Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Aṅguttara Nikāya
Sacchikaraṇīyasutta (AN4.189)
- Thông tin
- Mã SuttaCentral: AN4.189
Aṅguttara Nikāya 4.189
19. Brāhmaṇavagga
Sacchikaraṇīyasutta
“Cattārome, bhikkhave, sacchikaraṇīyā dhammā.
Katame cattāro?
Atthi, bhikkhave, dhammā kāyena sacchikaraṇīyā;
atthi, bhikkhave, dhammā satiyā sacchikaraṇīyā;
atthi, bhikkhave, dhammā cakkhunā sacchikaraṇīyā;
atthi, bhikkhave, dhammā paññāya sacchikaraṇīyā.
Katame ca, bhikkhave, dhammā kāyena sacchikaraṇīyā?
Aṭṭha vimokkhā, bhikkhave, kāyena sacchikaraṇīyā.
Katame ca, bhikkhave, dhammā satiyā sacchikaraṇīyā?
Pubbenivāso, bhikkhave, satiyā sacchikaraṇīyo.
Katame ca, bhikkhave, dhammā cakkhunā sacchikaraṇīyā?
Sattānaṁ cutūpapāto, bhikkhave, cakkhunā sacchikaraṇīyo.
Katame ca, bhikkhave, dhammā paññāya sacchikaraṇīyā?
Āsavānaṁ khayo, bhikkhave, paññāya sacchikaraṇīyo.
Ime kho, bhikkhave, cattāro sacchikaraṇīyā dhammā”ti.
Navamaṁ.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.