikkhave, cattāro puggalā santo saṁvijjamānā lokasminti.

Ye ca rūpe pamāṇiṁsu,

ye ca ghosena anvagū;

Chandarāgavasūpetā,

nābhijānanti te janā.

Ajjhattañca na jānāti,

bahiddhā ca na passati;

Samantāvaraṇo bālo,

sa ve ghosena vuyhati.

Ajjhattañca na jānāti,

bahiddhā ca vipassati;

Bahiddhā phaladassāvī,

sopi ghosena vuyhati.

Ajjhattañca pajānāti,

bahiddhā ca vipassati;

Vinīvaraṇadassāvī,

na so ghosena vuyhatī”ti.

Pañcamaṁ.